الخميس 17 ربيع الأول 1441 الموافق 14 نوفمبر 2019
الرئيسية » ثقافة و فن » بيت الشعر » الشاعر ناجي نعيم | يكتب : حمايا العزيز

الشاعر ناجي نعيم | يكتب : حمايا العزيز

الشاعر ناجي نعيم  يكتب  حمايا العزيز

حمايا العزيز
لقد حزّ فيّا
وزادني استياء
تصرّف جنابك في هذا المساء
علمنا بأنَّ :
أقمتم خطوبه ومن بعد حِنّه
ومن بعد تدخل حَرَمنا ومصونّا
أنا شبعت سيما
وابن القديمه اللى عامل عريس
بيخطب مراتي
ورحمة ضميركوا لجيب البوليس
وياخد حماتي
معازيم وزفه لزوم الروتين
وناس تايهه فيا
وناس ملمومين
ورقص واغاني خلاف التهاني
وشيئ م المبالغه
ودعوه و آمين
يتمم بخير .
وفاصل قَصير من دموع لونها فالصو
وانا دموعي خلصوا
وفاضل في وشي شوية بلاهه
بلاها الوعود اللي شالت أديا
وسابت أديها
تغطيها ايد غصب عني غريبه
بلاها الظروف اللي جارت عليا
وجارت عليها
بتفرض مكاني حبيب للحبيبه
وكل اللي فاضل
شوية فواصل
وكل الفواصل مجرد هبل
أمانه تواسوها وبصّوا ف عينيها
ولمّوا الدموع من جبين الدِبل
قولولها النصيب لما يضحك/ بنبكي
ولحظة ما نفرح/ بيضحك زَعَل
وبيتها العجوز مش هيقدر يغني
ونبض الحيطان راح يصيبه الملل
مشاهد أليمه
وخوف بيداهمني
عينيها الحزينه تملي تهاجمني
وبهرب واغني
وببكي واغني
واتوه جوه عجزي
يتوه جوه مني
ونفس السيناريو بنفس المراره
واهو الحظ جاهز لـ شد الستاره
وبعدين يسقّف
ويضحك عليا
وتبقى ابتسامة النهايه السعيده
أفيش إضطراري لـ شر البليّه

قد يعجبك