بيت الشعر

محمد صبحي | يكتب : سلفني عصايتك يا موسي

محمد صبحي

فى بلاد خيبانة وموكوسة
ونفوس لفساد زاد محبوسة
ووسايط ورشاوى وكوسة
وجميع الآيات معكوسة..
سلفنى عصايتك ياموسى…

فى بلاد بتهين كل ولادها
وشوارع زايد تعدادها
وفتاوى بتخدم أسيادها.
وتحلل كل حرام بيِّن..
ولابن الباشا اللى اتعيِّن..
فى كراسى السُلطه الموروثه..
سلفنى عصايتك يا موسى..

لـ الشوك اللى استوطن وَرْدُه
والخاين لبلاده و أرضه
والبايع لمبادئه وعرضه
ونظام لنظام حَطُه وفرضه
علشان يفضل دايمًا سايد..
كان نفسى فـى إعلام بيحايد..
ويبطل يضرب ع الطبلة
ماحناش تلاميذ وانتوا الأبلة
تقرولنا مناهج مدروسة
سلفنى عصايتك ياموسى..

لـ وجوه بِتْطُل خلاص باخت ..
ومناصب ع المنصب شاخت..
وغلابة من الآخر داخت..
حاسبينها لأصغر سحتوت
فى ناس للآن مـ الجوع بتموت
وفى ناس من دم الناس دول
بتعلى قصور وبتبنى بيوت..
والعدل بقاله سنين فـ سكوت..
فى بلادنا الحلوة المحروسة
سلفنى عصايتك يا موسى..

سلفنى عشان زادوا الكَهنة
تَعَابينهُم كتروا وتاعبينا..
سرطان القمح اللى بناكله
بيزيد سنّه..
بالتالى الموت هيزيد برضه..
أرخص بنى آدم دا اللى يموت
بـ أيادى الناس اللى فـ أرضه.

سلِّفنى عشان يمكن اضرب
الأرض تطَلَع خير للغير..
يمكن ما يهجِّش تانى الطير..
ويعشش يومها فـ أغصانه..
فرعون لما استعفى إتهدت
فوق منه جيوشه وأحصانه..
علشان تضرب كف العاصى
فيبطل ظلمه وعصيانه..
ويطهَّر إيده المغروسة
سلِّفنى عصايتك ياموسى..

سلِّفنى عشان يمكن تضرب
البحر يشق فـ وسطه طريق..
وتخَضَر يابس أيامنا وتبل الريق..
وتوفرع المحتاج فواتير..
وتوزع عيش من غير طوابير..
وتلاقى وظيفة لشاب فقير..

الدولة مهياش شيفاهم
الدولة عيونها مابتشوفشى
غير بس الناس اللى معاهم
الناس أصحاب باقى الحاشية..
وتعدِّى سنين وسنين ماشيه..
سكينة وحاميه وسرقانه..
وبلادنا مازالت غرقانه..
وبيوتنا تبوش فـ بحور الصرف..
مسئول بييكرر تصريحه
كربون بالحرف..
ومحدش هيدوس للباشا
أبدًا على طرف..
فى بلادنا تعبانه ومتعوسه…
مستنى عصايتك من بدرى
ومجاتش عصايتك يا موسى…

shady zaabl

كاتب صحفي مصري مهتم بالمواقع الإلكترونية وإدارتها وكتابة المقالات في جميع الأقسام وذو خبرة في الصحافة والإعلام والمحتوى لـ 5 سنوات وفقً لدراسة أكاديمية وتطبيق عملي .
زر الذهاب إلى الأعلى