أخبار الرياضة

مرتضى منصور يهاجم وزير الرياضة: والله ما عندك دم

منصور

كتب | شادي زعبل

«مرتضى» هي دي فلوسك يا خالد ؟ .. دي فلوس الأعضاء .. هو مجلس الإدارة طراطير؟.

»مرتضى» انا دخلت السجن 7 مرات مرة في ضرب وزير الداخلية، ومرة في ضرب سفير إسرائيلي وقلبي حديد.

«مرتضى»: يا خالد عبدالعزيز ياللي دخلت الأولتراس عشان يشتموا رئيس الجمهورية.

تداول عدد من رواد مواقع التواصل الاجتماعي، فيديو مسجل بصوت مرتضى منصور رئيس نادي الزمالك، تحت عنوان “تفاصيل وصلة الردح كاملة وسر مكالمة الأمن الوطني لمرتضي وتهديد وسب وزير الشباب والرياضة”.

وهاجم منصور، المهندس خالد عبدالعزيز وزير الشباب والرياضة، قائلا: “شوفوا حساب لنادي الزمالك يكون ممدوح عباس نسي يحط فلوس فيه، فوجدوا حساب بنك مصر فرع المهندسين، لو هو الموضوع عادي كانوا حطوا الفلوس في أي حساب ويتحجز عليها، لكن هو رئيس الوزراء خاف على فلوس النادي، وحافظ عليها، لما جت اللجنة هنا وكشفنا سرية الحسابات.. هاني ظاظا يستلم الفلوس الساعة 9 الصبح يوم واحد يناير، 9 وخمسة بيسلمها دولارات للنادي، محدش ليه عندنا حاجة، إحنا أشرف منهم كلهم، بدل ما نقول لهاني متشكرين على اللي أنت عملته لأ بهدلة ونيابة ويجي يقولك نشوف الحسابات، اتنين بيقولك هو إنت ليه محطتش الفلوس في البنك عشان تأخد الفايدة”.

وأضاف: “إنت عبيط يا ابني .. إذا كان الأصل محجوز عليه.. يعني هو هياخد الـ200 مليون ويقولي خد فايدة 300 ألف، إحنا هنهرج، إيت التسقيطة دي.. أنا اتفقت مع وزير المالية في حضور رئيس الوزراء، من حوالي 3 أشهر هدفع 3 ملايين وهقسط الباقي، وأستاذ خالد دفع 40 مليون، اتفقت مع الدكتور غادة والي 500 ألف أستاذ خالد اداها 10 مليون”.

وتساءل مرتضى منصور: “.. إحنا مش طراطير.. وجمعية عمومية محترمة لن تسمح بهذا الفساد.. هو حضرتك جاي تحافظ على أموال النادي، ولا جاي تبعتر أموال النادي، وبعدين إذا كانت الضرايب ليها فلوس، أنا عامل طعن مش تستنى الطعن، وبعدين اللي أهدر 984 مليون جنيه.. فين البلاغ مبيتحقش في هليه.. إنت جاي تحقق مع اللي وفر 200 مليون جنيه وسايب اللي أهدر مليار، رئيس الوزراء راجل محترم جابه وزير العدل محترم، وأنا بشكر الرقابة الإدارية بصراحة  وبشكر الأمن الوطني ناس محترمين جدا على اتصال بيا على مدار اليوم.. قالوا إنت راجل شريف ومحترم ومجلسك محترم.. خالد بيصدر مشكلة للدولة في وقت كلنا مش عاوزين نعمل مشكلة للراجل عشان الانتخابات .. عاوزين نلم.. عاوزين ننزل كلنا يومين الانتخابات ننتخب عشان نقول للعالم إن 30 يونيو و3 يوليو مكانش انقلاب زي ما بيقولوا الإخوان، لكن كانت ثورة شعبية حقيقية، في الوقت اللي إحنا بنعمل ده خالد اول امبارح كان قاعد في الماتش والاولتراس بيشتم رئيس الجمهورية وهو قاعد بيسقف وبيضحك.. الموضوع مش هيعدي.. دولة في دولة.. وأنا كلامي واضح.. إحنا قدامنا لحد السبت اللي بعد الجاي هنعمل الصفقة هي اللجنة لما جت كان الأخ مفهمهم إنه مفيش فلوس.. دخلوا لاقوا 155 مليون جنيه كاش.. أنا أشكر إني حافظت عليهم.. دي فلوسكم .. كان ممكن حد دخل سرق.. وأنا تحملت المسؤولية، وجت اللجنة خدت الـ155 مليون جنيه بحراسة أمن مركزي وقنابل، وأنا من غير قنابل ولا أمن مركزي حافظت عليهم.. يبقى ده جزائي؟”.

وتابع منصور: “ده غير الـ40 مليون اللي اتدفعوا في الصفقة، و10 مليون خدهم الشناوي، و7 أو 8 مليون جنيه خدهم الأخ طارق.. خلاص كده مش هعرف إجيب لاعيبة .. أجيب منين وأفرح الجماهير منين؟”

وواصل كلامه: “هو انا النهاردة مش دخلت مع النادي الأهلي في صفقات كتيرة وكسبتها منه .. كسبتها ليه ؟ عشان أنا كان عندي فلوس، فلوسكم .. هو مش أبو تريكة ده وبركات كانوا جايين الزمالك، انا مكانش عندي فلوس، هما كانوا عندهم فلوس فجابوا اللاعيبة اللى تاخد  بطولات وتفرح الجماهير..  إحنا عاوزين نفرح الجماهير وفي نفس الوقت الأعضاء يبقوا قاعدين بيجوا خميس وجمعة يبقوا مستمتعين بناديهم”.

وقال منفعلا رئيس نادي الزمالك: “إيه الغم والهم.. إهي اللى يجبرني أن انا اقعد في الارف ده.. إيه اللي يجبرني يا خالد، اللي يتبرع بـ18 مليون جنيه جايين له هدية شخصية لصالح النادي ايه اللى يجبره، وجايب لي لجنة وخدتوا كام انهاردة.. ودفعتوا كام انهاردة .. وعمال توزع أموال النادي.. هو حضرتك ليك صفة إنك تدي ده 40 مليون.. هو انت ناسي حضرتك إن البنوك اللي بتصرف دي انا مفوض نائب رئيس النادي وامين الصندوق هما اللي بيطلعوا الشيكات.. حضرتك بأي صفة.. حتى اللجنة اللى انت عاملها دي بتقول بتراقب ماليا مش بتتصرف ماليا، وهقولك تاني لفق كما تشاء، ومرة في زكريا عزمي، انا قلبي حديد يا خالد، انا قلبي حديد مبخافش.. لفق كما تشاء وسلط اللى هتسلطه.. في النهاية في جمعية عمومية 27 ألف صوت قالوا مرتضى، وعشان كده استقالتنا هتتعرض على الجمعية العمومية، ولما يتخرب النادي يجوا لك يقولوا لك مفيش حنفية في النادي، الكراسي اتكسرت زي ايام ممدوح عباس، انتوا عارفين مديونية ممدوح عباس جت ازاي.. ممدوح عباس رئيس النادي بيدي شيك لممدوح عباس المواطن، أول مرة أشوف الكلام ده”.

وتابع: “لا تاريخ ولا قرار مجلس ادارة كلها اضربت بعد ما مشي.. وتستقبله في مكتبك يا خالد يقول الادارة السيئة لمرتضى منصور للنادي وطهروا النادي من مرتضى.. انا ادارة سيئة والله ما عندك دم .. والمصحف ما عندك دم .. يا راجل ده انت عندك مليار وبلاغ من ممدوح عباس يتحقق فيه في 24 ساعة في النيابة، وبلاغ من الجهاز المركزي للمحاسبات ميتحققش، برغم انها جهة رقابية وهو اصلا مش عضو عندي، انا حزين وبقولكم احنا تحملنا الاسبوعين اللى فاتوا ما هو فوق طاقة البشر.. وانا عندي اسرة بتقولي إيه اللى يخليك تتحمل .. انت مستفيد ايه.. وبعدين الناس منتخبني عشان احضر الماتش واسقف واروح، ولا عشان ادير النادي، انا مش طرطور يا خالد.. خد لجنتك وروح.. ده انا مانع الموظفين والفرق الرياضية من الاضراب عشان الوطن مش عشانك لانهم لو اضربوا النادي هيخرب يا خالد.. فوق يا خالد.. ده نادي الزمالك يا خالد.. وده مرتضى منصور اللى كنت بتشكر فيه وتقول للناس تعالوا شوفوا الراجل عامل صرح مش معمول عامل نادي عالمي،

وأضاف: “معادنا السبت بعد الجاي .. اللجنة لو قعدت احنا اللى هنمشي، بالنسبة للي حصل من الاولتراس اول امبارح والاجرام اللى عملوا وشتيمة الجيش والشرطة اللى بيحمونا بجد.. قعدوا يشتموا الجيش والشرطة ورئيس الجمهورية في وجود خالد.. عشان كده إحنا قررنا الماتش الجاي بتاع إفيقيا هيبقى في السويس مش هيبقى في جماهير.. مش هجيب ناس تشتم وتقل أدبها على بلدي”.

وقال رئيس نادي الزمالك: “الـ5 آلاف هيحضروا الماتش هيطلعوا يلاقوا الاتوبيسات جوا الاستاد هيوصلهم لحد هنا كلهم من أعضاء وعضوات النادي الناس اللى تشرفنا”.

ووجه تنبيه لوزير الشباب والرياضة، قائلا: “أوعى تفتكر يا خالد ان النادي هيقع في يوم من الايام.. انت متعظتش من حسن صقر، حل مجلس إدارتي وجاب ممدوع عباس 5 سنين بالتعيين و4 سنين بالتزوير، ونادي الزمالك باقي وحسن صقر في مزبلة التاريخ، ميقدرش يطلع من بيته، بعد ما دمر النادي 9 سنين، ومرتضى منصور الى شطبه حسن صقر وممدوح عباس رجع تاني رئيس النادي بأكبر جمعية عمومية”.

https://youtu.be/wo7Vwya1BtI

shady zaabl

كاتب صحفي مصري مهتم بالمواقع الإلكترونية وإدارتها وكتابة المقالات في جميع الأقسام وذو خبرة في الصحافة والإعلام والمحتوى لـ 5 سنوات وفقً لدراسة أكاديمية وتطبيق عملي .
زر الذهاب إلى الأعلى