زمان عشنا على ثقافة طيب وشرير .. في طريقة لعبنا و في برامج الاطفال و في القصص و الكرتون .. لازم يكون في طرفين طرف كويس و الطرف الشرير .. ذهنياً القصة دي ارتبطت بكل حاجه في حياتنا .. حتى مشاكل العيلة تلاقي علشان الام مضايقة من اختها يترجم عند اولادها خالتهم شريره مش عارف ليه .. والكورة لو انا اهلاوي يبقى الزمالك وحش ولو انا زملكاوي يبقى الاهلي وحش وبيكسب بالحظ 😀 … دي ثقافتنا في فهم الطرفين .. وده طبيعي جدااا اننا نشوفه في الاستفتاء لان كتير مش قادر يستوعب انها مش حرب خير وشر لا ده انت بتقول رايك في حاجه بس مش محتاجه ده كله .. عندنا مشكلة لاحظتها عند كتير في فهم او تفسير الطرفين .. طالما انا منتمي لطرف ولان فطرتي بتقولي لازم اكون انا الكويس يبقى اللي قدامي شرير .. هنا بنشوف نتيجة التبرير و نتيجة اصطياد اخطاء تافهه .. واحنا لو فعلا عايزين ننهض ببلادنا كل واحد يغير الاول من نفسه الفكر ده و الثقافة دي لانها مرض .
وهنا عايز اتكلم في نقطة مهمة … مشكلة التعميييم … كتير من المعارضين لما بيشوف خطأ من جهة المؤيدين بيقول ده كل المؤيدين ( كذا ) و المؤيد لما بيشوف خطأ من المعارضين يقول ده كل المعارضين ( كذا ) .. ده خطأ كبير في تحليل الامور المؤيد و المعارض مفيش حد منهم صااااافي ونقي وطاهر وكل طرف فيه (( بلاوي سودا ده افضل وصف معلش )) .
المعارض ::
– طرف بيقول لأ علشان معترض على مواد في الدستور ومشكلته الدستور نفسه .
– طرف بيقول لأ علشان بيكره المؤيدين و بيطلق عليهم اسم الاخوان مع ان الاخوان جزء مش كل .
– طرف بيقول لأ علشان حاجه تانيه خالص لانه من ابناء النظام القديم و عايز يصعد الامور لكلمة ” ارحل ” او توصل لمرحلة ” الفوضى ” لانها في صالحه
المؤييد ::
– طرف بيقول نعم لانه فهم الدستور و شايف انه مناسب للمرحلة دي واعتراضه ممكن يتعدل بعد نعم .
– طرف بيقول نعم لانه بيكره الطرف المعارض وبيطلق عليهم ليبراليين مسحييين مع ان مفيش كيان معترف بيه ليبرالي الاسم ده احنا اللي خلقناه من عدم و المسحيين جزء مش كل
– طرف متطرف فكريا و بيقول نعم من اجل الحرب على اعداء الدين وهي وجهة نظر الجهله .
علشان كده التعميم خطأ جدااا نوصف بيه ونعتمد عليه في التحليل السياسي للامور .. و للتوضيح مش معنى اني قولت موافق يبقى انا موافق على كل اخطاء المؤيدين ومش معنى اني قولت لا اوافق يبقى انا كده موافق على كل اخطاء المعارضين .. انت قولت رايك انت ومش مطلوب منك تبرر اخطاء غيرك او تتصيد اخطاء قد تكون تافهه لغيرك علشان تثبت انك كويس
بقلم : احمد خالد مكي
*مقالات القراء تعبر عن رأي كاتبها وليست بالضرورة تعبر عن رأي الشرقية توداي
تابع الشرقية توداي على جوجل نيوز 
