ناس كتير لما تسألنى انت بتعمل كورسات ايه بعد ما اعرفهم يسألوا السؤال المشهور جدا
هو الكورس ده بنأخذ منه شهادة معتمده ؟
علشان الموضوع ده مهم فـ حابب اوضح ليكم شوية حاجات السؤال اللى مهم كلنا نسأله الشهادة ممكن استفاد منها فى ايه ؟
هتكتشف انك مش محتاجها فى حاجة خالص ليه بقى ـ لان اصحاب الشركات هيستفادوا ايه منها لو مكنتش بتعرف تطبق اللى مكتوب فيها بمعنى انت راجل بتقول حضرت كويس ” مهارات التواصل مع الاخرين ومعاك شهادة معتمدة تثبت انك حضرت الكورس ده
تخيل معايا انك قدمت على شغل و دخلت الانترفيو المدير بيسألك هتعمل ايه لو العميل قالك كلام محرج قدام الناس ؟
رديت : من غير ما تفكر تفتكر حضرتك ممكن اعمل ايه غير انى اضربه علشان احرمه يقول كدا تانى
انت بالشكل ده بتثبت ان الشهادة اكبر دليل على انها غير مهمه مادام معرفتش تطبق اللى اتعلمته فى الكورس ، لان عندك اكتر من طريقة ممكن من خلالها تأخذ حقك من اللى قالك كلام ضايقك غير انك تضربه طبعا وده اللى المفروض بتتعلمه فى التدريب.
للاسف بعض المراكز التدريبية وليس الكل بيعتمد على موضوع الشهادات على انها وسيلة كويسة بيحقق منها فلوس ويستغل قلة الوعى عند بعض الناس ويرجع يقول لان العميل عايز كدا على الرغم انه كـ مركز تدريب مهم يوضح للعميل كل حاجة قبل الاشتراك فى الكورسات اللى بيقدمها .
للعلم مافيش حاجة اسمها شهادة معتمدة لكورس بـ 300 او 500 جنيه لان الاعتماد مكلف جدا واقل اعتماد فى مصر هو شهادة ICDL غير كدا بقى كل الاعتمادات فى الكورسات المتخصصة بفلوس كتير
ابعد عن الكورسات اللى يقولك فيها ده اعتماد جامعة القاهرة وجامعة كامبردج وحاجات تانية كتير كل دى اعتمادات غير صحيحة علميا مثال توضيحى لو انت من المنصورة وحبيت تأخذ كورس مهارات العرض والتقديم و المركز قالك بعد إنتهار الكورس هتحصل على شهادة معتمدة من اى جامعة ، الاعتمادة ده معناه ان المادة العلمية والمدربين من الجامعة دى لو ده مش موجود يبقى الشهادة حبر على ورق ملهاش لزمة .
فى النهاية
* احضر كورس علشان تستفاد منه وليس علشان الشهادة
* الشهادة مش هى اللى هتشغلك انما خبرتك ومهاراتك
* النصب كتير حاول تسأل وتعرف قبل ما تدبس
* الكورس مش بس انك تحضر اهم حاجة انك تطبق اللى اتعلمته
* الاعتماد الحقيقى فى خبرتك
* ساعد غيرك يعرف يعنى ايه شهادة معتمده بدون ما تفضل تخبط فى المراكز اللى ممكن تكون مبتعملش كدا وعايزة تقدم علم حقيقى
* قبل ما تطلب الشهادة المعتمدة اسألك نفسك هتعمل بيها ايه ؟
* الكلام ده من واقع خبرة عملية فى مجال التدريب او من خلال شغلى كـ مدير مركز تدريب حالى
مقالات الرأي تعبر عن وجهة نظر صاحبها ولا تعبر بالضرورة عن الشرقية توداي
تابع الشرقية توداي على جوجل نيوز 
