لقيتنى بسألنى وبقولى عارف مسرح العرايس .. هو : طبعا عارفه
انا : تعرف وجهه الشبه بينا وبينه ؟
هو : انت هتشتغلنى ياعم ما تفكك منى وركز فى امتحاناتك بقى كفاية سياسة .
انا: ياعم اصبر بس دا موضوع مهم خلينى احكيلك للاخر هتفهمنى .
هو : قول ياعم .. يارب نخلص .
لو افتكرت معايا فترة مبارك كنا ناقص نبوس على ايد الناس عشان تفهم حقيقة دولة مبارك مع انك لما كنت تتناقش مع اى مواطن كنت تتأكد انه فعلا عارف مش محتاج حد يعرفه وحاسس بمواجع وهموم البلد ومش محتاج حد يفكره كل شوية بس كان خايف يتحرك لكذا سبب اولهم الدولة القمعية وتانيهم الاستقرار !!
هو: تاااااااانى هتقولى استقرار .
أنا : ياعم استنى انا مش بتريق فعلا والله الناس ارتبط فى تفكيرهم ان المظاهرات تخريب وعدم استقرار الناس دا ماشفتش ايام ناصر والسادات ومبارك اى مظاهرات الا وكانت بتنم عن عدم استقرار فى الدولة الناس دى اتنفخت من 3 انظمة حطموا اى طموح واى امال فى حياتهم .
طب فكك من الفترة دى افتكر معايا كدا ال 18 يوم لما بدأت الناس تنزل واحدة واحدة واى حد كبير كان بيعدى ع الميدان بيقولنا ربنا معاكوا وشدوا حيلكوا انتوا الامل وانتوا اللى هتعملوا اللى فشلنا فيه .. ساعتها كانت الناس دى مصدر امل لينا وفخر انهم ربونا على الحرية .
فاكر لما مبارك مشى كلنا فرحنا وهما كمان فرحوا معانا جداا لانهم حسوا بسقوط الطاغية اللى اتظلموا منه اكتر ما احنا اتظلمنا منه .
فرحوا جداا بالمجلس العسكرى وكرهونا جداا لاننا عارضنا المجلس العسكرى
هو : تفتكر ايه السبب ؟
أنا : مفيش سبب غير حب الناس دى للمؤسسة العسكرية وانهم شايفين فيها الامل الوحيد دا غير قيادات الثورة والرموز اللى خذلتنا وخذلتهم دا غير فشلنا احنا كمان وعدم توحدنا على هدف واحد دا غير انهم شايفينا مش مقدرين حجم المخاطر على البلد
ولما كنت تسألهم طب انتوا عاجبكوا الشباب اللى مات على ايد المجلس العسكرى يقولك لا طبعا بس الجيش خط احمر .
فكرت تعرف هما ليه دايما يقولوا الجيش خط أحمر ؟
هو : معروفة يعنى مش محتاجة فتى كتير الناس دى شافت حروب وعرفت يعنى ايه حرب وعرفت يعنى ايه جيش يتهزم فى 67 ويعنى ايه انتصار فى 73 .
تفتكر احنا ليه منزلناش للناس دى ؟
انا : اعتقد ظروف البلد بالاضافة الى اننا مكناش مؤهلين لقيادة الشارع او حتى التأثير فيه دا غير قيادتنا اللى فشلت وفشلتنا معاها دا غير عدم وضوح رؤيتنا للشارع واننا خذلنا الشارع جداا .
وكمان مفكرناش ننخرط مع الناس دى بتفكيرهم واصرينا نفرض تفكيرنا عليهم وعاوزينهم يمشوا معانا وخلاص واحنا وبس الصح ومفيش صح غيرنا .
هو : احنا وبس اللى حبيبى !!
انا : انت بتقلش عليا ابو رخامتك ماترد عليا وتناقشنى .
هو : طب وانت تبرر بأيه موقفهم ايام مرسى لما عرفوا اننا الصح ورجعولنا ؟
أنا : هههههه هو معرفش انك انت الصح هو نزل يعرفك انه هو الصح ولا انت نسيت اننا قولنالهم ان مرسى هو مرشح الثورة وان الثورة لازم تحكم وان احنا الصح ومينفعش ينتخبوا احمد شفيق لانهم بكدا بيفشلوا الثورة .
نزلوا وقت ما حسوا ان بلدهم بتضيع وان جيش هينهار بسبب تصرفات مرسى وان البلد عايشه فى ازمات مبتخلصش وان الثورة ضيعتنا وضيعت استقرار البلد .
هو : اممممم .. ممكن برضو بس فى الاخر احنا كنا معاهم ومفيش حد مبيغلطش واحنا غلطنا ومكناش نعرف الغيب يعنى .
انا: لما قدرنا نشيل مرسى عن طريق انحياز المؤسسة العسكرية لينا معتبروش ان دا نجاح لينا بالعكس دا اعتبروه انجاز للقوات المسلحه وعزز من موقفها عندهم وزود الفجوة بينا وبينهم ودخل المتسلقين على جثث الموتى وتاجروا ب 30/6 وحطموا فى ذهنهم اى تعاطف مع ثوار 25 يناير .
هو : طب ما احنا اللى حركناهم اصلا وفهمناهم الصح ولولا حركتنا مكنش حد اتحرك .
انا : ما هو نظرتك دى هى السبب اننا نفشل لانك مصمم على انك انت الصح وهما اللى لازم يمشوا معانا فى طريقنا لاننا احنا الصح وبس .
طب شوفت عملوا فيك ايه فى الاستفتاء الاخير ؟
هو : دول شعب عبيد وجيل عمره ما هيتحرر واحنا اللى لازم نحركهم من تانى .
انا : هو انت مش شايف حد الا نفسك وتفكيرك .. يابنى افهم الناس دى نزلت قالت نعم بكثافة وبأعداد كبيرة جداا لانهم لسه بيراهنوا على المعادلة اللى انت مبتحبهاش وهى الاستقرار والامان الناس دى تفكيرها متغيرش وكل مرة بيعلموك درس انت مصمم متتعلموش لحد انهاردة ومصمم تلومهم هما وبس ومتلومش نفسك على خذلانك ليهم وابتعادك عنهم
اااااااه هما اللى ضيعونا ودمروا حياتنا بس متنساش انهم كانوا ضحيه أنظمة لعبت بيهم وانت لو كنت مكانهم كان هيتلعب بيك زيهم جرب تعيش فى زمانهم وشوف ردود افعالك ايه وعيالك هيقولوا عنك ايه
من السهل جدااا انك تحكم على زمن معشتوش ومتنساش ان ممكن يجى الزمن اللى ابنك يلعنك لانك اتسببت فى ضياع البلد .. ماهو محدش عارف الغيب !!
زى ما انت بيعتهم وقت ما احتاجولك داسوا عليك وعرفوك قيمتك وقت ما احتاجتهم
متلومش الا نفسك يا كابتن انت اللى فاشل وطول ما انت قاعد تنظر هتفضل فاشل
هتعيش عمرك تتكلم وغيرك بيشتغل فى الشارع وع الشارع وللشارع وانت مكان معروف
ماوس وكيبورد وشاشة كمبيوتر وراوتر نت .. هو دا كوكبك اللى مبتعرفش تعيش غير فيه
عرفت انا ليه بفكرك بمسرح العرايس ووجه الشبه بينا وبينه ؟
هو : اممم .. مسرح العرايس فيه ناس بتحرك وناس مجبره على الحركه , ناس بترسم المشهد ومينفعش للعراايس تلعب دور غير المرسوم ليها
أنا : ومشكلتنا بقى اننا شايفين الشعب دا عرايس من حقنا نحركهم ونرسملهم المشهد على مزاجنا ومينفعش يخالفوه .
هو : سيبنى بقى اشوف امتحاناتى وفكك منى الاستفتاء طلع اهو والنسبه كويسة وربنا بيصلح الامور ورينا شطارتك بقى فى الاستحقاقات اللى جاية .
المصدر
تابع الشرقية توداي على جوجل نيوز 
