مقالات

ضياء غنيم | يكتب : بين البينين

ضياء غنيم

كل الحاجات بين البينيين ، الحب وسنين الامل بين البينيين ، الشغل والقوت والعمل بين البينيين
العيشة والعيش واللى عايش بين البينين ، وكاننا عايشيين وكاننا راضيين ، والدنيا حلوه واحلى سنين
وبدون مقارنة ما بين وبين ، كل الحياه بين البينيين .
بنيجي للدنيا ويبتدي رحلة كفاحنا مع الورق ، لحد ما تتحول الحياه لموظف حكومة خمران في الروتين .
البداية مع شهادة ميلاد ، ونطعم عشان ما نموتش وبرضه نموت ونتسمم ، ونكبر ونفهم وكل ما نكبر بنكره اننا فهمنا .

نروح المدارس ونشتري لبس المدرسة ” اليونيفروم ” وكتب وكراسات ومساطر ومصاريف وكل ده علشان نتأسس ونتعلم ، فيتحول الطالب لعسكري الشطرنج ، لكن لعبة الشطرنج هنا مش 8 عساكر ولا حتى 16 ، قول 80 أو 100 عسكري شطرنج في الفصل تحت ايد المدرس اللى هو اصلا مجبر يعلمنا ومستعجل عشان يلحق معاد الحصة الخصوصي ” اللى بتجيبله الفكة ” .

طبعا ولى الامر لأن هو كمان حياته وتفكيره بين البينين ، يلاقي الواد مبيتعلمش ، طب الواد بيروح مدرسة وفى مدرسيين وادارة ونظام ، طب ما تروح للمدرسة ويشوف ايه المشكلة ؟

لا اكيد الولد تحصيله ضعيف او فهمه بطئ ، ابني لازم ياخد دروس خصوصية عشان يطلع احسن مني ، والواد يدور جوه دوامة المدرسة والدروس والمذاكرة واهم حاجه واجب الدرس ، عشان احنا بندفع فلوس يا حبيبي فيبقي الموضوع وكأننا اتأسسنا فى التعليم .

ومفيش ما يمنع ان الواد يتعب ويقع من طوله من كتر اللف فى الساقية ، طب شيلوا الواد من الارض علق محاليل ، الولد محتاج عملية عشان ما يموتش ، جاله الدكتور ، جهز غرفة العمليات ، عمل العملية ، طلع الدكتور وشه بيضحك ، العملية تماام بس ابنك هو اللى اتوفي ، طب ايه ؟ زيادة اهتمام ده ولا كتر نضافه ولا إيه ؟ يا اخي بعد الشر بطل خيالك المريض ده ، ونرجع تاني للساقية .

يبقي طبعا من البديهي ان كده بيتولد طالب على درجة متخلف عقلياً ، لان الطالب هو الوحيد اللى مش فاهم اى حاجة ولا عارف الهدف اللى بيطلع عينه وعين ابوه وعين امه عشان يحققه .
ويستمر المسلسل مدرسة ودروس وكتب والذي منه ، وفجأة الولد دخل الجامعة

يعني خلع اليوني فورم وبقي راجل ، والبنت بقت انسة واخيراً هتلبس الهدوم اللى الدولاب من كتر العشرة بقي مستمتع بالحوار مع الهدوم ، وتحت مسمي التنسيق بيتحدد مستقبلنا وكأننا اختارنا مستقبلنا ، ونتخرج ونتعين ، آسف ونتخرج ونتعين .

عندك مقابله بكره يا بني ، مجالك ايه يا حبيبي ؟ والله انا خريج ، اقصد شغال فى ايه ؟ عندك خبرة فى إيه؟ و هو انا هجيب الخبره منين ؟ مش مشكلتي بقي .

ونقبل عشان ما نبقاش زى صاحبنا عاطل وبيماطل ، ويبقي برضه ايه وكأننا اتعينا
وبين التفاصيل تفاصيل ، بس الحقيقة ان كل تفاصيلنا بين البنيين ، ومن ضمن الكلام وكأني عرضت الفكرة وكأني كتبت المقال ، لانه أكيد زيه زي كل حاجه ” بين البنيين ” .

الآراء المنشورة تعبر عن وجهة نظر صاحبها ولا تعبر بالضرورة عن رأى الشرقية توداى 

زر الذهاب إلى الأعلى