انتشرت في الآونة الأخيرة سرقة حسابات الفيسبوك واستغلالها وابتزاز أصحابها أو التجسس عليها، طيب ازاي اقدر أأمن حسابي بحيث مهما حصل مستحيل إن أي هاكر يعرف يخترق حسابي حتي لو اخترق الجهاز بتاعي؟
-اغير الميل بتاعي إلى Gmail وألغي الميلات القديمة وده لأن اختراق الميلات الهوتميل سهله أوي خصوصا للناس اللي مش بتفتح الهوتميل بتاعها فترات طويلة والياهو مخترق أصلا لوحده فلازم أمسح الميل القديم وأربط الحساب بجي ميل وما اعتمدش على رقم الموبايلات يعني لازم ميل يكون مربوط بالحساب مش رقم بس
-مهم أوي إن كلمه السر بتاعتي تكون طويلة وفيها حروف وأرقام وحروف كابيتال وحروف صغيرة وممنوع منعا باتا استخدام نفس كلمه السر في الفيسبوك والميل وأي تطبيق تاني يعني ببساطة أعمل كلمة سر مختلفة لكل حاجة وتكون كلمه سر قوية مش سهل تخمينها.
-اربط الحساب بتاعي برقم الموبايل وأشغل خاصيه الأكواد بمعني إن أي متصفح جديد يتفتح منه الحساب الفيسبوك بيبعتلي رسالة علي موبايلي فيها أرقام لازم أدخلهم علشان الحساب يتفتح وده مفيد جدا وبيمنع سرقه الحساب خالص حتى لو الهاكر عرف الباسورد بتاعتي أو حتي بعتلي لينك اختراق اخترق جهاز اللابتوب أو الموبايل لأنه ببساطه برضه مش حيعرف يدخل حساب الفيسبوك وبكده أكون أنا الوحيد اللي معايا موبايلي وأقدر افتح حساب الفيسبوك
-ضروري إني يكون اسم الحساب بتاعي اسمي الحقيقي لأن الفيس بوك بيقفل الحسابات الوهمية فلو الأكاونت باسمي الحقيقي مش حيتقفل ولو اتقفل حيطلب مني صورة من بطاقتي الشخصية أصورها بالموبايل وأبعتهالهم يفتحوا الحساب وكمان يوثقوه بحيث إنه ما يتقفلش تاني خالص
– إضافة 5 اصدقاء موثوقين وده بيحصل من الإعدادات برضه بختار من 3 إلى 5 أصدقاء اثق فيهم بحيث لو اتقفل الحساب لأي سبب من الاسباب برجعلهم الفيسبوك بيبعتلهم ارقام يكلموك بالموبايل يديوهولك فيرجع الحساب يشتغل تاني و دي خطوه برضه مهمه . * ما تنساش تحط شريط لاصق اسود علي الكاميرا بتاعة اللابتوب لأن أي حد حتي ولو محترف بسهوله ممكن الهاكرز يتجسسوا عليه و من الأفضل اني دايما اتعامل مع المايك و الكاميرا انهم دايما مفتوحين و ما احطوش في غرفه نومي أو في أماكن خاصة
– ممنوع منعا باتا ضغط أي لينك يتبعتلي من أي شخص حتى لو أعرفه و الأفضل أدور انا علي اللينكات اللي انا عاوزها حتى لو لينك خبر من موقع إخباري أو حتي يوتيوب لان الهاكرز بيعملوا خدع كتير علشان يخترقوني
– بلاش أحط أي مستندات مهمة أو صور خاصه علي اللابتوب وطبعا ممنوع منعا باتا علي الموبايلات أسيب صوري أو أتصور صور خارجة أو ما شابه وبلاش أبيع الموبايل لأي شخص لأنه ممكن يسترجع صوري و يبتزني بيهم
-بلاش تنشر أي صور أو فيديوهات فيها عنف أو قتل أو باسبورات أو بطايق أو فيها حاجات خارجة أو ارفع فيديوهات من مواقع يوتيوب خاصة بقنوات فضائية أو أغاني علشان ريبورت واحد ممكن يطير حسابي خالص
-أي خطوه مش عارف تعملها ادخل علي يوتيوب واكتب كيفيه عملها حتلاقي فيديوهات كتير بالعربي والانجليزي تشرحلك اللي انت عاوز تعرفه بس انت اتعود تبحث و تتعب علشان تتعلم و ما تستسهلش و تدور علي حد يشرحلك كله موجود وحيعلمك كويس بشرح ممتاز
– ضروري يا معلم تكون كاتب ورقه فيها الباسووردات بتاعة الجيميل والفيسبوك لان لو حسابك اتسرق حنعرف نرجعهولك بشرط إنك تكون فاكر كلمة السر بتاعة الميل والفيسبوك و ما تكونش ناسيهم
-ادخل مركز المساعدة بتاعه الفيسبوك فيها شرح بالفيديوهات وبيشرحلك كل حاجة بالتفصيل وكمان تقدر تسال أي سؤال هو حيجاوبك
-التكنولوجيا عاملة زي السلاح لو انت جاهل بيها حتضرك وتقتلك فلازم تتعلمها قبل ما تستخدمها ساعتها حتفيدك و تسليك و تنفعك
-خلي بالك إن فيه لينكات اسمها صفحات مزورة تيجي تفتحها يطلعلك صفحه شبه الفيسبوك ويطلب منك تحط كلمه السر ولما تحطها الهاكر يعرفها ويسرق صفحتك منك فبلاش تحط كلمه السر وتتخدع وحاول تفرق لو عملت الكام حاجة اللي مكتوبين دول سرقة حسابك او غلقه حيكون صعب لدرجه المستحيل على أي هاكر إنه يخترقك بس ما تحطش برضه بطيخه صيفي أوي في بطنك، لأن فيه أجهزة أمنية عندها برامج اختراق وتجسس مدفوع فيها ملايين يقدروا برضه إنهم يخترقوك ويتجسسوا عليك.
تابع الشرقية توداي على جوجل نيوز 
