عقلك بيحب المعايير يعنى ايه الكلام دا ؟ عقلك عايز يعرف سبب للى انت بتعمله ، انتبه للموضوع دا متتجاهلش احتياج معرفة عقلك للى بتعمله لانه لو عرف الاهمية هيساعدك جدا توصل للى انت عايزه .
جرب تسأل نفسك دلوقتى هو ليه بنذاكر ؟ فى الغالب فى اجابة معينة انت بتفكر فيها دلوقتى وكل مرة حد يسألك السؤال دا هتجاوب نفس الاجابة ، عارف ليه ؟ لان المذاكرة بالنسبالك اتحولت لمجرد روتين واى حاجة روتين للاسف بنزهق منها وبنتعامل معاها بسخافه جدا زى ما كلنا بنتعامل مع المذاكرة دلوقتى .
بعضكم بيقول لنفسه دلوقتى ايه لازمة المقدمة دى يعنى ما احنا كلنا عارفين دا ، ادخل فى المفيد ولخص احنا عندنا مذاكرة ، اللى بقوله دا لا يقل اهمية عن اللى هكتبه خليك ماشى معايا واحدة واحدة.
لو حابب تفهم اللى اقصده انصحك تقرأ المقدمة مرة تانية لانك لما تكمل البوست بفهم هيفرق معاك كل كلمة ، لو انت من الناس اللى بتهتم بفكرة التعلم فـ اكيد فهمت اللى اقصده فوق.
هتقولى ايوا بعد كل دا المفروض اعمل ايه يعنى ؟ ، هقولك طول ما انت بتتعامل مع المذاكرة على انها حاجة مفروضة عليك هتفضل مضايق منها وممكن توصل لدرجة انك تكرها كمان
جرب تذاكر بهدف الاستفادة وليس بهدف انك تتخلص من الضغط اللى حاسس بيه ، تأكد ان الضعف دا هيروح نهائى لما الموضوع يتحول عندك لحالة من الاستمتاع ، دا هيوصلك لانك يكون عندك رغبة ملحة للتعلم وهتبقى شايف ان كل ساعة بتقعدها مع الكتاب هى اضافه لك وليس عليك ، لانك هتحصل معلومات جديدة هتستفاد منها فى حياتك .
الموضوع بالنسبالك هيتحول من كون انه مذاكرة بهدف الغش فى الامتحان وتخرج من الامتحان لو حد سألك سؤال فى اللى انت كتبته اعتقد هتقوله صعب ، فى الوقت دا ممكن تحس انك كنت مسجون وبتحرر نفسك بكلمة ناجح .
التعليم فى الخارج بيساعد الشخص انه يبدع ويطور ويبتكر حاجات جديدة ،، بس كل دا بيحصل لان الطالب حابب دا ، انما احنا الموضوع مختلف عندنا لاننا كـأشخاص خلينا المذاكرة فى حياتنا مجرد روتين فـ بالتالى بنتعامل معاها اسوء معاملة .
فى الوقت اللى هتتعامل مع الكتاب على انه الحاجة اللى بتوصلك لحاجة من حالات الاستمتاع هتحس ان الكتاب وقتها مش مفروض عليك بل انت اللى هتفرض نفسك عليه لانك محتاجله.
تعرف الكلام دا ممكن يكون بالنسبالك خيالى شوية ، او رخم حبتين ، بس تأكد ان احساسك دا بسبب انك بقيت بتقدس الروتين ومبسوط باللى انت فيه حتى لو من جواك مضايق منه ، بس هتبين انك مبسوط علشان تهرب من الحاجة اللى هتفضل تفكرك انك المفروض تسعى وتتعب علشان توصل للى انت عايزه .
اللى حبيت اوصله من البوست دا ، أى كلام هيتقال مهما كانت قوته ، هتعتبره غير مؤثر على الاطلاق لو محاولتش تطبق الكلام اللى فوق دا ، جرب تنصت لـ صوت ضميرك هتعرف قد ايه انت مقصر بس تأكد مهما كنت متأخر لسه عندك فرصة تبدأ .
البداية فى اى حاجة صعبة بس هى سبب سهولة كل الحاجات الصعبة ، البداية تعنى السعى تعنى تغيير حالة الركود لحالة من النشاط .لو فهمت اللى اقصده من البوست ينوبك الثواب ، حاول تطبق الكلام لان المعرفة لوحدها مش كفاية.
وكمان حاول توصله لغيرك جايز يفرق معاهم ويساعدهم يغيروا المود اللى هما فيه دا ولو الموضوع لسه مش واضح لك جرب تقرأ تانى بتركيز اكتر .
تابع الشرقية توداي على جوجل نيوز 
