مقالات القراء | نهى مشهور تكتب : ليسو شياطين و ليسو ملائكة بجلابيب ناصعة البياض

في الواقع العنوان ده المقصود بيه الإخوان المسلمين
حملة هجوم شديدة عليهم و بشراسة
لان كل الناس توقعت انها تشوف ملائكة مثلا او ناس و العياذ بالله معصومين من الخطأ و يمكن ده علشان شعار الاسلام هو الحل
أولا مش كل إخواني شيخ
يعني مش كل واحد بدقن و مقصر و يقول انه من جماعة الاخوان المسلمين كلامة مصدق بيه

أولا نجيبها من كام سنة كده
إمتى زادت شعبية الإخوان المسلمين؟؟ او امتى ازداد تضامننا معاهم
لما كانو كلهم و واقفين جمبنا كلنا على نفس الرصيف اللي بنقول فيه لا للتوريث و كلنا حاسين بقهر وظلم و كبت و إنعدام الأمل

أعتقد أيامها أي وزه معدية و قالت انها ضد النظام كنا أخدناها مثل أعلى

يعني أيامها كلنا إتساوينا في الظلم

و لكن ….

كلنا كنا عطاشى للحرية و التعبير و الإنسانية اللي أساسا حتى مدرسناش معناها
كنا بنتفرج على الأفلام الاجنبي و حرية الانسان و حقوقة ده حتى حقوق الحيوان و كنا بنعتبر ده خيال علمي
و نقول الناس دي عايشة على أي أرض
في حين طبعا إن العيب كان عندنا
إحنا اللي مكناش عايشين

الإخوان و مش كلهم فعلا و أنا بأكد مش كلهم كانت عينهم مع الحرية زينا و اقلية النفوذ منهم عينها على السلطة

أنا عن نفسي إتعاملت مع ناس كتير منهم كتير جدااااااااااااا
منهم ناس مؤمنة فقط فقط فقط بالدعوة و نشر الوعي الديني و نشر الاخلاق و الانفتاح العلمي
و لولا معرفتي الشخصية و قرابتي بيهم كنت زي اغلب الناس خفت منهم
بس بالعكس منهم نماذج أقسم بالله أفخر بيها جدااااااا
و منهم ناس لما كنت احضر ليهم حديث بحس ان مصر بخير و في امل
و ناس خايفة على البلد و عايزة تخدم الناس لوجه الله
و مثقفين دكاترة و مهندسين و دارسين برة
حاجه تشرف

و ناس تانية عينها على الكرسي و على اي كرسي ممكن يتقعد عليه و يكون ليه كلمة

خطورة اللي عينهم على السلطة مش في عددهم لانهم مش كتير في مؤسسة الاخوان على فكرة
خطورتهم تكمن في مواقعهم
لإن الاخوان طبقات

طبقة منفذة و مطيعة و لا ترد أمر أو كلمة جت من أولي الأمر

و طبقة أولي الأمر

و اللي غالبا الانشقاق بيجي من عندهم

و طبعا على فكرة الإنشقاق ده موجود من زمان بس مكنش باين لان سواء انشقيت منشقتش مكنش هيطلعلك صوت فخلينا تحت عباية و كلمة واحده

على الاقل للحفاظ على قوة الكيان رغم ضعف الجميع امام سطوة النظام السابق
إنما حاليا كل كلمة بتتسمع لاننا اساسا أكتشفنا قدرتناعلى الكلام و بيكون ليها صدى و كل واحد عايز يظهر اسمه على الساحة و اسمه مفرد لانجاز شخصي و شهره فردية إذا أحب و ده مش تعميم انا بتكلم عن أصحاب المطامح الشخصية

و بقو أشهر من نجوم السينيما و التليفزيون و ليهم برامج و أراء قوية أحترم بعضها و بضرب كف بكف على البعض الاخر

ممكن نقول حقهم كانو مكبوتين و كلنا كنا كده
انا اول مرة اهتم اساسا اني اعرف مين الوزراء
و اول مرة اهتم بمتابعه البرارمج الحوارية و الاخبارية

و لكن اللي بيصعب الامور لبس عباية الدين و انا من جوايا طموحي سياسي
و دي اتكشفت كتير الفترة اللي فاتت
مرة يقولو مش هنشارك نهائي علشان محدش يشكك في نيتهم
و مرة احنا مش هنشارك في جلسات الحوار الخاصة برسم شكل عام و امال للدستور الجديد المرتقب لاننا ضامنين أغلبية في المجلس و لنا كلمة قوية فيه

و مرة مش هنشارك في الرئاسة
و بعدها انشقاق أفراد طامحين للترشح

و حدث ولا حرج عن موقف اليومين اللي فاتو دول بس
يوم الجمعة 27
و مانشر على موقعهم و ما تم حذفه و تعديلة

و احراج بعض أعلامهم اقربهم الاستاذ صبحي صالح مع منى الشاذلي

ازاي يتكلم ان لولا وجود الاخوان في مصر مكنش حد حافظ على الاسلام
و كلام تاني مستفز
كل ده لان الاساس في نشر الدعوة او الحفاظ على الاسلام مبقاش هدف موحد و صرف و أوحد
دخلت شهوة السلطة في نفوس البعض

الفكرة في المجمل انهم مش شياطين و لا ملائكة
قد يتوقع الكثيييييييييييييير مننا ان يكونو في قمة الطهارة و العفة فقط لارتدائهم عباءة الدين
و لكن هناك من لا يدرك قدسية هذه العباءة نهائيا
خصوصا إذا كانو من ذوي الراي و الكلمة المسموعة فيهم

زي ما بيتقال كده غلطة الشاطر بجووووون

الممتع ان حاليا الناس بقت عايزة تتابع و تسمع و مبقتش مسلمة دماغها وودنها لشخص او جهه واحده
من الاخر محدش بيدي ثقة كاملة بنسبة 100%

أثق فيك و أصدقك ماشي بس عيني عليك
و تصرفاتك قابلة للنقد و التعديل مني
و متتكلمش باسمي الا بإذني
و باتفاق

مشكلة الاخوان بس انهم لابسين عباية الدين و دي عباية ليها قدسية
فالبتالي لازم يحافظو عليها قوي
و يسيبوهم من الطمع في السلطة اللي بعضهم مركز عليها لدرجة ان الناس العادية اختلط عليهم الامر و فقدو ثقتهم في الجماعة و نيتها

او يقلعو عباية الدين و يركزو في السياسة و هما و ظروفهم بقى

خلاصة القول الناس لازم تبطل فكرة انها ترسم ليهم صورة انهم يا ملايكة قوي يا شياطين بشعه
بالعكس هما ساهمو في حاجات كتير و نظامهم الدقيق في التحرك بصراحة شيئ يدعو للاعجاب من وجهة نظري رغم خوف ناس كتير منهم
اعتقد هماالفئة الوحيده المنظمة وسط فوضى عشنا عليها عقود

اي حزب سياسي قديم في مصر بعد الثورة عامل زي اللي كان مجبس رجله
هو كان ماشي على رجله و هي متجبسة بس بيعرج و مش موزون و مشي بسيط بردو

فجأة قالو خفينا و هنفك الجبس
قال كويس انا اساسا بعرف امشي شوية و اتعكز دلوقتي همشي كويس و اجري

و اول ما يحط رجلة بكل ثقة و ياخد اول خطوة هوب يقع و مش حاسس برجلة دي اصلا

فجأة اكتشف انه لازمة شوية علشان يتعلم يحط رجلة على الارض
و يتوازن
مش زي ما كان متخيل نفسه

و ان شاء الله ربنا يعدي الايام دي على خير و نقعد نقراها و تستمتع بيها في كتب التاريخ و نقول شفت بعيني محدش قالي

بقلم : نهى مشهور

أحد أعضاء موقع الشرقية توداي

تابع الشرقية توداي على جوجل نيوز