أحمد حامد دياب | يكتب : استرجل و طلّع السيسي اللى جوّاك

السيسي اتبرع بنص أملاكه ونص مرتبه، ليه هو، اشمعني انت متتبرعش زيه، بس صحيح انت معندكش أملاك أساسا، طيب وبعدين.

بما إن بصلة المحب خروف، فانت ممكن تطلع السيسي اللى جواك بأبسط حاجة ممكن تعملها:

1- ممكن تطفى لمبة زيادة عشان توفر حوالى 80 قرش فى كل كيلووات.

2- ممكن تغير جلدة الحنفية عشان توفر لتر مياه الحنفية بتنقطه كل ساعة.

3- ممكن تطلع لشغلك بدرى شوية وترجع متأخر شوية.

4- ممكن تمشى لشغلك لو قريب، منها تجدد نشاطك ومنها تقلل من زحمة الطرق والمواصلات.

5- ممكن تركب عجلة وانت رايح الشغل، وتكون عجلة شيك من نفس الماركة اللى بيركبها السيسي، والبنات هيقولوا عليك شاب جرئ وروش طحن برضه.

6- ممكن ماترميش منديل فى الشارع، وتوفر على راجل قد أبوك إنه يوطى يجيبه، وتخلى منظر البلد حلو.

7- ممكن ماتسكتش على أى ظلم تشوفه ومتبقاش سلبي.

8- ممكن متدفعش أى إكرامية “يعنى رشوة” لأى موظف، واطلب حقك بعين قوية.

9- ممكن تحافظ على أى حاجة ملك للشعب حتى لو كانت وردة فى جنينة عامة.

10- ممكن تربي أولادك صح، وعشان يطلعوا شباب يقدروا يفيدوا البلد.

مقالات الرأي تعبر عن وجهة نظر صاحبها ولا تعبر بالضرورة عن الشرقية توداي