علق الإعلامي جابر القرموطي، على قتل المحامي كريم حمدي، داخل قسم المطرية، إثر تعدي ضابطين بالأمن الوطنى عليه بالضرب المبرح أثناء استجوابه.

وقال القرموطي، خلال تقديمه حلقة اليوم الخميس، من برنامج “مانشيت”، المُذاع عبر فضائية “أون تي في”، متسائلًا: “ليه؟ إنتوا بتضربوا في مين؟ إنتوا أمننا يا فندم، إنتوا حراسنا يا فندم، الأمن في بلدنا تاج راسنا، ليه نوصل لكده؟ ده حتة قسم شرطة معفن صحيح، قولنا مائة مرة خلوا بالكم من القسم ده، هو وغيره، وإنتوا عارفين، مش بتشوفوا الأقسام دي ليه؟ وسايبينها ليه؟”.

وأضاف: “العقيد ولا اللواء المسئول، حتى لو الوزير نفسه، لازم يتحاسب، لازم تكون صفحتكم بيضة، بكل شفافية، بعض الضباط بيتعاملوا مع المواطنين داخل أقسام الشرطة بطريقة لا تليق”، لافتا بقوله: “إحنا منتظرين إن العدل يا خد مجراه، ولا أعتقد أن ما حدث في أي حد يوافق عليه”.

وتابع: “الداخلية مش على رأسها ريشة، ولا وزيرها على رأسه ريشة، المفروض إن الدنيا اتطورت، الداخلية تتجاوز القانون في أمور عدة، لا ينبغي أننا نسكت، وأنا مش بقوم الناس على الشرطة، أن بقوم الناس الكويسة في الشرطة على الناس اللي مصرة تأخرنا لورا، ومش لازم نستنى لحد ما تحصل مجازر عن الأقسام”.

وأمر المستشار محمد عبد الشافى، المحامى العام الأول لنيابات شرق القاهرة، بحبس ضابطين بالأمن الوطنى، لاتهامهما بقتل المحامي كريم حمدي، داخل قسم المطرية، حيث اعتديا عليه بالضرب المبرح أثناء استجوابه داخل القسم، وكان محتجزًا داخل القسم بقرار من النيابة العامة، على ذمة تحريات الأمن الوطنى.

وكشف تقرير الطب الشرعى المبدئى أنه توفى إثر إصابته بكسور فى ضلوع القفص الصدرى ونزيف فى المخ أودى بحياته مما يؤكد تعرضه للضرب المبرح وإصابته بهبوط حاد فى الدورة الدموية وفارق الحياة.