مقالات القراء

مقالات القراء | نهى مشهور تكتب : حد يفرط في الجوكر…؟

الجوكر في اغلب العاب الكوتشينة غلب الولد في السبعه الكومي

لانه يقدر يعمل اي حاجه و كل حاجه

المجلس الاعلى للقوات المسلحة ضيع من ايده الجوكر

و متوقع يقش الورق دلوقتي بورقة 2 كارو 🙂

ازاي و ليه!!؟؟

يعني ناخدها من اولها كده

بعد موضوع الانقلاب العسكري

و انهم هينحو مبارك

و هوب طلع عمر سليمان قال خلاص مبارك تنحى و يتولى المجلس الاعلى حكم البلاد

الناس اتقبلت المجلس بفرحة الراجل اللي ربنا رزقه بالولد بعد 6 بنات

و شايف ان الولد ده هو الامل و الحياه

لو كان مثلا ايامها نوى التطهير و تنضيف البلد

مثلا كان مسك الداخلية

و على حسب الاشاعه القديمة بيقولك القوات المسلحة دي بتكره الداخليه عمااا

علشان فاكرين ان محدش قدهم و مبرطعين في البلد

انا قلت الجيش بقى يمسك وزارة الداخلية اللي سقطت دي او توفاها الله على راي العيسوي بعد الثورة

يقولك فين الناس الفاسده و دول مش هيستخبو دول ريحيتهم انتن من ريحة الفسيخ

و هوب يشيل و يحاسب و يلم ورقهم قبل ما يحرقوه و يخبوه تاني

بدل ما ساب حاميها حراميها كان لحقها و نضفها

لانها كانت هتشيل عنه كتير لو كان نضفها و ظبطها و قال للناس دي الداخليه الجديده

تقفيل الجيش

كانت الناس هتتهافت على رضا الداخلية

يا سلام ده الجيش قالنا دي حلوة حبوها

ده لو كانت مصلحة البلد رقم واحد

و كان التفت للمؤسسات الحكومية

يشوف كلابها اللي كلوها و ذلونا و معملوش حاجه

و المؤسسات الحكومية كانت مؤسسة لعقاب المواطن و راحة رجل الاعمال

لو كان مسك راس المؤسسات ديو غيرها

و شال الناس الملطوطة فيها كان زمان حالنا اتغير

المظلوم لما بيشوف الظالم بيتعاقب و حقه بيرجع ولو مش الحق المادي انما الحق المعنوي بالقصاص

هيحس براحة و امل و عدل و هيرجع يشتغل

و يقول للمجلس العسكري حاضر من عنيا ده انت صاحب الامر و حبيبي

طلباتك ازامر و مصر امي

و يمكن كنا بقينا اليابان التانية

غيره

طبعا كريه الملايين مبارك و عيلتة

و كلابة و اتباعه ولاد ال@@#%$$% انتو عارفين بقى

لو كان المجلس وقف وقفة العدل و الثورة اللي قال عليها

ولو اني شاكة انه واقف مع ثورة بلد غيرنا ما علينا

لو كان اقتص منهم

و جاب حق الناس المعنوي اولا قبل المادي

لحسن في ناس بتقول انتو مستيين الفلوس بس

كان زمان الناس خدت دفعه الامل و دفعت ام عجلة الانتاج اللي بيذلونا بيها

انتاج ايه بس اللي عايزين يشغلو عجلته

طيب الصين تسترزق منين

لو كان المجلس عرف قيمة الجوكر

و لوكان ناوي يقف جمب الشعب بجد

كان حاسب كل كلب مد ايده على المال العام سرق و نهب

هو لو كان بس جاب الروس الكبيرة و الله كانت هتكر لوحدها و هو قاعد يتفرج بدون اي مجهود

الروس الكبيرة كانت هتكر وراها كل اللي تحتها

اصلها عاملة زي غزل التريكو ابتدي بس باول غرزة و شد

هتقدر تلم كل البكرة

ساعتها الصغير اللي مغمور تحت و كان شاف حاجه خاف يقولها هيساعدك باستماته

اصلك انت محقق العدالة هيضمن انه يتسمع

كانو قالو ايوة حرية عدالة اخيرا

ده لو كان المجلس نوى يقف جمب الثورة فعلا و ليس قولا

و كان يقول للناس مصر امانه يا شعب هيقولول امانه يا كبيرنا

ايام ما اكن الفريق احمد شفيق موجود

و انا الراجل ده كنت بحبه من زمان قوي

الراجل قعد يكحت يكحت ومعملش حاجه

و الناس قالوله انت ضمن الفلول و اتهان و اتبهدل و مشي

و جابو عصام شرف من قلب الميدان

و الناس قالت هو ده الامل و الراجل بيكحت يكحت

تصدقة و محصلش جديد لسة كل حاجه زي ما هي

الداخلية متفيرسة و المؤسسات ملوثة

و دلوقتي بيقولو كارت احمر يا شرف

تفتكرو العيب في ايه في شفيق و لا شرف و لا فينا و لا في المجلس

مفيش قاسم مشترك غير احنا و المجلس

حد فينا هو السبب

للاسف

ضاعت فرحة الناس و من شهرين اتهزت ثقتهم و دلوقتي راحت ثقتهم

و راح الجوكر و فضلت احقر ورقة كوتشينة

الاتنين الكارو

مش هنقول الواحد اللي هو الاس لان ليه قيمة في العاب تانية الاس ليه قيمة الاتنين في كل اللعب ملهاش قيمة

اسبانيا مسكت حسين سالم في اقل من 48 ساعه خدت كفالتها من حبابي عنيه

مستنوش 15 يوم على ذمة التحقيق

ده التحقيق عندنا ذمته استك قوي

الفلوس اتسحبت فوري كده قالو بلدنا و خرق قانونها

طبعا عندنا هو فرتك القانون و محدش هز طولة يقولو بم حاجه تكسف

تصدقو كرهت رقم 15 ده

كل اللي خدو 15 يوم على ذمة التحقيق خدو براءة الاخر

امال في المسلسلات كانو بيقولو 4 ايام بس على ذمة التحقيق و بتنتهي سعات في المحكمة بالاعدام

ده حتى الجاسوس اللي علقو عليه كل بلاوي مصر اللي فاتت خد 15 يوم

تفتكرو هيستفيد من العرض

على فكرة انا مبقولش انهم سحرة و هيقولو جملة سحرية الامور تتعدل

انما اللي اقدر اقولو و اللي اغلب الناس اللي زيي حاساه انهم بيقولو بس

شعارات حلوة و كلام حماسي و نسيو اننا شبعنا كلا

يكونوش فاكرينا زي زمان هيثبتونا بكلمتين

طيب لو انتو مش معانا و ناويين تثبتونا وقفتو جمبنا ليه اساسا من الاول

ليه ضحكتو العالم علينا ليه خلتوناادناكم الامان و الاخر خذلتونا

لحد من شهرين في المليونية اللي قبل الثورة اولا دي انا قلت لا نصبر عليهم الناس بتتحاكم

اينعم بيتحاكمو بعد اعلان المليونية بيومين بس و ماله

ماشي

يمكن بيواجهو ضغوط خارجية زي الاشاعات ما بتقول

و بيميلو علينا احنا و يقولو الشعب عايز كده

ماشي الناس في خدمة الجيش و ازمته الديبلوماسية

و اتحطو في موقف محرج

واتعفو من الحرج و الناس قالت محكامة مبارك

و تاني يوم قالك التحقيق مع مبارك و انجاله و مراتة و مراتات ولاده

هما خدو البرائة بتاعتهم في العرض ولا لا

العرض بتاع شيل قضية تاخد برائة مجانا

ما علينا

المهم صبرنا و قولنا نديهم الثقة و الفرصة و الاخر كانك يابو زيد ما غزيت

طيب سؤال

لو انت مواطن عامل و مكافح و مناصر للثورة

و صحيت الصبح رايح شغلك علشان تحافظ على عجلة الانتاج

و و انت فات على الراجل بتاع الجرايد جبت الجرنال اياه اللي بيقولك كلهم الحرامية برائة

بذمتك انت هتعتب و لا هتلمس عجلة الانتاج

يكش تولع بقى اشتغل ليه و لمين ده الحرامية خدو براءة

طيب انا تعبي بيروح فين مين بيسفيد منه غيري مش ده اللي جه في بالكو

مرينا بكل ورق الكوتشينة و المجلس فرط في الجوكر

ثقتنا بعد ما كانت فوق قوي بدات تقل لحد ما جه اليوم بيقولو انت معانا و لا مع الناس التانيين

و يستغرب المجلس قوي و يقولك انا من اليوم الاول مع الثورة و عملت وسويت

لا هومعملش هو قال كتير قوي بيقول الناس و المطالب الفئوية

الناس كانت ممكن تبتدي تتغير من جوة نفسها لو لقت ان في بجاية منك اصل انت القائد

لقيناك فكرتنا بمثل يا ريتك ياابوزيد ما غزيت ده الاول كنت عندنا فرخة بكشك

كنت ظبطت مجلس رئاسي و طلعت من الصورة و بقيت مشرف

المصيبة دلوقتي اننا عارفين انك العمود الوحيد اللي ماسك البلد و رافعها

بس مش قادرين نصدقك و لا تثق في الكلام طيب نعمل ايه

و الاهم ان لحد دلوقتي المجلس مقالش حاجه

و كل مدى البيانات بتاعة الفيس بوك بتكون عجيبة الطعم و المعنى و الحماسة

و عصام شرف خرج ببيان عجيب فعلا لا قدم ولااخر انا شايفاه هو نفسه مش مقتنع بيه اساسا و بوزة طالع شبرين في الشاشة

تفتكرو اجبروه على البيان ده مبقتش استبعد

طيب ايه؟؟؟ حد يقول ايه اخرنا و نهاية الطريق فين؟

انتو معانا ولا مع الناس التانيين؟ شاريين مصر ولا مبارك؟؟

البلد استبعيت حياتها كلها مقابل انها تبقى حرة و تشتري كرامتها انتو شاريين مين و بايعين مين

العصاية دي بالذات متتمسكش من النص يا تمسكها من ناحية الشعب و تنضف البلد

يا من ناحية مبارك و اطلق اشارة البدء للحرب الاهلية

ريحو قلبنا مبقناش بنعرف ننام و لا نرتاح من الرعب لو انتو وقفتو ضدنا

لو فرطتو في القصاص هيكون عندك 85 مليون حرامي و بطلجي

مادول محدش بيكلمهم

و شوف حد يا سيدي ينفخ عجلة الانتاج

زر الذهاب إلى الأعلى