تعرف علي أهل الكرم من «قاموس الشراقوة»
كتبت | إيمان سالم
في كل مكان في مصر وخارجها كلام بيميز كل شبر , مع كل حرف بيتنطق تبدأ تحلل فلان من الصعيد لا من الشرقية لا ده قال أيووه يبقي اسكندراني .
بين ” مش والله الوكيل ” وغيرها من الكلمات اللي بتخليك تقول أهلا يا شرقاوي , والله زمان وتفتكر معاها كل صاحب ليك عرفته من الشرقية او حتي لو كنت مسافر قد ايه تفرق معاك في الغربه انك تقابل حد من بلدك ومهما حاول يداري هتلاقي بين كل جمله والتانيه ” كلمة ” بتعرفك انه شرقاوي .
كل حاجه ليها طعمها سواء أكلتها او صورتها او كلامها ولو فكرت شوية هتلاقي الشرقية مختلفة في كل حاجه جايز يكون في سلبيات لكن متقدرش تحرم نفسك من الفطير العسل الاسود والجبنه القديمة مثلا , أو قعدة علي قهوة من بتوع زمان مع صحابك أو الجو اللي ممكن يكون فيه شوية حطب محروقين علي الطريق في الشتاء او حتي حد ممكن يقولك يا ” ش . ك . ع ” ولما ملامحك تقفل قدامه يقولك “شرقاوي كريم عظيم ” , ولما تضيق علي حد صاحبك وتفكر تعزمة ويتكسف منك تسكته بكلمتين “ احنا اللي عزمنا القطر “ فيضحك والحياة تمشي , كل ده في الشرقية ” مش ” بس كلام علي الفاضي لان كل مكان عشنا فيه وطن جوا الوطن الكبير مصر .
لو هنقول بعض الكلام الشرقاوي اللي بيخلي اي حد في اي مكان يشاور عليك ويقولك بدهشة ” انت شرقاوي ..!؟ “
– مش
– الله الوكيل
– ايجا = جه
– منٌيين = منين
– حدانا , حداهم = عندهم
– إهناك = هناك
– هتي = حتي
– هدني = هابقي
– علاوله = خالص
وكلام كتير كلنا بنقوله ساعات بالفطرة وده مؤشر للأصالة لأن اي مكان بيعلم جوا أهله لازم يتكلموا لغته .
المصدر | الشرقية توداي