أجري الحوار | إيمان سالم
1- بدايتك وليه بدأت فكرة 30 ثانية بالتحديد ؟
- بدأت فكرة 30 ثانية لما قررت أرجع للتمثيل بعد ما بعدت عنه أكتر من 12 10 سنين ؛ انشغلت وقتها بالعمل كصحفي لغاية ما وصلت لرئاسة تحرير مجلة باسم.. وكنت في نفس الوقت بكتب مسلسلات كرتون زي ” بسنت ودياسطي والقبطان عزوز وكراكيب ” ؛ بعدها قررت ارجع للحلم القديم وهو التمثيل.. فبدأت بإنتاج أفلام قصيرة منها حاضر مع المتهم وفيديوهات 30 ثانية اللي قررت اعملها زي عملية إحماء لأعمال أكبر.. والحمد لله الناس حبيتها وده شجعني , ممكن الناس تمل لو الكتابة والأداء ما فيهومش جديد.. لكن القالب نفسه يحتمل مليون حلقة لسه عندي أفكار كتير .
2- لو اتعرض عليك برنامج تلفزيوني ساخر هتقدمة ؟
– أنا مش رافض فكرة العمل كمذيع لكن حابب دوري في الحياة كممثل.. التمثيل هو العشق الأولي.. ولكن لو لقيت برنامج محتاج إمكانيات تمثيلية وبعيد عن التجريح في أي حد.. ومكتوب كويس.. هاعمله طبعا أنا شايف العالم كله في حالة تغيير كبيرة.. عاملة زي حركة التنقلات اللي بتحصل في المصالح الحكومية .
3- شايف مصر في المرحلة دي ازاي ؟
– وأنا الحقيقية ما بفهمش في السياسة.. كل اللي ممكن أقوله عن مصر اني سافرت وما اقدرتش ابعد عنها.. ومش عايز امشي.. لأني بحب أضحك المصريين.. بالنسبة بقى مزاج.. وتحدي انك تضحك ناس أصلا دمهم خفيف .
4- تقييمك للإعلام خلال فترة الثورة وحاليا ؟
– الإعلام زي أي صنعة في مصر.. كل الصناعات في مصر بتمر بأزمة.. وطبعا الإعلام منهم.. لكن ملفت جدا ظهور إعلام بديل وهو الانترنت وأنا ما اقدرش أقيم غير الإعلام الترفيهي لأن ده اللي بحلم اشتغل فيه أنا مش أحسن حد يتكلم عن الإعلام الخبري أو السياسي أما الإعلام الترفيهي فمحتاج في كواليسه تدريب على أعلى مستوى لجيل كبير من الشباب على الكتابة؛ مشكلتنا في الكتابة الشباب لو يعرف بس هو بيحلم بإيه, يعني لو كل شاب في سن الجامعة يدور على دوره الحقيقي في الحياة.. ويشتغل على تنمية الدور هاينبهر من النتايج وهايلاقي نفسه فجأة قاعد مع الكبار .
7- كلمة توجهها للشباب الشرقاوي بشكل خاص والمصري بشكل عام !
– يا ريت الشباب يدوروا على أحلامهم لأنك قبل ما تلاقيه هاتبقى بتلف في حلقة مفرغة.. أما شباب الشرقية فأحب أقول لهم.. اني لما كنت عسكري في الجيش عرفت ان لكل محافظة طابع خاص.. واتأكدت بلا شك ان أهل الشرقية ناس يعرفوا معنى الصداقة الحقيقي وبيقدروا البشر.. واسمع ان فيه نشاط رياضي مميز جدا عندكم.. وتحديدا الهوكي لو ما كنتش غلطان.. وبعدين دي بلد عبد الوهاب وعبد الحليم وشادية واحمد زكي وصلاح جاهين.
المصدر | الشرقية توداي
تابع الشرقية توداي على جوجل نيوز 
