أحمد قورة يكتب :الشعب يريد دولـــــــة برطمانيـــــــة
في ديسمبر الماضي من العام المنصرم – اللي فات يعني – مفيش مخلوق في مصر كان ممكن يفتح بوقه و يقول يسقط و يرحل و امشي و قرفتنا و الكلام اللي قامت بية الثورة . و ربنا فرجها من عندوا – واحد احد عالم بالحال و غني عن السؤال – و فعلا نجحت الثورة المصرية . ثورة مصرية شعبية شبابية شارك فيها كل اطايف الشعب المصري . مخبيش عليكوا و الله انبسطت و فرحت من قلبي لما الثورة نجحت لاني كنت من اللي نزلوا من اول يوم من يوم 25 يناير و لو مش الثورة نجحت كان زماني دلوقتي في سرداب من سراديب امن الدولة اللي ارتحنا منها . و مع كل اللي حصل من نجاحات للثورة لسة في كتير ناقص و محتاج شوية صبر . ربك خلق الدنيا في سبعة ايام رغم انو قادر علي كن فيكون و لا اية يا بوب الجيل انت وهو . اصبروا و اشتغلوا الدنيا هتبقي بيس جدي و الله .
بعد النظرة المبعدية التحليلية اللي فاتت دية خلوني اطلع بقي كام حاجة فقاعة مرارتي عشان في الهيصه و الزمبليطة الناس بقت عمل عبيطة كتير قوي جدا خالص فحت اخر تسع حاجات . بص يا حج و ركز معايا انت و هو وهي و هما . مساحة الحرية اللي موجودة خلت الفاتيين هما اللي شغالين . كل واحد عامل فيها مفتي و هو يبدوب كان بيقول نكت هبطانة قبل الثورة و ياكل لب عباد شمس وهو مش قاعد تحت الشمس . الكلام في السياسة له اصول و قواعد و دراسة او علي الاقل قراءة مش مجرد رغي عمال علي بطال . مصر كلها بقيت بتشتم في مصر التانية و كل نص بيبوظ في الناحية التانية .لية كدة و حياة ابوك يا عم انت وهو ركزوا احنا محتاجين نشتغل فعلا عشان نعمر البلد . مش تلاقي واحد طالع يقولك انا عايز دولة علمانية زي تركيا و تاني يوم يقولك انا عايز دولة ليبرالية و تالت يوم يقولك دولة اسلامية اخوانية و رابع يوم يقولك دولة برطمانية قصدي برلمانية لا يعمن انت وهو فكروا قبل ما تتكلموا مش ناقصيين فتي و لت و عجن . المجلس العسكري اثبت جدارة و محتاج وقت و بيتصرف صح مش تكونوا ورقة ضغط علية لازم نكون سند لة .
نصيحة اخيرة لوجة الله اللي خايف من الاخوان و السلفيين مش هو اللي خايف من الشريعة الاسلامية في فرق كبييييييييييير الشريعة للكل و انما الشريعة مش ملك حد . و اللي خايف من الليبرالية علي انها شبه العلمانية و فصل الدين عن السياسية . و اللي خايف من الحزب الوطني و اللي خايف و اللي خايف . كدة مش هينفع لازم نعرف بعضنا كويس و نعرف مبادئ و اراء الاخرين قبل ما تحكم اقرا عن كل ده الاول ممكن ؟؟؟؟؟؟؟؟؟؟؟؟؟؟؟؟؟؟؟