في رثاء أمي يرحمها الله :
يا اسم من حرفين ونور قايد وعمدان تتسنِد بيها البيوت
يا وِش بتفتّح عليه عيون الملايكة قبل مآ تنزل من السموات و ترفع باسمها الدعوات يا جنة عايشة بتمشي فوق الأرض و تايه عنْها كام عايش من الأموات
يا (أم) يوم الأجل و بيبان بتترزّع ف بيتِك اللي بيكي يا أمي عامر يا (بكري) اهدى
يا (أحمد) ايه ! في ايه يا (تامر)؟
قوم ده سببك في الحياة بعد الإله بتموت
داخل عليكي بعشم
بيننا اتفاق ان احنا من نَفَسِك
و طعم الأكل من ايدِك بنتعلِم
و نبقالِك خدَم
و من سهرِك لوش الصبح
و من قلقلِك يا أمي علينا نعملِّك دوا و طبيب و هنشيلِك على عنينا يا أول وِش لينا حبيب
و من طيبتِك و من الدّلع اللي غرّقتينا فيه هنبقالِك
و من شخطة لو اتقالِت 200 مرّة من الرّقة لا يمكن يوم هتمنعنا -بإذن الله- لا يمكن حاجة تجرالِك و من بسمة و را مخاصمة تعلّمنا و تشجّعنا نفارق بدري زلّاتنا نسيب السكّة دي و نكبر كفاية عيال و من صورة أبويا اتفرّعت و اتوزّعت أربع رِجال
يا جنّة لينا بنغترف من نهرها
يا نداوة صبّت عمرنا من عمرها علشاني أنآ و الأشقيا و بقينا بيكي و ليكي يآمّة أوفيا منك يا نبع الخير نعيش بيننا اتفاق انك هتبقي تمام راح أقول سلام
كام ساعة بدخل انام و بتمرّن على بُعدك ده بعد الشر لو حان الأجل
سيبِك من اللحظات دي أرجوكي لو المَلَك اللي جالِك قالِك اختاري سيبِك من اللي سبَق على الجنة و عزَمك في المنام
أنا أجيبلِك أكبر سفرة من خيرِك يا خير الله علينا
سيبِك من اليأس الكئيب و اتحمـسّي سيبِك من اللي يزعلِّك احنا فداكي اتنفسّي يا رب أنا لو قلت شيء يرضيك فبرضاها
من جهلي لو بعصيك فيمكن كنت بعصاها يا رب ترحمها لغاية يوم ما ألقاها على باب الرّضا ف الجنة
مقالات الرأي تعبر عن وجهة نظر صاحبها ولا تعبر بالضرورة عن الشرقية توداي
تابع الشرقية توداي على جوجل نيوز 
