خلال الساعات الأخيرة تصدر الفنان شريف دسوقي محرك البحث جوجل، وتريندات مواقع التواصل الاجتماعي، وذلك بعد إعلان خضوعه لجراحة لبتر قدمه بعد مروره بأزمة صحية ومضاعفات استدعت ذلك.
كما أن للفنان مصطفى درويش دورًا في إثارة الجدل حول ما تعرض له “دسوقي” من إهمال وظلم من قبل نقابة المهن التمثيلية، وهو ما تسبب في تدهور حالته الصحية وحدوث البتر لقدمه، على حد قوله.
شريف دسوقي
حيث قام درويش بكتابة منشور أعلن فيه تعرض شريف الدسوقي لبتر قدمه بعد تدهور حالته الصحية مؤخرًا، وذكر أن نقابة المهن التمثيلية كان يمكنها إنقاذه، ولكنها تأخرت في ذلك لأنه ليس عضو عامل.
قائلًا:
لا حول ولا قوه إلا بالله اللي حصل لشريف دسوقي ده حرام حسبي الله ونعم الوكيل في اللي كان السبب، لو كان حد وقف من النقابة اتحرك قبل ما يتعمل فيه الكارثه دي كان اتلحق..
وتابع درويش: بس للأسف النقابة قالت لبدرية طلبة لما استنجدت بيهم أصله مش عضو عامل فمش هينفع النقابة نفسها تساعد لأن ده قانون بس هنبعت مساعدة شخصية..
واستكمل: طبعًا كتر خيركم وده قانون وعلى راسنا، بس طيب كنتم روحوا هاتوه وقولوا لينا ما كل المنتجين والممثلين معاهم فلوس ياجدعان وكله هيساعده ومحدش هيتأخر.. حتى كنا شوفنا حل قبل ما تحصل فيه الكارثة دي و يقطعوا رجله، ويترمي في مستشفى أقل ما يقال عنها تحت السلم
وأضاف مصطفى:
بجد اللي حصل ده حرام، حقك عليا يا شريف سامحني والله ما كنت أعرف أنك في الحالة دي حقك عليا والله وقدام الجميع والله ما هسيبك لحد ما أموت أنت مسؤول مني مسئولية كاملة حقك عليا وحقك علينا كلنا
واستطرد:
الأستاذ جمال العدل اتكفل بمصاريف المستشفى والعلاج، وأفراد العصابة كلها متكفلة بكل حاجة، والأستاذة كاملة جابتله طرف صناعي من أحسن شركة للأطراف الصناعية، شكرًا بدرية طلبة إنتي بميت راجل إنتي وناس اسكندرية
وردًا على ذلك، قال الدكتور أشرف زكي نقيب المهن التمثيلية:
ما حدث هو أن بدرية طلبة تواصلت معنا وطلبت جواب تحويل من النقابة وهذا مخالف للقانون لأن شريف دسوقي عضو منتسب، فأخبرتها أن أمر الجواب لا يمكن حدوثه ولكن النقابة ستتصرف ولم أقل لها جملة مساعدة.
وأردف: هنفترض أن المبلغ المطلوب مليون جنيه والنقابة معندهاش المبلغ ده، فانا في اللحظة دي أرسلت رسالة على جروب الأسرة الفنية الذي يضم العديد من الفنانين وأقولهم أنا محتاج كذا
وتابع:
الأسرة الفنية جاهزة تتكفل بيه، وأنا كنقيب لما أكلم أي فنان هيصدقني أنا لما أكلم فنان وأقوله أنا عايز كذا هيبعت وكلهم بيساعدوا ومبيتأخروش، وبالفعل وأنا بكتب الرسالة ولسة مكملتهاش في فنانة مش هقدر أقول اسمها كانت محولة لي الفلوس..
وأضاف ذكي: النقابة لم ولن تتقاعس في الوقوف بجانب أي فنان.
واختتم تصريحه قائلًا:
لما الفنانين بيشاركوا في حاجة زي دي بتكون باسم النقابة مش باسم حد، مقدرش أروح أقول لفلان أن الفنان كذا باعتلك دول نفترض انه مش عايز مساعدة من فلان ده، وساعات بيكون في فنانين محتاجين مساعدة وهما مش أعضاء والنقابة مبتسبهمش وبتتواصل مع الفنانين وبنوفر لهم كافة احتياجاتهم
وفي سياق متصل قام الفنان مصطفى درويش بتعديل منشوره مؤخرًا وأضاف:
دكتور أشرف زكى تواصل معايا وفهمني الموقف وأنا متفق معاه جدًا والنقابة متكفلة بمصاريف المستشفى
تابع الشرقية توداي على جوجل نيوز 
