عارفين ايه أكتر حاجة صعبة ممكن تحصل فى حياة اى شخص سواء ان كان ” ولد او بنت ” انه يعجب بـ حد ويفضل مهتم بيه يعرف اخباره كلها ويتبسط اوى بكل كلمة بيقولها سواء على الفيس او لو اتجمعوا فى مكان مع بعض حتى لو قال اى كلام بيبقى بالنسباله افضل كلام كفاية انه طالع منه اهتمام بقى .
كل ده كويس جدا.
عارفين ايه اللى ممكن يحصل بعد كدا لما الاهتمام بيزيد اكتر وبتوصل لمرحلة بتبقوا فيها خلاص مش قادرين تستحملوا انكم تفضلوا كاتمين جواكم وتقرروا فى اللحظة دى انكم تتكلموا وتعرفوا الشخص ده انه بالنسبالكم حاجة كبيرة اوى وانكم بتحبوا تشوفه مبسوط وسعيد وفرحان ونفسكم تكونوا قريبين ليه اكتر
طبعا علشان تقولوا الكلام ده بتبقوا فى حالة صراع بينكم وبين نفسكم الحالة دى ممكن تحسسكم بـ القلق انكم تتكلموا وخايفين ان الشخص التانى يرفض كلامكم.
فى الوقت ده بيبقى اهون عليكم تفضلوا تهتموا من غير ما يعرف افضلكم من انه يعرف ويرفض كلامكم وتتصدموا من المفاجئة اللى اكيد مفكرتوش فيها يمكن لان بيبقى تركزكم اكتر على انه يوافق وليس انه يرفض فـ احساس الموافقة بيبقى اقرب ليكم من الرفض ولو رفض بتحسوا قد ايه حجم التعب نتيجة للرفض ده بسبب اهتماكم وحبكم انكم تشوفوه سعيد ومبسوط.
ناس كتير ممكن يكون حصل معاها كدا حب من طرف واحد اللى فيه بتحسوا بكل اللى قلناه فوق
فعلا صعب اوى احساس انك جواك حاجات كتير ومحدش حاسس بيك واكتر شخص عاوزين تحسسوا باللى جواكم يطلع مش حاسس اى حاجة ولا عاوز يحس كمان .
بتبقوا نفسكم فى الوقت ده الارض تتشق وتبلعكم وتهربوا من كل الناس كمان بتحسوا بـ أكتئاب شديد ده غير احساس الحزن اللى جواكم والاسئله السخيفه اللى بتتسألكم من كل اللى يعرفوكم تلاقى اللى يقولك مالك فيك ايه انت مكنتش كدا وحاجات تانية كتير انتوا تعرفوها.
فى النهاية :
اولا لو حصل معاكم الكلام ده افرحوا لان ربنا عرفكم من البداية انه مينفعش ببساطة الشخص التانى ممكن يوافق وتقضوا فترة كبيرة مع بعض وترجعوا تندموا على القصة من البداية وانه كان المفروض من الاول ميكونش فيه حاجة .
ثانيا قبل ما تسيبةا نفسكم تتعلق بحد وتديله اهتمام كبير من تفكيركم وحياتكم اسألوا نفسكم الاول هل الشخص ده مناسب ليه ولا لا ؟!! جايز ميكونش مناسب !!
اسألوا لان الاجابة هتختصر لكم وقت كبير وهترحمكم من كل الالم اللى ممكن تعيشوه .
ثالثا متزعلوش على حاجة راحة منكم فى الحقيقة هى راحت علشان ييجى حاجة أفضل منها دى حكمة ربنا فى الكون .
رابعا ربنا اللى رزقك بالحب فى التجربة الاولى قادر سبحانه وتعالى يرزق بالحب فى التجربة الثانية ربنا اسمه الكريم بس انت اختار صح.
مقالات الرأي تعبر عن وجهة نظر صاحبها ولا تعبر بالضرورة عن الشرقية توداي
تابع الشرقية توداي على جوجل نيوز 
