استيقظ هذا الصباح … نشيطا مفعما بالأمل
سيقول لك شيطان نفسك أين الأمل لقد ضاع الأمل
لا تستمع إليه !!! هذا أول درس لك …
(اخترع الأمل ياعم هو حد لاقى حاجة يخترعها … قول لنفسك كده وخلاص …)
ثم …
افعل ماهو جميل .. ابدأ بابتسامة … لنفسك فى المرآة … اذهب وصل ركعتين وقم إلى كتاب الله فاقرأ آيتين … وسطرين من ورد الأذكار الملقى على سطح مكتبك … ثم فكر فى يومك المشرق …
(أيوة مشرق … وايه اللى خلاه غامق …)
طبعا أكيد انت بتفكر فى امبارح أو أول امبارح أو الأسبوع اللى فات… رئيسك فى الشغل قارفك … أو زميلك اللى كنت بتحسبه حبيبك بيألف كلام من وراك … أو زميلتك بتحاول تخليكى وحشة قدام الناس … أو المنافسين ليك فى السوق متكتلين عليك … أو أمين شرطة امبارح غلس عليك وانت يما جيت تزعقله كان المفروض تزعقله أكتر – ثورة بقة – وندمت انك مش ضربته مثلا … أو حتى كنت معدى على لجنة ومعرفتش تتمنظر على الظابط وتعدى من قدامه وانت مش عامل الحزام أو مش بتتكلم بالموبايل ولسان حالك بيقول … لو راجل وقفنى !!! …
أكيد بتفكر فى حبيبتك اللى سابتك أو الواد الهايف اللى انتى كنتى مقطعة نفسك عليه … وأيام العذاب والحب من طرف سابع وحاجات زى دى …
….
لا تندم على مافات …
اذهب هذا الصباح وقابل رئيسك فى العمل بابتسامة صفراء … هتغيظه أكتر
زميلك فى العمل …. واجهه ياعم وقوله آه أنا قلت الكلام اللى انت مطلعه على وأعلى ما فى خيلك اركبه !!!
اذهب لأقرب لجنة مرور … وحاول الالتزام بالقوانين … صدقنى لو رجل شرطة محترم هتزود من احترامه لنفسه وهتكون كسبت فيه حسنة … ولو ظابط من إياهم بتوع خليها تخرب … هتغيظه أكتر وأكتر …
تذكر حبيبتك … تذكرى حبيبك … ما العمل إذا … طناش تام وكامل واللى خلق بنى أكيد خلق أحسن منه ملايين كتير …
اذهب بعد العمل … حاول أن تجد فقيرا فتعطيه صدقة
أو مريضا لتزوره
اتصل بعشرة من أصدقائك القدامى … أو أساتذتك فى المدرسة او الكلية (مش كلهم يعنى يستاهلوا يعنى متطغطشى على نفسك وتكلم واحد كان بيضربك كتير فى الفصل قدام زمايلك ولا دكتور كان كاره نفسه وبيعيد زمايلك السنة لو اتصلت بيه هتخليه يفتكر إن اللى كان بيعمله صح وهتاخذ ياعم ذنب الغلابة اللى واقعين تحت ايديه) …
امال ايه العنوان ده !!!
ما القصد بالبضاعة !!!
أقصد … هى أشياء لا تشترى …. هى أشياء تشعر بها معنويا
بضاعتك الفكرية يعنى …
مش فاهم ياعم !!! فهمنى أرجوك …
أنا أقصد أفكارك البالية … وأفكارك الجديدة المشرقة … انسف فكرك القديم (يعنى)
لا تحزن … لن تكسب شيئا من الاكتئاب … !!!!
لا تجزع … الصبر جميل … جدا جدا جدا وخصوصا قدام أى موظف حكومى …
لا تسب أحدا … لا تشتم أحد … لا تغتب … مش هتستفيد حاجة غير إن اللى قدامك هيقلل من احترامه ليك !!!
تذكر من أساءوا إليك … مش لازم تعبرهم … بس مش يستاهلوا ذرة من تفكيرك … وكمان ياعم لو حد منهم طلبك فى حاجة بعد كده اخدمه … انت قلبك أبيض وكبير … انت أكبر من كده …
تخلص من العفن الفكرى الذى أوقعنا فيه نظام فاسد
تخلص من مبارك بداخلك …
هيا تخلص منه … لا داعى لان أكررها … كررها أنت بينك وبين نفسك … تخلص من مبارك من مبارك من مبارك ….
وتخلص من عقدة ستوكهولم أيضا لا تنسى هذا …
حاول ان تعمل وتعمل وتعمل …
ركز فيما يفيدك … انتظر الخير دائما (تفاءلوا بالخير تجدوه) … حاول أن تعيش حياتك
الحياة لن تتوقف على شخص
على مكان عمل
على وظيفة
على مرتب
على شهادة …
بل تتوقف الحياة عليك أنت …
أحمد عوض بيصار
تابع الشرقية توداي على جوجل نيوز 
