في طرق كثيرة جدا للتواصل .. بس للأسف أغلبنا مفتقدها ومفتقر جدا للبراعة في استخدام الوسائل اللي ممكن تكون عامل أساسى في التواصل ما بينا .. المعاملات أصبحت قاسيه جدا .. التواصل قل سواء التواصل العائلي أو الاجتماعى باللي حوالينا ووصل بينا الحال في بعض الحالات لانعدام التواصل الأسري داخل البيت الواحد .
الضغوط ومشاغل الحياة والانشغال “بلقمة العيش” وكأننا في سباق مع الحياة ..
كل الامور دى خدتنا من اننا نتواصل باللي حوالينا ..كمان البراعة في الكلام والرد أصبحت شئ معدوم،
الكلام أصبح قاسي جدا فى المعاملات وإن كان أغلبنا طريقته وأسلوبه اصبح منفر جدا للناس من حوالينا .
حقيقي حاسين بالغربة حتى في وسط أهلنا .. لإن باختصار مفيش لغة حوار حقيقه وتواصل حقيقي مبنى علي الاهتمام منك بيهم ..ومبنى علي التقدير منهم ليك .. لازم نكون عارفين إن الإنسان بطبيعته اجتماعى والإنسان اللي تواصله محدود مع المحيطين بيه ده اشبه بالسجين .. نفسيا ..هو نفس شعور السجين اللي حاسس بالعزله عن العالم الخارجى وده في النهاية ممكن يوصلنا لنهايات مأسوية من أكثرها انتشارا حاليا ‘الاكتئاب’ .. لازم نتواصل .. لازم نتكلم كلام يجذب الناس لينا ومش العكس .. لازم نعرف كويس إن صلة الرحم اللي ربنا وصانا بيها من أهم سمات التواصل .. إحنا محتاجين الراحه النفسية اللي فعلا مش هنلاقيها غير في التواصل الحقيقي الواقعى مش التواصل المزيف أو ما يسمى بتواصل العالم الافتراضي اللي اجبرنا وعودنا علي إن التواصل أصبح كلام مرسل فقط.. كلام خالى من محتواه.
تابع الشرقية توداي على جوجل نيوز 
