خبر اليوم فى الشرقيه توداى إن المحافظ قرر النزول للشارع و فى وسط الخبر أوضح المحافظ أنه تقرر إنشاء مستشفى عالمي بتكلفة 13 مليون جنيه بالتعاون مع القوات المسلحة لخدمة مناطق فاقوس والحسينية والصالحية، وأكد المحافظ أن الشرقية تعتبر أقل المحافظات من حيث الحوادث الإجرامية نظراً لتوافر قضاة العرب اللذين لهم دور في حل القضايا وفقاً للأعراف والتقاليد.
==========================================
مستشفى عالمى بتكلفه 13 مليون جنيه … عالمى !!!!! عموما ربنا يعينك و أفلح إن صدق بس التقيم على عالمى هيكون فى الخدمه ولّلا العلاج ولّلا التمريض ولّلا الدكاتره اللى هتكون فيها وللا المرضى هيجوا من المانيا يتعالجوا فيها … يا سيادة المحافظ سفلت الشوارع الاول عشان الناس تعرف توصل للمستشفى بس قبل ما تسفلت الشوارع ياريت تتأكد من إن الغاز اللى تحت الأرض تمام التمام و الصرف يكون تمام و مواسير المياه تكون تمام … بدل ما تضرب تانى و ترجع تكسر الأسفلت اللى أكيد هيكون برضه بمقاييس عالميه !!! … و متنساش يا سيادة المحافظ بعد الطرق ما تتسفلت بالمقاييس العالميه تبص بصه على حركه السير فى الطرق عشان الناس توصل بسرعه بدل ما توصل بعد إسبوع و خصوصا إن البلد إتملت إشارات مرور بالمقاييس العالميه بس الغريبه إن الإشاره بتقعد 69 ثانيه بس !!!! عاوزين أكتر من كده يا فندم عشان العربيات تتكربس ورا بعضها اكتر و تكون واقفه مستمتعه على الأسفلت اللى زى الحرير و تطرب آذانا بالكلاكسات اللى بقت كلها سارينه المرور حتى فى الموتسكيلات كمان مركبينها !!!… لو معاليك نزلت مترجلا على الأقدام بمفردك هتشوف العجب العجاب و هتتعاطف مع مقالى مش هتستغرب اللى فيه و تنتقده … و ياريت كمان بالمره معاليك تشاور لتاكسى و تقوله الزراعه وللا صيدناوى و شوف هيبصلك ازاى و خصوصا ان اللى بيروح المكانين دول مش بيروحهم فسحه … ده يا رايح زياره لحد فى المستشفى بصيدناوى او رايح مسافر يركب من موقف الزراعه … و معلش يا فندم خللى معاك فكه بزياده عشان اقل من 5 جنيه فى مشوار مسافته الكيلو متريه اقل من اتنين كيلو و مسافته الوقتيه الطبيعيه لا تتجاوز ال 5 دقائق وده طبقا للمعايير العالميه زى بتاعه المستشفى كده فى اى بلد عالمى مشوار طوله كيلو و نصف الكيلو العربيات بتقطعه فى 5 دقائق و يمكن اقل !!!!! و ياريت معاليك تنزل يوم خميس كده بعد المغرب عشان تستمتع بمحل يكون بيعمل افتتاح و السماعات تطرب اذانك و خصوصا انك بتشجع المواهب و تستمتع بالطرب الاصيل بالديجيهات اللى لا بترحم و لا بتقدر الخلق اللى بتسمعها … على فكره … بنتصل بالنجده و مبتعملش حاجه عشان ما تحاولش يا فندم … معلش طلب أخير يا فندم بتقل عليك انا عارف … بس ارجو من معاليك ان تتحمل الريحه الجميله اللى فى المحافظه بالكامل ماعدا منطقة بيت المحافظ … أقصد سيادتك و هى ريحه الزباله الجميله … الزباااااله اللى مليت كل الشوارع و الناس مش عاجبها ايه يعنى فى كل شارع كوم زباله !!! ده حتى الاكياس الملونه بتعمل شكل فى الشارع وخصوصا بعد ما بتتفتح زى ورد الربيع من العربيات الكارو و العرب اللى بيركبوا الحمير و بنبقى كلنا بنستنى الحدث ده زى ما بنستنى ورد الربيع و هو بيتفتح …و بعدين ما كل واحد لو مش عاجبه يروح يشترى له كمامه من الاجزخانه ب 5 جنيه … طبعا يا فندم انا مش بتريق .. و الله ما بتريق انا بجد بوصف الواقع قسما بالله ما كتبت الا الواقع … وعلى فكره بقى يا فندم عاوز اقولك ان النصب التذكارى اللى معاليك كنت عنده يوم 25 يناير بمناسبه الذكرى الاولى للثوره مش مدفون فيه جندى ولا حتى مجهول و سيادتك خسرت تمن الورد على الفاضى على شويه رخام ….طبعا يا فندم انا مش بتريق بس بحب اعرف معاليك …وياريت تقول معايا يا فندم حسبى الله و نعم الوكيل فى كل مقصر فيكى يا بلد
=============================
بقلم : أحمد حلمى أيوب
(( جميع ما ينشر على الموقع من مقالات القراء تعبر عن رأي صاحبها ولا تعبر عن رأي الموقع ))
تابع الشرقية توداي على جوجل نيوز 
