ثقافة و فنسلايد

مجدي كامل: شقا العمر راح والعين شديدة وجاية في بيتي وأولادي

أسرة مجدي كامل

قال الفنان مجدي كامل أن ابنه عادل يمر بحالة نفسية سيئة، بسبب العديد من الأمور منها انتشار فيروس كورونا، وابتعاده عن لعب كرة القدم، ووفاة الشباب في سن صغير بدون مقدمات.

وتابع الفنان مجدي كامل خلال مداخلة هاتفية مع برنامج “التاسعة مساء”، الذي يقدمه الإعلامي وائل الإبراشي على التليفزيون المصري، الحياة متوقفة منذ عدة شهور، والدنيا بقت ضيقة أوي، وكترة الشباب اللي بيموت في سن صغير بدون مقدمات، الشباب بقى حاسس إن الدنيا صغيرة، وده ممكن يكون سبب كتابة البوست، وأنا علقت على البوست بتاعه قولتله إن شاء الله اللي جاي أحسن، والأيام دي مهما كانت صعبة وتقيلة هتعدي، قائلا: أيوه شقا العمر راح، بس الحمد لله قدر الله وما شاء فعل إحنا عايشين احسن من غيرنا مش عارف يعيش.

وأوضح مجدي كامل أن ابنه عادل تعرض خلال الفترة الماضية للعديد من المشاكل، حي وجه له النصيحة أن الإنسان هو من يصنع كل شيء، وأن القادم سيكون أفضل بإذن الله، قائلا: قولتله هترجع تلعب كرة تاني، ومش تسيب أي حاجة تهزمك، خدني أنا مثل لك، أنا مريت بأزمات كتير في مشواري الفني، بقوم وأقف وبكمل عادي مينفعش نستسلم.

إقرأ أيضا

انهيار مها أحمد من البكاء: محرومة ألمس ابني واتدمرت وهذا مرض ابنها

وقال مجدي أن الكثير من الشباب يعانون الفترة الحالية من حالة نفسية سيئة، ويكتبون العديد من المنشورات يتحدثون فيها عن الموت، قائلا: هما ممكن حاسين ان العمر قصير، خاصة بعد وفاة أصدقائهم فجأة بدون مقدمات، وده مأثر عليهم، بس إحنا بنقولهم لازم التفاؤل يكون موجود، وفي الأول والآخر الأعمار بيد الله.

وقال مجدي كامل أن المشاكل التي تواجه عائلته في الفترة الحالية بسبب الحسد، موضحا: احنا محسودين بسبب أحمد ابننا وهو حالة خاصة، معرفش إيه العين القوية والشديدة دي، وجاية في أولادي وجاية في بيتي، وطبعا الحسد مذكور في القرآن، انتوا شايفيني بضضحك وبهزر بس انتوا مش عارفين ايه اللي جوايا؟؟ ميغركوش المنظر.

مجدي كامل يوجه نصيحة للشباب

ووجه نصيحة للشباب قائلا، تفائل يا ابني واللي جاي أحسن وقولوا إن شاء الله وقرب نت ربنا، هتوصلوا وكل ما تقع قوم تاني وأقوى من الأول، وهتوصل لمشوارك حقق حلمك وحقق مشوارك، وبوجه كلامي ده لكل الشباب مش عادل ابني بس.

وانتشر خلال الفترة الماضية منشور لعادل مجدي كامل، كشف فيه عن مروره بحالة نفسية وصحية سيئة، قائلا: “أنا بكتب الكلام ده وأنا إيدي بتترعش وفعلا تعبان ومش قادر، ومش عارف أنا عندي إيه، ومش عارف أتكلم مع حد علشان مش عايز أخلي حد يشيل همي، بس أنا هكتب الكلام اللي عايز أكتبه ده علشان أنا مش عارف اللي جاي إيه ولا هيحصل إيه، أنا حياتي بايظة بقالها 4 شهور من يوم ١٥-٦ لحد النهاردة ١٥-١٠”.

وتابع “الأربعة شهور دول أوحش أربع شهور عدت عليا في حياتي، من يوم ما جيت الدنيا علشان حصلي فيهم حاجات وجعتني وتعبتني وأثرت على نفسيتي، أولهم كان أول حب في حياتي عاش لمدة سنة ونص وكان نهايته يوم ١٥-٦، بعدها كان وفاة حفناوي صاحبي وأخويا يمكن مكناش قريبين من بعض بس مجرد مبنتكلم مع بعض أو بنشوف بعض بيبقى أكننا نعرف بعض من الحضانة، وكان في ذكريات حلوة أوي لينا مع بعض”.

وأضاف عادل: “بعدها البيت بتاعنا لما غرق كله ولحد دلوقتي منعرفش غرق إزاي ولا إيه اللي حصل، بس الحمد لله على كل شيء ولحد دلوقتي البيت لسه بايظ، وآخرها بقى وده لسه من ٣ أيام إني تعبت جدا فجأة، وتعبت تعب مش عادي ومش عارف أنا عندي إيه ولا الدكاترة عارفين أنا عندي إيه، خدت جميع الأدوية وخدت حقن وبنام كويس وباكل كويس وبعمل كل حاجة وبرضه مفيش أي تحسن، أنا بكتب الكلام ده دلوقتي وأنا مش حابب كده خالص ولا كنت عايز أعمل كده بس عملت كده وكتبت كده وهنزله علشان أنا بجد خايف من اللي جاي ومش عارف إيه اللي ممكن يحصل”.

استكمل عادل في منشوره المطول “لو حصل حاجة أكون كتبت كل اللي جوايا وأكون ارتحت إني عملت كده، وعلشان برضه تكونوا عارفين إن الضحك والهزار والخروج والاستوريز مش دي الحياة الحقيقية، الحياة الحقيقية هي اللي أنا حكيتها دلوقتي، محدش يعرف أنت حياتك عاملة إزاي ولا إيه اللي بيحصل فيها ولا جواك إيه كله، شايفك في صور وفيديوهات مش حقيقية، المهم ربنا يستر في اللي جاي ويعدي على خير إن شاء الله علشان المرة دي أنا بجد حسيت بالموت، فلو عدت على خير حياة الواحد هتتغير تماماً في كل حاجة حتى في الصور والفيديوهات، آسف إني طولت عليكوا، يا رب أنت الشافي المعافي”.

أحمد سمير

أحمد سمير حاصل على بكالوريوس إعلام جامعة الأزهر .. أعمل بمجال الصحافة منذ عام 2015 .. عملت في موقع الشرقية توداي كمراسل صحفي .. وصحفي فيديو .. وحاليا محرر صحفي .. عاشق للتصوير والمونتاج والإخراج
زر الذهاب إلى الأعلى