بما ان الامتحانات بدأت ممكن طلاب كتير يكونوا حاسين بملل من المذاكرة ومضايقين ومخنوقين وعايزين يهربوا من الناس كلها
ـ ولو حاسس بكده وعايز تعرف ازاى متملش من المذاكرة
* مهم انك تكون بتذاكر علشان حاجة عاوز توصلها
تقدير مثلا او نجاح يفرق معاك بعد التخرج او لانه هدف من اهدافك عاوز تحققه ، او يمكن علشان تفرح بابا وماما وتفرح حد قريب ليك اوى
* مهم كمان تكون عارف ليه بتذاكر لان زى ما انت عارف اللى بيعمل حاجة ميعرفش بيعملها ليه بيزهق بسرعة ويمل منها
* جرب تذاكر بهدف انك تستفاد ، متكونش مذاكرتك علشان تحل فى الامتحان وبس وكمان تركيزك على الامتحان ده فى حد ذاته ممكن يوترك ويتعب اعصابك ذاكر بهدف الاستفادة هتنجز اسرع وافضل
* متزهقش لو حسيت انك مش فاكر اللى ذاكرته – بطل تفكر فى النقطة دى لانها ممكن تخليك تقفل الكتاب وتقوم من على المذاكرة خالص وكمان بتأخذ جزء كبير من مجهودك الذهنى ، على الرغم ان الموضوع بس بيبقى محتاج مراجعة بسيطة منك وهتفتكر كل حاجة تقولى ما انا براجع مش فاكر ، ما لان حضرتك مركز على انك هتنسى فـ ده بيقلل من الطاقة اللى جواك ركز انك بتراجع علشان تفكر نفسك باللى ذاكرته
* كتير من الطلاب لما يحبوا يبدأو مذاكره يقولوا لنفسهم نبدأ بالمادة الصعبة بقى علشان اخلص منها على الرغم ان دا غلط الافضل انكم تذاكروا المادة السهله بالنسبالكم علشان تزودوا الطاقة جواكم
* قبل ما تبدأ المذاكرة بلاش تركز على الافكار الفظيعة اللى زى ” كده كده مافيش فايدة ، السنه راحت اصلا ، ما انا كده كده مش هجيب تقدير او مجموع ” وبعد ما تخلص جرعة الاحباط تقول لنفسك يلا بقى اذاكر ياراجل ده بجد
* متنتظرش من حد يشجعك لان ببساطة مافيش حد هيخاف على مستقبلك اكتر من نفسك ركز بقى على هدفك علشان توصله
* الكلام ده محاولة انك تفكر فى الحل لانه موجود يمكن انا قولته بطرقتى او وجهه نظرى ، فكر انت بطرقتك وجهة نظرك هتلاقى حلول كتير عندك صدقنى بس فكر فى الحل علشان تخرج من حالة الاحباط اللى انت حاسس بيها .
* فى الوقت اللى هتقعد فيه تذاكر علشان عايز تذاكر هتنجز فيه بشكل رائع عارفه ليه ؟ لانك انت اللى عايز تذاكر مش حد قالك
* دايما بنسمع كتير – ان لما تعمل حاجة كويسة كافئ نفسك ، تقريبا احنا بنعمل عكس الموضوع دا الطلاب بيقعدوا على الفيس ويكافئ نفسهم بشوية مذاكرة
ايه رأيكم فى فترة الامتحانات نغير الموضوع دا .
مقالات الرأي تعبر عن وجهة نظر صاحبها ولا تعبر بالضرورة عن الشرقية توداي
تابع الشرقية توداي على جوجل نيوز 
