ماشاء الله حاليا شعب مصر كله دلوقتي بقى حكيم
و كل واحد شايف نفسه مثالي و مفيهوش غلطة
و قاعد زي الرادار متفرغ بس لرصد غلطات كل الناس
حاليا مفيش مرشح مجلس شعب ولا سياسي ولا اي كائن مهما كان لو ظهر بيقول حاجه كويسة إلا تاني يوم لازم يكون في قصايد عن سلبياته و عيوبه و انه مفروض ميتكلمش اساسا و إنه بيتمنظر
و الاصعب لما يكون الكلام ده إشاعات
و حلني لو الناس ادركت إنه اشاعه
و الاهم ان الي بيطلع الكلام و بيروجة دايما يذيل الكلام بكلمة ” اتق الله ”
و فين اتقاء الله و الناس بتروج كلام يمس الشرف و هما مش متأكدين و فاكرين إن هما كده خدمو الناس
الناس هتموت من الليبراليين لانهم هينشر الفكر الاروبي و الحرية و تقريبا خلطو ما بين الحرية و الانحراف باين
و الاهم ان الي متخوف من التحرر ده ممكن يكون مش بيصلي
و لو حد عصبه تلاقيه بيقول أفظع الكلام و الي بيوصل للسب بالدين و العياذ بالله
حد يقولك حرية الرأي و التعبير و بيجادلك و لو رديت على الجدال بتاعه تبقى بتحجر عليه
ولو اختلفتو في في الرأي
مش بعيد تاني يوم تلاقي نفسك خارج قايمة الاصدقاء طبعا دي كتير جربوها فيكو سواء مؤيد و لا معارض
ولا زي الأب الي بينصح إبنه بعدم التدخين لإنه مضر و هو في إيده السجارة ولو الولد غلط و بص بعينه عليها يقولو أنا مش عايزك تبقى زيي أنا عايزك تكون أحسن
ما هو يا ريتها بالكلام مكنش حد غلب
و لا سعات الاقي واحده ست منتقبة و بتحضر دروس و بتحفظ قران
ربنا يزيدها و يكرمنا كده بس جت تنصحني بالنقاب
و عادي قلت ربنا يهدي و سكت
لقيت بنتها بتعدي عليها تاخدها
و يا ريتني ما كنت واقفة
فتاة فيديو كليب بمعنى الكلمة أنا ساعتها بصيت للست عملت بتضحك و بتقولي أصل باب النجار مخلع
قلتلها اه بس بدل ما تتكلمي صلحي بابك الأول علشان حتى الكلام يطلع صح
ناس بتتكلم إن الشارع زبالة و الورق مبهدل الدنيا
و المحلات بترمي زبالتها برة و ده شيئ غير حضاري و مقزز
و تلاقيه خلص كيس الشيبسي او علبة السجاير و إرمي ورا ضهرك
ولو حد قاله كلمة يقولو يعني هي جت عليا ما المكان كله زبالة
طيب بتعيب على المكان من الاول ليييييييييييه!!!!!!
ده انا ايام الجامعه و الله لما كنت بقعد في مكان انا و اصحابي كنت لو لقيت في المكان الي واقفين ورقة مرمية مش بتاعتي خالص كنت بلمها هي و أي ورق تاني في المنطقة حوليا
كان في الي بيبصلي مستغرب و في الي مش بيبص لكن هو كمان لم الورق الي تحته في 5 دقايق مع وجود 7 افراد بس إتجاوبو المكان كان زي الفل عادي اهو مش سحر ولا شعوذة
و مش هنجيب سيرة الي إتريقو
وده بياكدلي ان فعلا الي يشوف الشوارع الفجر و هي مكنوسة و نضيفة و مرشوشة ماية كمان أيام ما البلدية كانت بتلف
هيدرك ان تعريف كلمة الزبالة مش الورق و الأكياس الي في الشارع و حرام نقول على الشارع زباله انما الزباله ليها تعريف تاني ………………متروك لمفهوميتكم
ناس على الفيس تلاقيها الصبح كاتبة اذكار و فضل الاستغفار
و بليل لو متعصب يكتب كل الجمل الاعتراضية الي في الدنيا
واحد عايز يصحى الصبح يلاقي مصر ولا اوروبا في المكانة و الحضارة
بس هو بليل يقعد على قهوة او على كافية بيشيش و بيعاكس أو في عربيات في فلل الجامعة بليل و الباقي معروف
سواق التاكسي الي تركب معاه من اي مكان في الزقازيق يتكلم عن عدم الاستقرار و الامان و النفوس الوحشة و و عدم الاحترام
و طبعا عارفين أهم مشكلتين الاجره الغير محدده على حسب لبسك و شكلك و المكان الي هتنزل فيه او انه يقف في وسط الشارع و يكسر الاشارة و يمشي مخالف ولو حد وراه ضربله كلاكس او قاله ايه ده يقولو ايييييييييه الصبر يعني هو إحنا اول ناس
طيب يا سيدي بالنسبة للمحاضرة الي سمعتها قهر عن النظام و الاحترام و الاخلاق
كانت هلاوس ولا ايه
ناس بتقول فين الأمن و الأمان الشوارع بقت فظيعة و السرقة عيني عينك و مفيش نظام
ولو ظابط وقفة و سحب رخصته علشان تجاوز ما يقولو هو يعني يوم ما تشمو نفسكو يبقو عليا إنتو المفروض متظهروش اساسا
يا راااااااااجل
” ادعو بس ان الظباط يرجعو للشارع تاني و يقفشو الي بيمشو ومخالف لو جمعو مخالفات من اللي ماشيين عكسي بس مصر تسدد ديونها في سنتين “
لو قضينا ربع الوقت الي بنقضيه في الانتقاد و ترديد الكلام ده بس لدراسة عيوبنا و تصليحها ساعتها هنكون فعلا إبتدينا التغيير الي بجد
كن انت التغيير الذي تريده
سمعناها و قريناها كتير و محدش إهتم يستوعبها بجد إلا قليل
انك تتعرف على عيبك و تعترف بوجوده ده نص الحل و النص التاني هو التصليح
و متعايرش الناس بالعيب الي مش عندك لان هتلاقي عيب عندك و هتلاقي الي يعايرك بيه
و افتكر كويس ان الي هيسمع منك كلام على حد و يسكت هيسمع عنك انت كمان كلام و يسكت
و الي بيقولك كلام على حد أول ما تمشي هيقول عليك
خلاصة كلامي
قبل ما ترفع صباعك و تشاور على عيب غيرك و تسخر منه و تعيب فيه
إفتكر إن في صباع واحد بتشاور بيه عليه و في 3 صوابع من ايدك انت بتشاور عليك
تابع الشرقية توداي على جوجل نيوز 
