بيت الشعر

الشاعر على أبو المجد | يكتب : كاس سم

الشاعر علي أبو المجد

دمي ..
اللي طالع يجري ؛؛ مش مجنون
ده : دم طالب تار
ف اقبل خطاه : يا عالم الأسرار
و ارزقني يا رزاق : كتاف شياله
شابب جبيني ؛؛ ل النهار : منحاز
و الشمس ..
فوق مني : لهب / مش ضي
الشمس فوق منهم : دفا القياله

من بعد هم ؛و دم ؛و علو النفس
راجع .. جيوبي : زي ما اتوكلت
أكلوني صاحي /
أكلوا حبيبك : حي
أكلوا -ولاد الكلب- : لحمي الني
الرأسمالي ..
ب الدولار ؛و الجاز
ب الأله ؛و الشمس الإزاز
أول ما جاع ..
“لاكني” ف عز الضهر

راودني عن نفسي ..
عملت : عبيط
هم : ب خيالي ؛؛ ب الوطن : هميت
عيطت في سري ..
و غنيت ف العلن
و العالم المسعور ما أبداش : إهتمام
ما لقتش فيهم ..
حد : ب يسمي
“كاس سمهم” ..
ده ولا “كاس سمي” ؛؛ عشان : نخيت
م الحوجة ..
؛و الجوع ؛و العلاج ؛و القهر
جسمي : غنيمة ..
مين : خسر ؛؛ مين : فاز
مين زيي بعد الدبح : ب يغني
الشمس فوق مني : لهب ؛؛ مش ضي
الشمس فوق منهم : أمل ب يلين
راس “كارل ماركس” .. زينت : “برلين”
و احنا ف بلادنا : المال ب يتوضى
و ب يتغسل ف : “معاهد الأورام”
مش “خوفو” هو اللي بنى الأهرام
خوفي أنا
شريان يا نيل ؛؛ ولا الزمن : عرقان
الفرض : مش فرض الصلاة
الفرض : فرض الصوم
“هوليود” بتكشف عن ساقين “جولييت”
كل الشوارع أصبحت : “وول ستريت”
البدو قالوا “البرده” م “الروك أند رول”
ردوا ..
الكمنجات الحزينة ؛؛ “السيرة” : “جاز”
ليه كل حاجة ف الحياة اتغيرت ؟!!
حتى أدان الفجر .. ليه مش ع “الحجاز” ؟!!

سامح المصري

كاتب صحفي ومدون منذ عام 2000، بداية احتراف الصحافة كانت من خلال موقع الشرقية توداي الذي اعمل به منذ عام 2011، اكتب جميع أنواع القوالب الصحفية ولكن اتميز في كتابة مقالات الرأي
زر الذهاب إلى الأعلى