فكرة جديدة دعا إليها أحد الشباب من خلال صفحة أطلقها على موقع التواصل الإجتماعى ” الفيس بوك ” عنوانها ” مش معايا غير دبلتين تتجوزينى ” ، ويعتبر هذا رد فعل طبيعى لإرتفاع أسعار الذهب ، فالجرام الواحد تعدى ال 300 جنيه .
وكتب مؤسس الصفحة على صفحته ” عايزين زواج بسيط من غير تعقيدات شكلية كتير ، مش لازم شبكة مكلكعة ، ومش لازم فرح غالى جدا ، والتكاليف تروح للأساسيات ” .
ونظرا لإرتفاع أسعار الذهب قرر هؤلاء الشباب تبنى فكرة إلغاء الشبكة أو جعلها رمزية .
وأكد كريم مصطفى ، مؤسس الصفحة وصاحب الفكره ” صفحتنا هتكون قضية رأى عام ، لأن محلات الذهب ستلاحظ مقاطعة الشباب لهم وقد تصل الفكرة للدول الأخرى سواء كانت عربية او غربية ، بالتالى ستنخفض أسعار الذهب .
وثانيا إذا إقتنع أهالى الفتيات بالفكرة سيقدرون الشباب ” العرسان ” ويحترموهم .
وأضاف أن عدد المشتركين بالصفحة أصبح الآن 114 ألف مشترك ، وأنهم قاموا بتزويج 270 شاب وبنت من دون شبكة .
وعلق أحمد السعودى ، عضو فى الصفحة قائلا ” يا توافقى بالدبلتين ، يا كل واحد يروح لحاله يا بنت الناس ” .
وتساءلت مى سيد ” ولما بقى البنت وأهلها يوافقوا على كده والبنت تتخطب بدبلتين بس ، وخطيبها يفضل داخل ، طالع ، واكل ، شارب ، سنه ولا اتنين ويفسخ الخطوبة ف الآخر هى هتخسر كتير اوى ومحدش هيعبرها تانى ، انما هو هيخسر ايه ؟؟ تمن الدبلتين ” .
وجاوب كريم قائلا ” الشخص اللى بيجيلك ده ، أكيد ليكى أهل يسألوا عنه هل هو محترم ولا لأ ؟
الشخص المحترم بيتعرف إنه محترم وبيفرض إحترامه على الجميع ، أما الشخص اللعوب بيتعرف ، وأكيد إنتى مش مقطوعة من شجرة ، والسؤال عن العريس واجب ، وفى الأول والآخر ده بيكون نصيب ، وفتره الخطوبة دى بتبين قد أيه هو إنسان كويس وكريم ، أو إنسان بخيل ، مش هنقول كل الناس ملايكة ، أكيد وارد أنه هيكون فيه شياطين .
المصدر : بوابه الصباح
تابع الشرقية توداي على جوجل نيوز 
