السبت 11 شعبان 1441 الموافق 04 أبريل 2020
تابع احصائيات فيروس كورونا حول العالم لحظة بلحظة (تحديث مباشر)
الرئيسية » مقالات » مقالات القراء » مقالات القراء | محمود سعيد يكتب : رئيس جمهورية مصر العربية … Add Friend

مقالات القراء | محمود سعيد يكتب : رئيس جمهورية مصر العربية … Add Friend


الصراحة يا جماعة انا قررت انهارده اننا نحلم كالعادة، نحلم برئيس مصر الجاي، واحنا اساساً كشعب عربي ويمكن كبشر عموماً
مبنبطلش نحلم بشخصية “المخلــّص”، اللى هو شخص ييجيلنا فيبدّل الظلم عدل ويبدّل الضلمة نور.

بداية أنا مش عاوز رئيس محترم، أنا عاوز رئيس صايع، طبعا مش بالمعني الحرفي للكلمة، أنا اقصد المعني الدارج، شخصية عفوية، ذكي، يعامل المحترمين بإحترام ويشيلهم فوق راسه، أما النصابيين والفاسدين والحراميه فيعاملهم بمنتهي الحزم، محدش يعرف يحطّه في جيبه ويمشّيه وراه، جريء، مؤمن بحق الإيمان مش مجرد كلام، يفضل في صف الحق ويعرف أن ربنا هيحفظه طول ما هو حقاني، يحس بالفقراء والمحتاجين والغلابة، على رأى راجل طيب قاللى كلمه قبل كده هفضل فاكرها طول عمري، قاللى “يبني لو الرئيس الجديد ده راضى الغلابة ومخفش غير من ربنا .. لو انضرب عليه ميت رصاصة مش هيصيبه منهم والا واحده”.

 

رئيس يكون قريّب، مش محاوط نفسه بألف سور، رئيس وقت ما نعوزه نلاقيه، تخيلوا مثلا لو الرئيس له أكونت ع الفيس وبيكلم الناس من عليه (:D:D) ، وتلاقيه هو اللى باعتلك إضافة كمان (من أول هنا هنبدأ تهييس) ، وتخش آخر النهار تكلمه ع الخاص تكتب له “مريسة، أخبارك إيه”، “يقولك تسلم يا معلم الحمد لله كله تمام”، تقوله “كنت برنس انهارده في مؤتمر القمة العربية، والله كلمتين زي الفل”، يقولك “يا عمنا انا قلت اللى يرضي ضميرى ويخلّص ذمتى من ربنا”..

 

تفتكروا هيكون عنده كام صديق؟… هتبقي مشكلة ع الفيس… لا وإيه والبنات تعمله تاج في صور “مهند وسمر”، والولاد يضيفوه في جروبات الأهلي والزمالك ، ويخش يعمل “لايك” على إستيتس إنت كاتبها ويكومنت كمان (:D:D).

 

أهم من كل الصفات دي انه يكون له مجلس مستشارين محترم ويأخد رأى الناس في كل صغيرة وكبيرة، لأننا سبب تخلفنا أساسا هو “حكم الفرد”، و”حاشية السوء” ده مش للرئيس بس ده على كل المستويات.

 

من الآخر رئيس يعدي علينا ونعزمه علي شاي بجد، مش يمثل علينا زي اللى قبله.

 

“ربنا إجعل عملنا كله خالصاً لوجهك الكريم، ولا تجعل لإحدٍ غيرك فيه شيئ”

وتبقين يا بلادي في دمي.

( جميع ما ينشر على الموقع من مقالات القراء تعبر عن رأي صاحبها ولا تعبر عن رأي الموقع ))

عن Eman Salem

كاتب صحفي ورئيس تحرير موقع الشرقية توداي

قد يعجبك