قال الإعلامي وائل الإبراشي إن الدكتور الشحات منصور، عميد كلية الحقوق بجامعة بنها، حرم ابنته من دخول امتحانات دبلوم الاقتصاد، عقابًا لها بعد أن أفصحت له عن قيامها بغش جزء من السؤال الأول من زميلة لها، قبل أن تنفي البنت أن تكون قد غشت، موضحة أسباب منعها من الامتحان.
وطالب «الإبراشي» في برنامجه «العاشرة مساءًا»، على قناة «دريم»، مساء الأربعاء، بإعطاء وسامًا لعميد الكلية، قائلًا: «واقعة من هذا النوع تؤكد إنه الضمير ينتصر وإنه القيم تنتصر، عاطفة الأبوة فوق أي شيء، ولا يمكن أبدًا لأب أنه يعاقب ابنه أو ابنته بهذا الشكل، ممكن إنه يعاقبها في البيت، لكن إنه يقوم بحرمانها من الامتحان، يعني هذا الرجل يستحق وسامًا».
ونفت نجلة عميد الكلية، أسماء، في مداخلة مع الإبراشي، أن تكون غشت جزءً من سؤال من إحدى زميلاتها، موضحة: «كل الموضوع إن بعد اللجنة بتاعتي، مروحة مع بابا للبيت بيقولي إيه اللي حصل في اللجنة وعملتي إيه في الامتحان، يعني كالعادة بتاعته بعد كل امتحان بيسألني، فيعني كنت بحكيله إن اللجنة كانت كويسة والامتحان كان كويس، بس حصلت حاجات في اللجنة بسبب وجودي».
وتابعت: «دكاترة دخلت الكلية أو اللجنة عندي شافتني ففي ناس كانت تعرفني في الكلية عند بابا فسلموا على أول ما شافوني، ده خلى المراقب بتاع اللجنة يسألني أنت مين، طيب باباكي مستشار، طيب هو في الكلية دكتور، فأنا قلتله أه دكتور في الكلية، فحب يعرف أكتر مين الدكتور اللي هو بابايا، فقلتلوا إن أنا بابايا العميد».
واستطردت: «بس فحصل بعدها تسيب في اللجنة، كان في مراقبين اللي هم الدكاترة المنتدبين من الكليات التانية بيبقوا مشرفين على الدور كامل، فهم كانوا بيشوفوا اللجنة أخبارها إيه فدخل دكتور من طب بيطري لقى فيه غش في اللجنة اللي هي البنت اللي ورايا واللي ورايا، فكلم المراقب فالمراقب نفى إن فيه غش، فكان في كذا حالة غش في اللجنة كثير، فأنا قلت إن هو بعد ما عرف إن أنا بنتك اللجنة سابت وكذا تعليق اتقال وكذا واحد غش وكذا حالة غش اتعملت».
وأضافت: «بس بابا لما عرف الموضوع كدة، بعدها بيومين، هو كان قبل الامتحان التاني بتاعي بيومين قرر إنه ميخلنيش أروح الامتحان عشان ميخلنيش السبب عشان ميبقاش في غش في اللجان».
وردًا على مدى تأثير قرار والدها على مسيرتها التعليمية، قالت «أسماء»: «في الحقيقة بابا أصلًا مانعنا إن احنا نكون عنده في الكلية بكل الأحوال من واحنا طلبة في الجامعة، فأنا لما أصريت لما أكون عنده السنة دي لظروف خاصة بي فهو وافق، لكن لما لقى الموضوع ممكن يحصل مشاغبة بسببي، ممكن يحصل غش موجود، أو يتعمله خاطر من غير ما يكون له دخل فيه من مراقب أو دكتور، فحب إن هو يقطع الموضوع خالص ويمنعني أروح عنده الكلية عمومًا».
بدوره، علق عميد الكلية، في مداخلة مع «الإبراشي» قائلًا: «أنا لم أفعل إلا واجبي، أنت تعلم تمامًا سيدي أننا بعد ثورتين، كل واحد لابد إذا ما أؤتمن على مكان ما لابد أن يؤدي الأمانة كما ينبغي أن تكون».
وأوضح «منصور» رد فعله حين علم بتسيب اللجنة بعد علمهم بوجود ابنته قائلًا: «قلت لها قولًا واحدًا، لن تذهبي إلا هذا الامتحان واعتبري نفسك ماجتيش خالص، والسنة دي تضيع عليكِ»، لافتًا: «الضمير هو الذي يتغلب، لا العاطفة، لأن دي لو بنت أي حد تاني وعلمت أنها ستكون سبب في تسيب لجنة لابد أن آخذ معها إجراء، وكما آخذ إجراء مع الآخر لابد أن آخذ إجراء مع ابنتي، وأنا راضي كل الرضا عما فعلت».
المصدر
تابع الشرقية توداي على جوجل نيوز 
