دي لا شغل ولا فرصة انها تتحسن و كل الي فيها حرامية وناهبين رزقنا و عالم همجيه في الشارع و قلة أمان و سرقة
و ثورة غرقت البلد أكتر
هو لازم يعني اخرج منها علشان أخد بالي من شوية حاجات تعرفني بحبها ليه
كل الي سافر و سابها وراه قال مفيهاش حاجه تتحب
بس اول ما يروح هناك يقول لا مشتاق لها
ليه يعني ده انت كسرت قله و انت خارج منها و حالف لو قدرت ما ترجع لها تاني!!!
ده انا بس لما بخرج من الشرقية بس بشتاق للشرقية مابالكم بمصر كلها
ليه يعني؟
علشان لما بكون ماشية بالشارع و ألاقي واحد أو واحده سايقة عربية وقفت علشان في ست عايزة تعدي الطريق و خايفة و خصوصا لو شايله طفل يقفو لحد ما هي تعدي و قبل ما تعدي يشاورولها عدي احنا واقفين
منظر الست و هيا مطمنة و هتعدي فيها سحر معرفش هو ايه
في ناس محترمة و يفتحو النفس
يمكن علشان فيها أهلي و ناسي و أصحابي الي ممكن في يوم كده نسهر سهرة حلوة في البيت ولا حتى في أي مكان و لو حتى هنشرب شوية شاي بس و نقعد نضحك قوي و نفتكر في حاجات قديمة و نتكلم في كل حاجه و نقوم و احنا مصممين لازم نقعد تاني
ولو ولد هيفتكر وقفته على ناصية الشارع مع اصحابة ممكن للفجر و يفتكرو أي مواقف حصل ليهم و مقالبهم في بعض مع كباية شاي سخنة كده و على شقشقة الفجر يروحو يقفو على أقرب عربية فول موجوده؟
هحبها ليه يعني
علشان حتى لمة في العيد ولا في فرح و لا مناسبة و شوية بمب و صواريخ و بلالين نلعب بيهم و أطفال المكان تتلم و ضحكهم يكون أحلى من أحلى موسيقى ممكن تسمعها و يجرو و يتنططو حوليك كده
علشان مثلا لو وقعت لا قدر الله في ضيقة تلاقي زمايل شغلك بيعرضو عليك المساعدة مادية ولا معنوية و بيكونو قاصدينها بجد و هيحس بده الي متغرب برة مصر
علشان يوم لقيت رقم واحده صاحبتي متصل بيا وواحدة غريبة بترد عليا بتقولي ده اخر رقم لقيته متسجل و صاحبة الرقم وقعت و نقلناها المستشفى
جريت لقيت 5 بنات واقفين حوليها يطمنوها و هي متعرفش حد و فجأة بتلفت ملقتش واحده فيهم أقولها شكرا حتى؟ و لقيتهم جايبين لها عصاير و ماية …. تفتكر لو برة هيحصل ايه
طيب رمضان و جو مصر في رمضان الي عمرك ما هتلاقيه في أي بلد عى مستوى العالم
عيال الشارع الصغيرين الي بيجمعو من مصروفهم علشان يعملو الزينة بايديهم
و تلاقكي بكر الخيط و الزينة بيتنطط من بلكونة للتانية و حد يخبط
و تلاقي طفلين واقفين يقولولك ممكن لو سمحت ندخل البلكونة نعلق الزينة و مش هنبهدل حاجه و الله
فجأة تلاقي نفسك قلبت طفل معاهم و ركب هنا و علق هنا
و الشباب الكبار ماسكين الخوص و السليوفان و بيعملو فانوس يدوي
وواحد من الجران جاب فانوس تاني كبير و علقه في نص الشارع كمان
وأول ما يخلص تسمع هيييييييييييه كبيرة
و الشارع ينور و الزينة في عز النهار عامله ضليله من كثافتها و جمالها
و كله يطلع الفوانيس الجديدة و يغنو حالو يا حالو
و نصبات الكنافة و القطايف و ريحيتهم الي تشدك من اخر الدنيا
وصيجان الكعك و البسكوت في اخر 10 أيام من رمضان و طبق الكعك الي داير بيوت الشارع كلها علشان كلهم يدوقو عمايل بعض
تصدقو فعلا مفيهاش حاجه تحب
علشان لما بشوف سواق ميكروباص رغم ان أغلبهم مش كلهم بتوع مشاكل
بس يجي راجل ولا ست و مش قادر يدفع يقولو ممكن توديني المكان ده بس مش معايا أجرة يقوله إتفضل يا والدي انت على راسي من فوق
و لما أعرض اني ادفع مكان الست أو الراجل
يقولي لا يا أبلة دي بركة و حلت عليا
علشان لما مرة تهت في دهاليز مصر الجديده بليل سالت واحده ست ماشية مع جوزها عن الشارع قالتلي معرفش بس هسال معاكي
أقولها لا شكرا تقولي أبدا منسيبكيش تايهة لوحدك دلوقتي و جوزها يقولي يا بنتي مش هسيبك الا لما توصلي تماما و يفضل تلت ساعة كاملة يسالي لحد ما وصلني ولا أعرفهم ولا يعرفوني حتى معرفناش الأسماء و لما أشكره يقولي ده واجب انا معملتش حاجه زيادة تشكريني عليها
بلد ايه دي الي لو نزلنا عملنا قافلة ولا معرض في بلد أرياف دي كام ساعة و هنمشي تقوم خناقة في البلد كلها بسببنا
بيتخانقو مين هيفتح لينا بيته و يدخلنا نتغدى ولا نقعد عنده نرتاح
و الست الي خرجت جوزها و ابنها الي في الاعدادي و قالت أبدا ما هتتوضو ولا تصلو في بيت حد غيري انا خرجت جوزي و ابني و غسلتلكم الحمام بقى زي الفل
و العمده و شيخ البلد و أهل المكان ماسكين في بعض برة و كلهم خلو ستات بيوتهم جهزولنا غدا
يا جماعة عايزين نمشي علشان نروح بدري و منتأخرش و مفيش فايدة لدرجة انهم لفو لينا فطير و أكل و أقسمو علينا الي مناكلوش ناخده
علشان مرة على طريق منيا القمح بتاعنا عربيتي عطلت و صممت متتحركش و كنت بعد العشاء
ووقفت و كلمت حد يجيلي و أنا وقفة في الشارع و بدعي ربنا يستر من الوقفة دي لقيت بوكس شرطة معدي و نزل الظابط الي فيه و قالي في ايه قلتله العربية عطلت و مستنية حد يجي يشوفها راح هو بنفسه جه و شافها و هو و العساكر الي معاه معرفش عملو ايه بس اشتغلت و صمم انه يمشي ورايا لحد منيا القمح جوة رغم إنها مش طريقة لحسن العربية تعطل مني تاني و فعلا مسابنيش الا لما وصلت و موقفش حتى أشكره
يا سلام
هو علشان في مرة عرفت خبر وحش و انا برة في الشارع و غصب عني عيطت و أنا واقفة من صدمتي و وقفت في جمب على ما أتمالك أعصابي لقيت ست و كانت مسيحية على فكرة جت من ورايا طبطبت عليا و ناولتني مناديل و قالتلي قولي يا رب يا حبيبتي و هو هيفك كربك و حزنك ده و ممشيتش الا لما كنت هديت و جت عربية توصلني يبقى احبها
و الله إنتو عالم غريبة
دي بلد تتحب دي
أنا عارفة انها بترابها و قلة شغلها و فساد ناسها مش عاجبة الكل انما علشان كل الي فوق انا صابرة عليها و بحبها و هحبها و الي عايز يخرج منها يخرج و هيندم على ده لما يلاقي نفسة غريب في مكان لا كف يطبطب عليه ولا يناولة منديل و يقوله قول يا رب لو دموعة نزلت
جايز لأن رزقهم مش فيها لسه خرجو و سابوها
بس في الي سابها و قلبه متعلق بيها
متعلق بأهل أو حبيبة أو قعدة حلوة و شوية صحاب و عمرها ما تهون عليه
لما بيرجع ليها أو بيجي أجازة اللهفة بتكون هتنط من عنيه على اللقاء ده
لا عمره جرح فيها و لا أقسم ما يرجع ليها ولا نكرها زي غيره كتير مش مرغوب فيهم
ده مش حب ده عشق
بقلم : نهى مشهور
(( جميع ما ينشر على الموقع من مقالات القراء تعبر عن رأي صاحبها ولا تعبر عن رأي الموقع ))
تابع الشرقية توداي على جوجل نيوز 
