للأسف الشديد رغم المعاناة الصعبة اللى بيواجهها الأخوة فى الصومال، ورغم أن العديد منـّـا نفسهم يساعدوا بأى حاجة ويتبرعوا، إلا ان موضوع التبرع كان فيه صعوبة كبيرة، إعلانات كتير بتحثــّـنا على التبرع ولكن للأسف مفيهاش وصف لطريقة سهلة للتبرع، علشان كده أنا بحثت فى الموضوع وحاولت ألاقى أسهل الطرق للتبرع علشان أنشرهالكم، علشان نسهـّـل طرق التبرع وكل اللى مستعد للمساعدة يقدر يساعد لأن الوضع هناك حقيقى صعب، ودى الطرق بإختصار:
الطريقة الأولى (الطريقة الأسهل):
توجه لأقرب فرع من فروع (نقابة الأطباء) الموجود بمحافظتك، وهناك هتقدر تتبرع بشكل مباشر، بمنتهى البساطة هتقابل المسئول عن جمع التبرعات وتقوله انا عاوز اتبرع للصومال هياخد التبرع منك ويدي لك وصل بالمبلغ فورا.
الطريقة الثانية (برضه سهلة):
برضه تبرع مباشر فى أقرب فرع من فروع (الجمعية الشرعية) القريب من بيتك والمنتشر فى مساجد كتير فى كل المدن والقرى، وهناك برضه تقدر تتبرع بشكل مباشر وتستلم وصل بتبرعك.
الطريقة الثالثة (مكلكعة حبتين):
بتتوجه لأقرب بنك من البنوك دى (بنك مصر ، بنك بيريوس، العربى الإفريقى، بنك فيصل، قناة السويس ، البركة) وبتتبرع لحساب (لجنة الإغاثة والطوارئ) بـ (إتحاد الأطباء العرب) والحسابات دى أرقامها موجوده على الانترنت وفى البنوك برضه، يعنى ممكن تقول للصراف اللى موجود فى البنك أنا عاوز اتبرع لحساب (لجنة الإغاثة والطوارئ) بـ (إتحاد الأطباء العرب) وهو هيفهم لأنهم عندهم ارقام الحسابات دى، بعد كده خطوة مهمة جدا انك بتاخد الوصل اللى هيدهولك وتكتب عليه تبرع للصومال واضحة وبعدين تبعته فاكس لــ (لجنة الإغاثة والطوارئ) بـ (إتحاد الأطباء العرب) ورقم الفاكس هو (02252826011) وخطوة الفاكس دى مهمة جدا لأن الحساب ده عام، يعنى لكل الأنشطة اللى بترعاها (لجنة الإغاثة والطوارئ) فبالفاكس يتم تخصيص القيمة دى لحساب الصومال.
بس خلاص كده طرق التبرع خلصت، أهم من التبرع الدعوة للتبرع، أدعو كل اللى تعرفهم وكلم الناس اللى حواليك، أصحابك ، أقاربك ، زملائك، وخليها دعوة خير.
“ربنا إجعل عملنا كله خالصا لوجهك الكريم، ولا تجعل لأحد غيرك فيه شيئ”.
“ربنا تقبل منا إنك أنت السميع العليم”.
وتبقين يا بلادى فى دمى
تابع الشرقية توداي على جوجل نيوز 
