كتبت الأستاذة هبة العدوى على صفحتها على «فيس بوك» ما يلى:
تخيل إنك النهارده 6 أكتوبر 1973.. ليلة النصر العظيم.. جنودنا قلوبهم مليانة قوة وحماس.. عدونا واحد زى ما ربنا واحد.. إيدينا فى إيدين بعض.. عقولنا مركزة على الهدف..
الله أكبر ده هتافنا اللى بنّادى بيه.. هتاف واحد.. كلنا روح واحدة.. قلب واحد.. إحساس واحد.. يا نعيش أحرار شجعان أراضينا حرة أبية.. كرامتنا مصانة.. يا نموت ونستشهد.. الأجيال الجاية تقدر تعيش حرة..
الأجيال الجاية تقدر تقول أجدادنا عظماء..
بيخوّفونا.. بيقولوا لنا عملنا سد منيع!!! خط بارليف!!!
المصرى رفض الفكرة.. فكّر برّه الصندوق واخترعوا خراطيم المياه.. اللى بيها حطموا خط بارليف..
أرجع بالزمن للنهارده 6 أكتوبر 2015.. تفتكروا نصر النهارده حيتم إزاى؟؟ مش بسألك على مستوى الدولة.. لأ.. على مستوى تفكيرك انت وأنا؟؟
تفتكر النهارده خط بارليف هو إيه؟؟.. اللى محتاج شجاعتك وهمتك وقدرتك على الابتكار يا مصرى يا أصيل؟؟
مممم!!!
خط بارليف النهارده.. مش خط واحد.. ده خطوط وحدود حطيناها بينا..
#خط – بارليف – النهارده – هو – السدود – و – الخناقات – اللى – بيننا
اللى اتحطت على مدى عقود بيننا.. خوّفوك من كل إنسان مختلف.. علموك إن الاختلاف نقمة.. جرّفوا تربة أخلاقنا.. فغابت قيمنا المشتركة..
والنهارده.. إيه رأيك؟؟
لو عبرنا عبور تانى.. عبور من نوع جديد.. تحطيم لكل الحدود اللى بيننا.. تعالى نستبعد من اللعبة كل فاسد أو مجرم.. علشان نبتدى على نضافة.. إنما.. إحنا..
أخوك اللى اتخانقت معاه من سنتين.. جارك، صاحبك.. اللى قاطعته لما اتناقشتم على تجارة الدين أو الفاسدين.. أبوك اللى عيّط على نظام قديم.. جوزك اللى اختلف معاكى.. مراتك اللى فوجئت بآرائها اللى انت رافضها..
إيه رأيكم لو؟؟؟
افترضتنا حسن النوايا فى كل الناس.. حتى يثبت العكس بالدليل الملموس.
سمعنا لكل فكرة جديدة مختلفة على إنها فرصة نتعلم منها..
حطيت نفسك مكان الناس.. بالطريقة اللى عاشوا بيها.. بظروف حياتهم اللى مروا بيها.
قبل ما تحكم.. طلبت توضيح أكتر من الناس.. وقبل ما تبلوك حد من حياتك.. وضحت له أكتر عن رأيك ووجهة نظرك؟..
بصيت من منظور مختلف.. شفت بيه الرأى المختلف. هاا شفته.. اعذره..
حلمت أحلام كبيرة.. زى اتحادنا على قيمنا النبيلة الأصيلة كمصريين.. وبقيت قادر تشوف إنها مهما كانت مستحيلة رب العالمين مع الجماعة.. حيوصلك أكيد لتحقيقها بصبرك عليها.
بذلنا مجهود علشان ننفتح على بعض أكتر.. نفهم بعض أكتر.. نشجع بعض.. كل واحد يقول رأيه.. ونحترم الاختلاف فى الرؤى ده بيننا..
كُبرنا من نجاحاتنا.. وكُبرنا من نجاحات الآخرين اللى حوالينا..
صفقنا للعمل الجماعى قد تصفيقنا للعمل الفردى.
فتحنا عقولنا..
شجعنا بعض على إننا نحطم السدود اللى بيينا..
بقى كل واحد فينا مبادر إنه يبتدى مهما كان اللى أُدامه شايفه غلط أو شايفه ظلمه..
ماذا لو قدرنا نشوف بعض كبنى آدمين.. أيوه..
أنا وأنت بنى آدمين ربنا خلقنا علشان نتكاتف مع بعض.. كتفى ف كتفك.. وكتفك ف كتفى..
حلمنا واحد.. فى وطن واحد.. لينا رب واحد..
مين يقدر يحطم خط بارليف 2015؟؟
والله كلنا نقدر..
بسم الله الرحمن الرحيم
«مَنْ عَمِلَ صَالِحًا مِّن ذَكَرٍ أَوْ أُنثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُم بِأَحْسَنِ مَا كَانُوا يَعْمَلُونَ» النحل (97) صدق الله العظيم.
المصدر
تابع الشرقية توداي على جوجل نيوز 
