أعلن المهندس كامل الوزير، وزير النقل والمواصلات، إنه سيتم إلغاء كل السلالم على الطريق الدائري قولا واحدًا، “الناس أثاروا الفترة اللي فاتت مشكلة السلالم في منطقة السلام بالتحديد، ده كانت معمولة من الخشب، وكان بيطلع عليها العمال بتوع الشركات، عشان العربيات تاخدهم من فوق الدائري ويبقوا جنب البيت”.
وقال “الوزير”، خلال مداخلة هاتفية في برنامج “الحكاية”، مع الإعلامي عمرو أديب، على شاشة “MBC مصر”، “بس إحنا مش بنخاف ولا هنضحك على الناس، ولا هنقول لحد كلام مش هنعمله ولازم أقول بكل صراحة لكل الناس إحنا مش هنعمل سلالم على الطريق الدائري”.
أضاف متسائلًا «نعمل سلم عشان المواطن يطلع عليه يوقف عربية من فوق الدائري ويعطلها ويزحم الطريق والسيارات تعمل حوادث؟، الناس بتعمل كده بشكل مخالف، ده فيه ناس بتطلع مخصوص فوق الدائري من على السلالم دي عشان ترمي أكياس الزبالة فوق، سواء كان جنبها مقلب قمامة بعيد أو قريب».
شاهد أيضًا: هبوط أسعار الدواجن والبيض والرومي والأرانب والبط
وأكمل الوزير، أن المواطنين يلقون القمامة على الطريق ، “خلاصة الكلام مش هنعمل سلالم على الطريق الدائري، اللي عاوز يركب الميكروباص يركب من تحت، الموقف في المرج تحت وموقف السلام تحت، هنعمل 17 موقف تحت الدائري في تقاطعات الطرق الرئيسية”.
وأردف: “هنلغي كل السلالم دي، والناس تركب الميكروباصات من تحت، ونمشي على الدائري من فوق الأتوبيس السريع، هنلغي السلالم لما نعمل المواقف، هنعمل المواقف تحت الطريق الدائري وخدنا توجيه بكده، كل الطرق الرئسية والميادين الرئيسية زي السلام والمرج والخصوص والإسكندرية الزراعي، والإسكندرية الصحراوي والقاهرة الجديدة والمعادي، وغيرها، هيبقى فيه مواقف للعربيات تحت”.
وأضاف: “هيبقى كمان فيه باركنج للعربيات الملاكي، لو الشخص حب يركن سيارته تحت الدائري ويركب الأتوبيس السريع اللي هيمشي 106 كيلو في الساعة”.
تابع الشرقية توداي على جوجل نيوز 
