ايوة ده اللي اقصده مش زي اللي بيقولو فكها متحبكهاش
انا عايزاكو تحبكوها
و جدا جدا كمان
هي ايه
نبتدي مع بعض من اول السطر و نعرف ايه هي
بتصحى من النوم اول حاجه بتعملها تدخل الحمام و تغسل وشك و تتوضى و تغسل سنانك و ممكن تاخد دش
ركزو معايا كده
انت من اول ما بتفتح الحنفية علشان نقول هتغسل وشك بس
عسل الوش بياخد دقيقة تقريبا بتستهلك لو فاتح الحنفية على الاخر 8 لتر مع ان العميلة نفسها مش هتاخد غير لتر واحد او بالكتير لترين
يعني في تقريبا 7 لتر مهدورين
طيب هو احنا بنغسل وشنا بس كام مرة في اليوم؟ 4 او 5 او 8 كل واحد ويومة طيب المتوسط 5 مرات * 7 لتر
يعني تقريبا بنتكلم في ما لايقل عن 35 لتر مهدرين من غسيل الوش و ده رقم قليل عن الواقع بس معلش
هتغسل سنانك طيب في العادي و انت فاتح الحنفيه هنضيع من 4 ل 5 لتر
احنا محتاجين كمية قد ايه ؟؟؟؟ كباية واحده أو اتنين بالكتير
يعني بنضيع تقريبا 3 مرات * 4 لتر 12 لتر مهدرين
خد الكبيرة
هتاخد دش كده و نغني اغنيتين مع الماية اللي بتعمل ريفريش
اقل رقم هتكلم فيه تماما مع دش مفتوح هو 100 لتر و انت فعليا فعليا بحتاج 10 لتر بس
و مع البنات في شامبو و بلسم و شاور جيل و خلافة بقى يعني الرقم هيعلى
الوضوء تقريبا بيسحب من 10 لتر ل 12 لتر من حنفية مفتوحة
انا ممكن بنفس ال 2 او ال 3 لتر اتمم وضوئي بالكامل
و احنا بنتوضى 5 مرات
طيب ده كده انت في الحمام مخرجتش
عربيتك دي هتتغسل يعني خرطوم ماية مفتوح تماما و صابون و شطف ووش كمان
ممكن نتكلم في 150 لتر تقريبا
طيب ده لو انت و ولد او انتي بنت انما في حاجه تانية
مسيح البيت و السلم و في ناس بتسيب الخرطوم مفتوح و دعك و مسح
و غسيل المواعين في المطبخ
طيب هتسقي الزرع في الجنينة لو في يعني في بعض البيوت ليها جنينة خارجية
طيب اخبار لغسالة الاتوماتيك غوووول سحب مياه ايه ؟؟؟
المشكلة ان في واحد بس من 6 أشخاص على مستوى العالم بيلاقي كباية مايه نضيفة و احنا في مصر بس عارفين ان في ناس عايشة على مياه الصرف
اساليب الزراعة القديمة بتاعتنا مسئولة عن ضياع ما يعادل 75% من المياه الضايعه بتاعتنا
حدث ولا حرج بس عن ازمة الصومال في كباية ماية واحده تعيشهم مش حتى ترويهم لا تديهم ادنى لوازم الحياه
بعد كل ده هتكتشف ان ممكن نلاقي حلول بسيطة و تبقى فعلا ساهمت و ساعدت:
1 اقفل الحنفية شوية و انت بتغسل وشك السرسوب البسيط هيؤدي نفس الغرض تقريبا و هتوفر كتييييير جدا و ده هيمشي على الدش اللي ممكن وقت استخدام الصابون نقفلة شوية او ناخد دش سريع كده مش لازم المزاج العالي قوي في كل مرة
2 بالنسبى لغسل العربيات و مسح السلم و البيت انا ممكن استخدم الجردل العادي و استخدم ماية تكفي المطلوب بس مش لازم اسيحها
3 في مصدرين مياه جامدين هينفعونا في تنضيف البيوت و العربيات كمان و ممكن اسقي الزرع
الغسالة الاتوماتيك بعد اول دورتين احبس الماية بتاعتها في البانيو هتحوشي كمية كبيرة و فيها نسبة صابون و هتكون نضيفة بما يكفي انك تمسحي بيها الارض في البيت احنا بنعمل كده في البيت عندنا
و المكيفات في الصيف مش هتتخيليو كميات المياه الرهيبة اللي بتيجي من المكيف و بتكون مايه طاهرة و نضيفة ممكن حتى نتوضى بيها او نسقي الزرع او في نضافة البيت او غسل العربية
4 اسقي الزرع يا الفجر يا بليل و ابعد عن اشعة الشمس علشان فاقد المياه ميكونش كتير
5 اخيرا و أهمهم لو عندك حنفية بتنقط او ماسورة مفوته شوية ارجوووووووك حبكها كويس و صلحها
الي بيضيع من المياه ده هنتحاسب عليه لاننا عارفين ان لينا اخوات مسلمين في الصومال مش لاقيين ده و لينا اهالي في مصر بيحلمو بمياه نضيفة تنفع للشرب
و اخر حاجه خالص متنسوش اننا غالبا و ربنا يبعد عننا الشر هندخل في ازمات بسبب حصة مصر في المياه و مع ارتفاع درجات الحرارة على مانصيبنا يوصل هيتبخر نصه
نعمل حساب ربنا و اننا هنتحاسب على النعمة دي.
تابع الشرقية توداي على جوجل نيوز 
