الموضوع موجه قلبا و قالبا و ضمنا و موضوع للرجال
في يوم ممكن تكون مستني مقابلة مهمة جدا
سواء كانت رسمية او مش رسمية
نبتدي بالرسمي
هتفكر طبعا ان الموضوع لازم يكون فيه بدلة
و للأسف هتخنق نفسك بكرافات بس كله يهون مقابل اني أكون مالي مركزي
من قبلها بليلة لازم تكون الجزمة متلمعه و مراية
مممممم هستخدم البرفان ده لانه نفاذ و بيدي ثقة و انطباع كويس كتير قالولي ريحته فعلا مميزة
طيب البس ساعه ولا مش مهم
طيب الواحد لازم يخرج بدري علشان متأخرش بردو و اصحى بدري افوق كده علشان أكون في كامل تركيزي
المقابلة الرسمي دي تشمل مقابلة شغل
ولا يمكن ترقية او ربنا كرمك و رايح تتقدم و تكمل نص دينك
ولا يمكن رايح تحضر فرح في فندق 5 نجوم الواحد لازم يكون على المستوى
طيب مقابلة غير رسمية
زي الفل هما اصحابي مننا و علينا عادي ممكن البس اي حاجه
بس احنا رايحين النهارده نسهر في مكان فخم شويتين
يمكن ندخل سينيما من الغالية شوية دي الي التذكرة ب 70 جنيه
” اه في سينيما التذكرة ب 70 جنيه ”
التيشيرت ده على البنطلون دول زي الفل
يا سلام لو لقيت كوتشي يكون مريح كده و في اللون ده هينطق
المقابلة الغير رسمي دي تشمل الصحاب
و طبعا الاهتمام الزايد ممكن يكون لأغراض تانية
نعمل نفسنا مش عارفينها بردو الواحد بيتشيك فيها اوي
من الاخر الحتة الي على الحبل بتطلع في الحالتين
لحد هنا اغلبنا متفق و مفيش اعتراضات
لو قلتلك انك عندك مقابلة مهمة جدا بتتكرر كل اسبوع مرة واحدة بس
هي مرة لا أكتر ولا أقل
بس مش هقولك رسمي ولا غير رسمي
هي فرض
لا هتقف قدام صاحبك ولا مديرك ولا أسباب أخري
انت هتقف في حضرة الله سبحانة و تعالى
صلاة الجمعة
يعني صاحبك ولا مديرك ولا الفرح
ايه زاد أهميتهم عن مقابلة و الوقوف في حضرة الخالق علشان اصحى من بدري
وو البس احلى حاجه و اتعطر و اتشيك
و لما أجي أنزل صلاة الجمعة الاقي ناس نازلة بالبيجامات و بنطلون ترينج و عليه أي تيشرت متعلق في الشماعة
و شبشب الخروج السريع ده و يمكن شبشب الحمام كمان
ولو ان ماما هتزعق لو دخلت بيه على السجاد بيبهدل الدنيا تراب
لحقت أسرح قشطة ملحقتش و انا بتدحرج على السلم كده بايدي أنيم الكنيش الي فوق ده
اصلا الناس ابتدت تصلي
يا رب الاقي حته مفروشة برة الجامع و تكون ضلة الشمس حامية نار
بتروح تجري تقف في اي صف موجود و هوب الله أكبر
و انت أصلا مش شايف قدامك يمكن اساسا يكونو مقومينك من النوم بعد ما الحاجه الله يكرمها تزعق و تقولك انا مش هفضل أصحي فيك طول اليوم الاقامة التانية خلصت و الناس هتصلي و انت نايم
أبوك لو جه لقاك نايم هيطين عيشتك
تصدقو ان في ناس بتجري علشان خايفة الحاج أبوها يرجع يلاقيهم مراحوش صلاة الجمعة فيتعاقبو
و ممكن بعد الصلاة الشلة بتاعته يروحو يفطرو في أي مكان عربية فول ولا حاجه
دي الميزة ان بعد الصلاة هقابل العالم الضايعة دي و نضحك حبة و نقعد في اي حته كده بالعار الي لابسينه ده لحد معاد الغدا
معتقدش ان في حد ممكن ميكونش فهم الرسالة المطلوبة
جلابية بيضا حلوة فيها وقار أصل عربي و اسلامي و مش متعبة خالص على فكرة
نفس البرفان الحلو ده
أصحى بدري نص ساعة كده إتهيأ ان في الصلاة دي أن بكون واقف بين يدي الله
ده انت بتقعد في اي مقابلة شغل بتصب عرق و تتوتر
جبت البرود ده منين و انت واقف في حضرة الخالق؟؟؟؟
الرسالة دي للبعض و ليست للكل في ناس بيعتبرو صلاة الجمعة حدث رائع
مش شكلا بس علشان الناس و لكن روحيا
أتمنى من كل الي يقرا الموضوع ده يفكر دقايق مش أكتر و يقيم نفسة
بقلم | نهي مشهور
المصدر | الشرقية توداي
تابع الشرقية توداي على جوجل نيوز 
