محمد الشافعي| يكتب: عايز تعرف إيه أكتر حاجة بتقتل شغفك لأي حاجة بتعملها في حياتك ؟

… الموضوع ببساطة هو إنك تحول الحاجة اللي بتعملها مع الوقت لمجرد تعود ،، يعني إيه الكلام ده ؟!!.. يعني تفضل تكرر اللي بتعمله بنفس الطريقة لحد ما توصل لمرحلة إنك مبقتش تحس بطعمه أو تأثيره أو قيمته وجودته في حياتك.

نعمل إيه علشان منوصلش لمرحلة التعود اللي ممكن بسببها نأخذ قرارات نلغي اللي بنعمله لأننا مبقناش نحسه بنفس درجة تأثيره رغم انه كان مهم في بدايته بالنسبالنا .

هشارك معاكم بعض المقترحات اللي اتعلمتها من مئات العملاء اللى قابلتهم فى جلسات الكوتشينج مقترحات عملية هتساعدكم تنتبهوا علشان متوصلوش لمرحلة الفقد و تخسروا حاجات مهمه بالنسبالكم ؛

1- مهم اننا نعيد تفكيرنا في كل حاجة بنعملها في الوقت الحالي و نبدأ نعمل زي تقييم بسيط كده لدرجة أهمية كل اللي بنعمله و الأثر اللي بيعود علينا منه و هل فعلا بنستفاد و بنعمل تطوير فى حياتنا ولا مجرد حاجات اتعودنا نعملها كل يوم .

2- نركز أن الحاجات اللى نعملها فى يومنا تبدأ بـ الأهم ثم المهم يعني ببساطة نحدد إيه اللي هيكون محتاج مننا وقت أكتر و اهتمام أكبر حسب درجة أهمية في حياتنا ، النقطة دى هتساعدكم ترتبوا الأولويات في حياتنا بشكل رائع .

3- نسأل نفسنا ياترا إيه من الحاجات المهمه اللي بنعملها محتاج تجديد ؟!
يعني إيه اللي لو تم إضافته هيساعدنا نعمل تجديد. و بالتالي إحساسنا باللي بنعمله هيختلف و ميكونش مجرد حاجة بتتكرر و خلاص.

4- بقولك إيه !! .. إنت في قرارات بقالك كتير مأجلها و بتقنع نفسك إن ده مش وقتها .. هيكون أفضل لو عملت إعادة لتقييم القرارات دي جايز فيه منها ينفع تبدأ فيه دلوقتي و كنت متخيل إنه لسه بدري عليه !!.

5- هفكرك .. الأشياء بتفقد معناها لما بتتكرر بنفس الطريقة و بنفس الأسلوب و الغريب إن بعض الناس بتبقي منتظره نتائج مختلفه و ده استحاله يحصل ،، غيروا الوسائل تتغير النتائج.

6- مفيش مانع تشوف غيرك اللى بيعمل نفس اللى بتعمله بيقدمه ازاى جايز ده يفرق معاك ويخليك تشوف اللى بتعمله بشكل مختلف .

7- كل الشخصيات اللى بتتمتع بالمرونة بيكون عندهم استعداد يعملوا تغيير اه بيكون جواهم احساس قلق من النتائج و لكن ده ممنعمش يقفوا مكانهم و يعملوا تجديد فى اللى بيقدموا
8- لو فيه كورسات او ورش عمل بتتقدم فى مجال تخصصك هيكون رائع انك تقدم فيها و تشتغل على تطوير مهاراتك ( خليك متجدد بأستمرار علشان تفضل محافظ على جودة اللى بتقدمه ) .

شاركنا إنت كمان بتجربتك وقلناإيه ممكن يساعدنا نعمل تجديد و نكسر التعود ده من واقع خبرتك و تجاربك ، و إيه بالنسبالك أكتر نقطة من 8 فرقت معاك وشايف محتاج تبدأ فيها.

تابع الشرقية توداي على جوجل نيوز