في الحقيقة الخوف بيقتل جواك مساحة الاختيار بيخليك إنسان متردد مش قادر يأخذ قرار بتهرب من كل اللي حواليك و أحياناً من نفسك.
طيب نعمل إيه بقي ؟.
علشان تسيطر علي الخوف ده محتاج تجرب و تقول لنفسك هيحصل إيه لما أعملها، محتاج تخرج من «comfort zone» لأن الراحة الحقيقية في الخروج و التعامل مع الواقع و ليس الواقع اللي بتحاول تبنيه في خيالك بأفكارك السلبية.
مش كل حاجة بنخاف منها المفروض يتخاف منها بس هنفضل نخاف طول ما إحنا مبنفكرش في حاجة تانية غير الخوف.
ناس كتير من اللي عملوا معايا جلسات كوتشينج كان عندهم الإحساس ده و إحنا بنعمل الجلسة يعرفوني بأنهم بقالهم شهور بيفكروا يعملوا الجلسة ولا لا ، كنت بسألهم و ليه فضلتوا تأجلوا كل ده ، كان ردهم ببساطة بسبب الخوف .
الغريب بعد ما يخصلوا الجلسة بيكون رد فعلهم مختلف تمامًا عن قبل الجلسة و بيحسوا إنهم لو كانوا أخدوا القرار من بدري كان هيبقي أفضل كتير من التأجيل اللي مكنش ليه سبب لمجرد احساس بالخوف.
أنا شخصيًا حاجات كتير خوفت أعملها قبل كده و لما عملتها حسّيت براحة وسعادة و التفكير اللي عندي قل بشكل كبير.
يمكن التردد اللي بيكون جوانا سبب في اللخبطة دي بس علي أي حال في النهاية هتكتشف أن مش كل حاجة جواك خايف منها المفروض متعملهاش.
ساعد غيرك يشوف الكلام ده معاك و ساعدهم علشان الخوف اللي عندهم ده يقل و قولنا لما بتكونوا في موقف زي كده بتتصرفوا إزاي .
تابع الشرقية توداي على جوجل نيوز 
