كتير من اللى بيسأل السؤال دا لنفسه ، بينسي يفرق بين هل اللى حاسس بيه قلة ثقة نتيجة انه بيعمل حاجة لاول مرة ، و انعدام الثقة بسبب نقص معلومات عن حاجة جديدة عليك ومطلوب منك تجربها .
مثال ، مطلوب منك تعرض فكرة قدام مجموعة من الناس شئ طبيعى لو اول مرة تعرض انك تكون حاسس قلة ثقة بالنفس نتيجة نقص الخبرة فى الجزء دا معنى كده انك تقدر تتكلم وتعرض بشكل ممتاز يأثر فى الحضور ، الاجابة نعم طبعا بس مطلوب منك تتعب شوية فى إنك تحضر كويس للكلام اللى هتقوله و تجرب تقول الكلام دا فى البيت اكتر من مرة و تركز على النقاط المهمه اللى هتقولها ، اللى قاعدين قدامك بشر ومنتظرين يسمعوا اللى هتقولوا ثق بنفسك .
1- حاول تفتكر لما كنت بتتعلم المشي وانت صغير فاكر لما كنت تقف تمشى خطوة وتقع وتضحك إنك وقعت ترجع تقف تانى وتمشي خطوة وتقع وتكرر الموضوع دا كتير معنى الكلام دا إن الثقة بالنفس عملية بتزيد بالممارسة كل ما كثفت الممارسة كل ما اتعلمت أكتر أفتكر حاجات جربتها كتير هتلاقى نفسك دى اكتر حاجات بتعمل تعملها لإنك مارست .
2- علشان تثق بنفسك محتاجك تفتكر الانجازات اللى عملتها فى حياتك و معنى الانجازات هنا اى حاجة صح عملتها فى حياتك تعد انجاز حقيقى حتى لو كانت بسيطة ، إنت كل ما تقدر الحاجات البسيطة هتقدر تعمل الحاجات الكبيرة .
3- إحساسك الداخلى من أكتر الحاجات اللى بتدعم ثقتك بنفس يعنى مش عايز اقولك إن كل الكلام السلبى اللى بتقوله لنفسكدا خطير وبيأثر عليك وإنت مش واخد بالك ، زى ايه مثلا تقول أنا فاشل ، مفيش حد بيحبنى ، مفيش حد بيشجعنى،،،الخ ) حتى لو من وجهة نظرك الكلام دا صح هو صح لإنك عايزه يكون كده وليس هما يقصدوا كده من الاخر دا تفسيرك إنت لإسلوبهم .
4- مقارنتك بغيرك من أكتر أسباب قلة ثقتك بنفسك ، طول الوقت شاغل نفسك بـصحابك دا شاطر ودا بيلبس كويس ، دا بيتكلم أفضل منى وهكذا ، بفكرك إن اللى بتعمله دا بيصب فى مصلحتهم وبيزيد من ثقتهم بنفسهم جدا لإنك هتتعامل معاهم بنظرتك ليهم اللى هى كلها ثقه بأنهم افضل منك .
5- علشان تزيد ثقتك بنفسك قلل توقعك فى الناس اللى بتتعامل معاهم تقولى ازاى
هقولك يعنى انت لو فى العادى بتتعامل مع صحابك بتقدير واحترام فـ اكيد منتظر دا منهم ولو مكنش تقديرهم لك على مستوى توقعك اكيد هتحبط وتضايق لا احنا بقى مش عايزين نوصل للنقطة دى من الافضل نساعد غيرنا لان دى قيمة فى حياتنا مهمة نساعد بدون ما ننتظر مقابل لان المقابل احيانا بيكون اقل كتير من اللى اتقدم
6- بتزيد ثقتك بنفسك بحسن ظنك بربنا يعنى الأفضل من إنك تشيل الهم تدعوا ربنا من قلبك ييسر لك كل امورك واكيد طبعا دا بعد ما تكون خلصت وعملت اللى عليك بـإختصار إنك تكون متوكل على الله وليس متواكل عليه ( تفرق كتير )
7- تزيد ثقتك بنفسك بزيادة معدل ( القراءة – العمل التطوعى – العلاقات )
8- تزيد ثقتك بنفسك بمتابعة أشخاص يشجعوك بكلام يحطك على اول الطريق
9- تزيد ثقتك بنفسك بمساعدة شخص محتاج أهم حاجة متكونش منتظر مقابل
10- بتزيد ثقتك بنفسك بتقلل أفكارك السلبية وتبدأ تجرب بدون خوف من الفشل
الكلام عن الثقة بالنفس مهم جدا لإنها واحدة من أهم المهارات اللى مطلوب إنها تكون موجودة عند كل شخص مننا ويمكن دا السبب فى نجاح ناس كتير فى حياتها لانها كانت قادرة تعرض نفسنا بشكل رائع ساعدهم يجذبوا غيرهم بـإسلوبهم الشيق .
الثقة بتزيد لما فعلا نكون عايزنها تزيد مش مجرد أمنيات مننا ، على كل حال لو الكلام ساعدتك بجزء دورك إنك تكمل باقى الطريق علشان توصل للاحساس اللى بتتمناه ، بفكرك تأخذ بإيد صحابك وتساعدهم يثقوا بنفسهم أكتر ، إحنا منعرفش حياة مين ممكن تتغير بسببنا .
تابع الشرقية توداي على جوجل نيوز 
