المطبخ الشرقاوي

مينو افطار 22 رمضان

افطار 22 رمضان

مينو إفطار 22 رمضان ” شوربة طماطم ، كانيلونى باللحمة المفرومة ، كانيلونى باللحمة المفرومة ”

-مقادير شوربة الطماطم : 

-2 عدد ورق لورا
-1 عدد مكعب مرقة دجاج
-1 معلقة كبيرة دقيق
-1 معلقة صغيرة سكر
-1 معلقة كبيرة زبدة
-1 معلقة كبيرة كريمة لبّاني
-1 عدد بصلة (مفرومة خشن)
-1 معلقة كبيرة خل
-½ معلقة صغيرة ملح
-½ معلقة صغيرة فلفل اسود مطحون
-½ كيلو طماطم

طريقة التحضير :

هنغسل الطماطم ونضربها فى الخلاط كويس ونسيبها على جنب.

فى حلة على نار متوسطة هنضيف الزبدة ونقلب فيها البصل ومكعب مرقة الدجاج وورق اللورا لحد ما البصل يدبل.

هنضيف الدقيق ونقلب كويس جدا ، و هنضيف الملح والفلفل والسكر ونقلب كويس جدا.

هنضيف عصير الطماطم والخل ونستمر فى التقليب ونسيب الشوربة تغلى لمدة 3 دقائق.

هنرفع الشوربة من على النار ونهرسها كويس بخلاط يدوي وهنضيف الكريمة اللبانى على الوش وبالهنا والشفا.

المقادير :

-1 عدد علبة عجينة كانيلونى جاهزة
-¼ كوب (240 مللى) جبنة بارميزان (مبشورة)

مقادير صوص البشاميل :

-4 معلقة كبيرة دقيق
-4 معلقة كبيرة زبدة (مكعبات)
-2 معلقة كبيرة زعتر (فريش)
-2 عدد ورق لورا
-1 معلقة صغيرة ملح
-1 لتر لبن كامل الدسم
-1 عدد حباية جزر (مقطعة لقطع كبيرة)
-1 عدد بصلة (مقطعة لقطع كبيرة)
-½ معلقة صغيرة حباية جوزة الطيب (مبشورة)

مقادير تعصيج اللحمة المفرومة :

-2 معلقة كبيرة سمن (أو زيت)
-1 معلقة صغيرة زعتر (اختيارى)
-1 عدد فص ثوم (مفروم)
-1 معلقة صغيرة بهارات لحمة
-1 معلقة صغيرة فلفل اسود مطحون
-1 معلقة صغيرة ملح
-1 عدد بصلة
-½ معلقة صغيرة قرفة (اختيارى)
-½ كيلو لحمة مفرومة

الطريقة :

هنحضر البشاميل بس يكون خفيف القوام.

فى حلة على النار هنضيف اللبن والجزر والبصل واللورا والزعتر ونسيبه يغلى وبعدين نصفيه من المكونات ونسيبه يبرد.

فى حلة على النار هنسيح الزبدة ونضيف الدقيق ونقلب كويس لحد ما الخليط يتجانس.
هنضيف اللبن تدريجيا على الزبدة والدقيق ونقلب كويس وبسرعة لحد ما قوام الصوص يتماسك ويبدأ يغلى وبكده يبقى الباشاميل جاهز.

هنحضر اللحمة المفرومة :

هنقطع البصلة مكعبات صغيرة.

فى حلة على نار متوسطة هنضيف معلقتين سمنة ونضيف البصل ونقلبه كويس لحد ما يتحول للون الذهبى.

هنضيف فص الثوم المفروم ونقلب كويس.

هنوطى النار ونضيف اللحمة ونفتتها كويس بمعلقة خشب.

هنضيف البهارات ونقلب كويس لحد ما اللحمة يبقى لونها بنى فاتح.

هنسيب اللحمة على نار هادية وهنقلبها كل شوية لحد ما تنزل ميتها وتشربها تانى.
قبل ما نحشى عجينى الكانيلونى لازم نتأكد ان اللحمة المفرومة بردت لأنها لو سخنة هتبوظ العجينة.

هنجيب الصينية البايركس ونضيف شوية بشاميل وبعدين هنبدأ نحشى العجينة, هنسدها من ناحية بإدينا من تحت ونحشيها باللحمة المفرومة باستخدام معلقة صغيرة لحد ما نملاها وبعدين نرصها فى الصينية.

بعد ما نرص كمية الكانيلونى كلها هنضيف باقى البشاميل فوق الكانيلونى وبعدين نضيف الجبنة المبشورة.

هندخل الصينية الفرن على درجة حرارة 180 لمدة 20 دقيقة .

مقادير القطايف بالقشطة : 

-3  كوب (240 مللى) ماء
– 1x كوب (140 جرام) دقيق
-1  معلقة كبيرة خميرة
-½  كوب (140 جرام) سميد (ناعم)
– ½  معلقة صغيرة باكينج بودر

طريقة التحضير : 

أول حاجة هنخلط الدقيق والسميد والخميرة والباكينج بودر مع بعض كويس جدا والأفضل ننخلهم، بعد كده هنضيف كوب ماء ونقلب كويس جدا وبعدين نضيف كوب تانى ونقلب وبعد كده هنضيف أخر كوب ونقلب كويس ، بعد كده هنغطى البولة ونسيبها ساعة علشان العجينة تخمر.

هنسخن طاسة على النار وهنصب عليها العجين بأى معيار على حسب المقاس اللى عايزينه ، اول ما يظهر على العجين فقاقيع كتير واللمعة بتاعته تروح كده تبقى القطايف استوت.

تترك  القطايف على صينية تبرد وبعد كده هنحشيها بالقشطة وهنقفلها بالضغط على الأطراف وممكن نرش عليها فستق مبشور وعسل وبكده تبقى جاهزة للتقديم.

اسرة الشرقية توداي تتمني لكم صوما مقبولا

زر الذهاب إلى الأعلى