رغم شهرة موظفينا في الحكومة بالبرود و بمعنى أكثر دقة التنبلة
الا اني تعايشت مع الموقف ده عن قرب
في يوم كنت في مستشفى حكومي من روائع الزقازيق
وانا في نظري هي المكان الوحيد الي لو حد فيكم لا قدر الله زهقان من عيشته و حاسس انه مش عايش
يروح يقعد هناك في اي صالة انتظار لمدة ساعة بس هيعرف ان هو عايش ملك مهما كان وصف حياته
كان في قدامي أب و أم و شايلين إبنهم و بيكلمو دكتور غالبا هو المسئول عن حالة الطفل
المهم من سياق الكلام الطفل ده كان مفروض منتظر دورة في عملية
و بيعملو تحليل علشان يعرفو نسب حاجات انا مفهمتهاش بصراحة
و المهم ان النسب دي طلعت ان الطفل مينفعش يعمل العملية دي دلوقتي
فلما الاب و الام قالو للدكتورة الي كانت ساعتها هناك في المستشفى طيب نعمل ايه بكل ثقة قالت ليهم قدمو ورقة التحليل الي قبل الأخيرة كانت النسب فيها مظبوطة علشان الدكتور يوافق على العملية و واضح كمان انها اتكلمت معاهم باسلوب سخيف
فالاب و الام بيشتكو للدكتور المسئول الي هو رئيس الدكتورة دي
بيقولولو احنا كنا هنقدم فيها شكوى و ازاي تكلمنا باسلوب زي ده حرام عليها هي بتستغل اننا مش فاهمين حاجه
و مش راضية تفهمنا و بتقولنا قدمو الورق القديم
و شوية ام الطفل عيطت قالتله هي عايزة تموت الولد ولا ايه يا دكتور ده هو الي حيليتنا في الدنيا
الدكتور بلا مبالاه مذهلة قالها لا ازاي تقولي كده انا هكلمها و اشوف الموقف ايه ” هو حتى مكنش باصص للاب و الام”
و بعدين قالهم روحو المعمل كملو التحاليل
و هو جه على مكتب جمبي كده و اتصل بالدكتورة دي بيقولها تيجي علشان يشوف عاملة مشاكل ليه
أنا قلت هيشدها و يظبطها بكلمتين
الفكرة اني مفهمتش حاجه من المصطلحات الطبية الي اتقالت نهائي و انها شافت ان تغير النسب ده مش طبيعي في فترة قصيرة و الاعجب انها قالتله ما انت عارف يا دكتور نتايج المعمل مش دايما مظبوطة
انا قلت في عقلي من جوة ” يا رااااااااااااااااااااااجل”
كل ده محرقش دمي لسه الي جاي هو الي وجعني
قالها أهو انتي كده شيلتي نفسك الغلط لان هو بقى مسك في نقطة هشتيكيكم و هعمل فيكو و ايه يا ستي هيتهمنا اننا عايزين نموت الولد و هو عارف هيلعبها إزاي و هيقول ايه
قالتله يا دكتور ما انت عارف كده كده في نسبة كبيرة الولد يموت
” تقريبا الولد مصاب بلوكيميا ” ده كان الي فهمته من سياق الكلام
قالها ميمنعش خدي بالك من كلامك مش ناقصين صداع و كلمي المعمل شوفي ايه نوع النتيجة دي انا بعته هناك خليهم يجيبو نتايج صح
” يا رااااااااااجل “
انا لو لا قدر الله تعبت ولا حصلي حاجه هروح لدكتور معرفة يكون عارف معمل تحاليل كويس يوصي على النتيجة بتاعة التحاليل هناك
ده موقف اكتشفت فيه ان بعض الدكاترة و الممرضات أصابهم البرود نتيجة التعامل المستمر مع الموت و المرضى لدرجة إنهم مبقوش يتأثرو بأي شيئ
في الاستقبال ناس بتقابل الحوادث ببرود رهيب و فين لما يجيبو الدكتور و فين لما يكشف
مشكله لو كانت دي ظاهرة حتى لو الطفل ده بيموت
من باب الانسانية حتى متعاطفش مع أهله على الاقل
طيب ده موقف
التاني هو اني كنت على طريق القاهرة الصحراوي و بعدين على مدد البصر بعد الكارته كان في مجموعة قطاع طرق شغالين بهمة و ضمير بصراحة بيقلبو فلوس و موبايلات من العربيات
الكلام ده كان 7 و نص الصبح وواضح انهم شغالين من الفجر مش مقصرين
السواق الي كان معايا لف قبل ما يوصلهم و رجع بسرعه للبوكس و الظابط الي قبل الكارته
قاله يا باشا الحق في قدام ناس بتعمل كذا كذا كذا
بصراحة كتر خيره أعطانا اجابة مبهرة
قاله أتصل بالنجدة
بردو كنت عايزة أقولو ” يا راااااااااااااااااجل على أساس انك واقف هنا شرطة مدرسية؟ “
السواق قاله يا باشا انت لو كلمتهم هيسمعو منك مش انت بردو معاك لاسلكي اطلبهم هيجو بسرعة إحنا النجده مش بترد علينا ” و دي السيد وزير الداخلية يشهد لينا فيها بصراحة بعد ما جربها بنفسه مؤخرا”
قاله متوقفش الطريق ” مع ان محدش كان ورانا” جرب و إتصل بالنجدة خليك وراهم
خدتو بالكو إننا كشعب إتعودنا على المصايب و البلاوي المتتالية
الضرب في ميدان التحرير و ماسبيرو و الماتشات و حادثة بورسعيد
و لحد دلوقتي مخدناش نتيجة تحقيق واحد فيهم غير قضايا القبض على نشطاء معترضين على المجلس العسكري و المشير
خدتو بالكم ان كل القضايا الي في صالح المجلس العسكري من النشطاء دول لقضايا تمويل الجمعيات بيتم التحقيق فيها سريعا و إظهار نتائح فورية ماشاء الله و ماله مش عيب
و اي قضايا تتعلق برموز الفساد الي كلنا عارفينهم أو قضية قناص العيون الي اتجدد فيها الحبس على ذمة التحقيق لمدة 15 يوم للمرة السادسة على التوالي الخبر ابهرني في النشرة امال لو مكنتش قضية مهمة كانت قعدت مدة قد ايه؟!! ولا صحيح ما هو مجاش على المجلس العسكري و المشير
فين قضايا تجاوزات المجلس و السحل و الضرب الي العالم كله شافها
الناس الي ماتت اعتبروهم شهداء و اهاليهم اتكرمو في حين ان المجلس مصمم انه لم يتم اطلاق رصاصة واحده
طيب مأطلقتوش رصاص يعني دول مش شهداء طيب بتصرفلهم ليه مثلا؟؟!!! لا هو ضحك على الدقون
الشباب الي اتحاكمو عسكري وفوري في غير قضايا البلطجة الي بيقولو عليها و الي في جلسه واحده اخدو 15 سنة سجن
و منهم كتير اتاخد غلط و مش عارف هو هناك ليه
دول يعني علشان العروض الخاصه في اي اعياد رسمية يفرجو عن كام واحد كده من باب البققشيش على الشعب مثلا
و غيرها من تجاوزات و مشاكل لا حصر لها و الاغرب ان مفيش نتيجة و اي حد بيقول فين كشف الحساب يبقى عميل
حقانيين قوي و ضميرهم زي اللحمة الجملي العجوزة كمان وادي دقني لو استوت اللحمة
حتى في التحقيق مفيش عدل و مساواه و لو حتى مساواة في الظلم
هما عايزينا ننسى ولا نتعود
ولا عايزينا نتكيف و نسلم بالامر الواقع الي هو ميختلفش عن وضع النظام السابق غير في الاسم
الفكرة
انا مش هافقد انسانيتي و هفضل اتعاطف مع الناس و احس بيهم
انا مش هيأس و هسلم للأمر الواقع و هفضل أعترض على الوضع الحالي
هفضل طموحة و هطمن كل الي حوليا ان الي جاي أفضل كتير
هفضل أستنى اليوم الي الحكم فيه يتنقل من العسكر لاننا تعبنا منهم بقى
متسكتوش على أي وضع سلبي و تتقبلوه مهما كان ايه هو اعترضو و دايما حسسو الغلط ان هو غلط حتى لو كنت واحد بس ماشي في اتجاهك الصح و كل الي حوليك مخالفين
متنيموش ضميركم و تسيبوهم يرجعونا للي كنا فيه زمان
متنسوش حقكم و حق اي حد يخصكم تابعوه و اندهو بيه
اعترضو عليهم و عرفوهم انكو بتفهمو مش منساقين و خلاص و متخلوش حد ياخد قرار باسمكم انتو مش مقتنعين بيه بحجة انكو مش هتفهمو حتى لو القرار ده لمصلحة الاغلبية بس أكون فاهم و عارف و مقتنع
و الاهم من كل ده لما تشوف العينة أبطال القصتين الي فوق متقولهومش غير كلمة واحده بس
إتــــــــــــــــق الــــــــلــــــــــــــه
بقلم : نهى مشهور
(( جميع ما ينشر على الموقع من مقالات القراء تعبر عن رأي صاحبها ولا تعبر عن رأي الموقع ))
تابع الشرقية توداي على جوجل نيوز 
