اعتقد ان التواصل بالشكل ده منقدرش نقول عليه حب لأنكم متعرفوش بعض بشكل حقيقي و كل شخص فيكم حريص انه
يظهر افضل ما عنده خلال كلامكم.. بلاش نبني توقعات من الهواء
بقول الكلام ده لان ناس كتير للاسف تعبت بسبب كده ، من خلال عشرات الجلسات اللي عملتها مع شخصيات تعرضوا لموقف زي كده ،، في الغالب البنات بتكون واخده الموضوع بجد اكتر مِن الولاد .. في الوقت اللي الولد فيه بيكلمك بيكون علي تواصل مع اكتر من بنت غيرك .. بقول كده نتيجة للي سمعته من شخصيات حصل معاها كده
اتكلمت مع ولاد كتير في النقطة دي .. العظم بيعتبر انه تسليه و هزار و ان مفيش علاقات حقيقية ممكن تتبني من مجرد شات علي الفيس ، حتي لو البعض حصل و اتعرفوا و بعد كده حصل زواج بنهم منقدرش نعتبر ده نموذج
لان في النهاية مفيش حد شايف الثاني .. معظم الناس اللي بتعمل كده بتبقي في حياتها فاقده الاهتمام و الاحتواء من اهلها .
الفراغ عامل مهم جدا و القاعدة علي الفيس كده بتخليك تسرح و تفكر في اي حاجة تسلي وقتك و ممكن الحاجة دي للاسف تلبسك في الحيط بعد كده ، شغلوا عقلكم لان حياتكم اهم من انها تكون بالنسبه لغيركم تضيع وقت
حافظوا علي قلوبكم لانها لما تنجرح محدش هيحس بيها قدكم
حبيت أشارك معاكم الموضوع لان ًاكيد البنات اللي اشتكت من ده فيه زيهم كتير للاسف و مكسوف يتكلم و يعبر عّن التعب اللي جواه
في النهاية
عارف ان بعض الناس هيكون عندها راي مختلف عّن اللي وضحته المهم ، مفيش راي حقيقي و راي مش حقيقي
كلها تجارب شخصية و انا حبيت انقلكم تجارب عشرات من البنات اللي انخدعت في علاقات النت .. شاركوا الكلام مع صحابكم مهم اننا نوعي بعض
تابع الشرقية توداي على جوجل نيوز 
