محمد الشافعى | يكتب : النجاح دايماً فى أوله صعب

النجاح دايما فى اوله صعب ، و لكن لو انت عايز تنجح صدقنى تقدر توصل
الحياة عبارة عن مستويات زى اى لعبه كنت بتلعبها وانت صغير المستوى الاول تلاقيه سهل شويه علشان يحمسك تبدأ ، تلاقى صعوبه بسيطة فى المستوى الثانى وتزيد كل ما تعدى المستوى اللى بتلعب فيه .
لو فكرت كده بهدوء هتلاقى حياتك وتجربتك نفس القصة عبارة عن مجموعة من المستويات كل مستوى محتاج منك تجهيز معين معتقدش انك تقدر تعدى المستوى العاشر بنفس خبرتك اللى بدأت بها المستوى الاول.قبل ما ابدأ فى مجال التدريب مكنش عندى اى خبره نهائى فى الموضوع دا بس كنت حابب الفكره نفسها انك تقف قدام عدد من الناس و تحاول تضيف لهم معلومه او تساعدهم يتعلموا حاجات جديدة كان بالنسبالى شعور رائع ، عملت ايه بقى علشان اوصل للاحساس دا ؟بدأت احضر كورسات واقرأ كتير فى مجالات مختلفه واتعلم من مدربين من خلال youtube يعنى كانت البداية انى اهتميت انى اعلم نفسى بعد فتره معينه اكتسب المعرفة اللى كانت بدور عليها ونقدر نقول ان دا المستوى الاول

المستوى الثانى : بدأت اطبق الحاجات اللى اتعلمتها على نفسى الحمد لله وقدرت اساعد نفسى بشكل كبير واساعد المقربين من صحابى

المستوى الثالث : بدأ بنقل اللى اتعلمته دا للناس وكانت البداية من خلال صناع الحياة شاركت فى تدريب عدد كبير من المتطوعي ودا ساعدنى انى اكون واحد من مدربين مؤسسة صناع الحياة مصر ، ونزلت اكتر من محافظة عملت تدريب فيها لمتطوعين صناع الحياة

حبيت اوسع دائرة الاستفاده اكتر و متكونش مقتصره على صناع الحياة فقط ، ف بدأت انزل اعمل تدريب فى رسالة مع فريق انوار رسالة فى اكتر من مكان وحضرت معاهم معسكرين ،
حد هيسألنى ثلاث سنين من غير فلوس ؟ اه بالظبط كده وكنت مستمتع جدا لانى كنت بستفاد خلال الثلاث سنين
قدرت اصحح اخطاء كتير كنت بقع فيها وعرفت مجموعة من الاشخاص ممتازة فى العمل التطوعى وسافرت امكان كتير لدرجة انى سافرت حلايب وشلاتين عملت فيها تدريب مع صناع الحياة .

المستوى الرابع بدأ مع نزول الجامعات شاركت فى اكتر من جامعة خلال الفترة اللى فاتت ” الزقازيق ، المنصورة ، القاهرة ، العبور..الخ ”

المشاركة كانت عن طريق الاسر الطلابية او الاتحادات وكنت برحب بكل الدعوات اللى بتتبعت على الصفحة لانى كنت فى يوم من الايام ببقى مبسوط جدا لما كانت بتتعمل عندنا فى الكلية اى محاضرة تفيد الطلاب ، فـ شايف ان دا كمان مهم للطلاب اللى بيدرسون حاليا .

المستوى الخامس : كان طبيعى جدا انك تحول الخبرة اللى اكتسبتها خلال تطوعك وشغلك على نفسك لاكثر من ثلاث سنين ، لشغل تقدر تكسب منه وتعمل لنفسك استمراريه فى الحاجة اللى بتحبها ، عايز اقولكم ان الخطوة دى قابلنى فيها تحديات كتير يمكن من ضمن اسبابها ان الناس اتعودت عليك انها تحضر من غير فلوس انما انك تقولهم حجز وكلام من دا فـ مع نفسك بقى .

يمكن نتيجة كده احبطت جدا فى البداية ، بس قولت لنفسى كمل هى اى حاجة فى اولها صعبه وانت لو مصدق اللى بتعمله دا هتصبر ، فى الوقت دا افتكرت انى سألت فى يوم المدرب بتاعى اول ما بدأت احضر تدريب قولت ليه هو امته اقدر اعمل تدريب والناس تبقى حابه تحضر حتى لو بفلوس ؟

قالى بعد ثلاث سنين بس فى حاله واحده انك من دلوقتى تفضل شغال على نفسك ومتقفش
يمكن لما افتكرت كلامه قولت انا كده على الطريق الصح

المستوى السادس : بعد فتره لاقيت ناس كتير مؤمنه باللى محمد بيقدمه ولقيت ناس كتير حابه انها تحضر الكورسات اللى بقدمها وبأى تكلفه ، سبحان الله .

فى المرحلة دى بقى زادت التريقة بشكل فظيع وصلت لدرجة السخرية من البعض ، محبتش اهتم للموضوع لانى شايف ان الوقت بتاعى مهم استفاد بيه فى تطوير نفسى اكتر واكمل اللى بعمله وان اللى بيتكلم بكره يزهق ، ويكتشف انه كان بيضيع وقته على الفاضى ولو اهتم يطور نفسه كان هيبقى افضل له .

مازالت الرحلة فى المستوى السادس الحمد لله على كل اللى وصلت ليه كل ما افتكر موقف صعب مريت بيه و اقول لنفسى مستحيل حاجة تتغير اتفاجئ بكرم ربنا و توفيقه ، اقوم اتكسف من نفسى و اقول خلى عندك حسن ظن بالله وافكر نفسى بأن الأمل الحاجة الوحيده اللى اتخلقت فى الحياة لتبقى علشان نقدر نحقق كل حاجة بنحلم بيها
اكتر حاجة بتسعدنى بعد نهاية كل كورس بقدمه احساس الرضا اللى بحسه من متدربين الكورس و خاصة فى المجموعات اللى اتعملت من كورس الثقة بالنفس وحجم التغيير اللى بيوصله المتدربين حقيقى حاجة تفرح جدا ، ان ربنا ييسر للواحد انه يكون فى يوم سبب فى مساعده غيره انهم يتغيروا و يعملوا الحاجه اللى بيحبوها .

لو عندك حاجة نفسك تعملها فى حياتك ، كمل فيها للنهاية افضل من أنك تيأس من احباط الناس او الصعوبات اللى ممكن تقابلك و طبيعى لازم تكون عارف ومتأكد ان فيه صعوبات هتقابلك و بفضل اكد على كده فى التدريب يعنى الموضوع بالنسبالى مش كلام نظرى بيتقال بهدف تخدير المتدربين ، و لكن الشطارة انك تعرفهم الواقع فيه ايه وازاى يقدروا يتعاملوا معاه .