امبارح كنت في الكوافير و كان في بنت أقل ما يتقال عليها انها زي القمر … لفتت نظري جدا … و بعدين لبست النقاب و خرجت .. و بعد ما مشيت كانت الصدمة رهيييبة بالنسبالي … البنات اللي شغالين هناك طبعا كالعادة بيسمعوا CV كل واحدة بعد ما بيقرروها طول ما هما شغالين معاها .. و طلعت البنت دي عندها 19 سنة و فرحها بكرة !!!
أنا صعقت بصراحة .. 19 سنة !! تعرف ايه عن الدنيا ولا جربت ايه فيها عشان تتجوز ؟ انا مش فاكرة أصلا كنت بفكر ازاي و انا قدها كدة .. مفيش أي تجربة ثمينة تضيف لشخصيتي أو أثرت فيا و أنا قدها .. بعدين فين حياتك .. الدنيا لسة فيها كتير يتشاف من ناس و مواقف و انك تطوري شخصيتك و تعرفي نفسك بجد .. طبعا الجواز ماشي كويس و الخلفة حلوة .. بس أكيد بنت العشرات مبتفكرش في حب المسؤلية و العيال ؟! انتي فين .. فين حياتك .. فين تجاربك اللي هتربي بيها ولادك ؟! .. ايه اللي لحقتي تتعلميه في الدنيا عشان تديهولهم ؟! ليه مبتفكريش في نفسك ؟ استسهال و لا زهد في الدنيا ولا قالولك ان دا ممنوع و انانية ؟ كان عندي مليون سؤال في دماغي و بجد البنت صعبت عليا جدا .. ليه في الوقت اللي غيرها بيكتشف فيه الدنيا و بيدور على نفسه و مكانه فيها تتحرم هي من الاحساس دا ؟ ليه تبقى بس مجرد رغبة في حياة راجل ؟ لا بجد و الله الخلفة جاية جاية و لما نخلف كدة كدة بنفقد جزء كبير من أحلامنا الشخصية و بنعيش لولادنا .. بس لازم نكون عملنا لنفسنا حاجة نقدر نقدمها لولادنا .. عيشنا حاجة نحس انها بتهون علينا تضحياتنا لولادنا .. انما هوس الفستان الأبيض و إنه حلم جميل .. ماشي .. كلنا كان عندنا فضول للفستان الابيض و للجواز عموما .. تجربة و حياة كلها جديدة بالنسبالنا .. بس الفستان الأبيض مسؤلية .. و للأسف في مجتمعنا للست هو نهاية لحاجات كتير في معظم الجوازات .. حلو تحلمي بيه بس خليه لوقته .. عشان تحسي انه بيكملك حياتك مش بياخد منها .. موضوع الفرص اللي بتروح و مابتجيش كلنا خوفونا بيه .. بس الحاجات دي في الاول و في الاخر نصيب .. و الجواز عمره ما كان فرصة و لا صفقة ناخدها عشان (بس) منخسرش أكتر بعد كدة … لو انتي بجد حطيتي نفسك أولوية في حياتك هتلاقي ألف مين يتمناكي .. لكن لو قعدتي مستنية الفرص تترمى عليكي .. يبقى هتعملي زي البورصة كدة .. تجازفي و تشتري بسعر كويس جالك احسن ما تخسري بعد كدة .. حتى لو انتي مستقلياه .
اتقوا الله في بناتكوا .. و مترخصوهومش و تخلوهم مجرد تنفيس لرغبات غيرهم .. و علموهم ان من حقهم يحلموا و يحققوا حلمهم .. عشان حتى لما يجي وقت و يتجوزوا .. يعرفوا يختاروا اللي يناسبهم و يبقوا فهموا بالظبط هما داخلين على إيه.
مقالات الرأي تعبر عن صاحبها ولا تعبر بالضرورة عن رأي الشرقية توداي
تابع الشرقية توداي على جوجل نيوز 
