كام مرة قولت لنفسك خلاص مفيش وقت والسنة ضاعت ، مش هلحق أخلص المنهج ، بذاكر كتير ومش فاكر حاجة ، مفيش حد يشجعنى اذاكر ، بزهق بسرعة من المذاكرة ، بذاكر كويس لكن للأسف مبحلش حاجة فى الإمتحانات ، وحاجات تانية كتير ممكن تقولها ؟
تعملوا إيه لو دا إحساسكم دلوقتى ؟ هحاول أشارك معاكم فى البوست دا بـ 5 خطوات هتساعدكم تركزوا أكتر الفترة اللى جاية فى المذاكرة أهم حاجة نطبق الكلام وميكونش مجرد قراءة فقط وتحسسوا نفسكم إنكم عملتوا اللى عليكوا
1- لو انت من الناس اللى بتقلق من الوقت وخاصة كل ما يقرب معاد الامتحانات ، عايز أقولك إن ممكن يكون معاك حق لإن منطقى تكون مستعد ومجهز نفسك ، إنما خلى بالك كتر التفكير ممكن يتحول الموضوع معاك لقلق وتوتر اللى بالتأكيد هيأثر عليك بعد كده فى ضعف تركيزك وزيادة التشتت عندك ، علشان نعالج النقطة دى محتاجين إننا نركز على الإستعداد أكتر ومراجعة مستمرة للنقاط المهمة ، والابتعاد عن الصحاب اللى على طول بيقولوا كلام يأثر بالسلب عليكم .
2- تعمل إيه علشان تنجز أكبر كم ممكن من المنهج ؟ مع مراعاة إنك تكون فاهم ميكونش مجرد إنك تخلص وخلاص
* ركز على النقاط والمواضيع المهمة
* حاول تركز مذاكرتك من مصدر واحد علشان كتر المصادر بتشتت
* اللى تحس إنه مش واضح لك ، إسأل عنه وتعرفه
* المراجعة مهمة جدا حاولوا تراجعوا كتير
3- بتذاكر كتير وبتحس إنك مش بتنجز ؟ السبب فى كده ممكن يكون أكتر من حاجة مثلاً ممكن يكون فيه حاجة شاغله تفكيرك فـ الافضل إنك تتخلص منها قبل المذاكرة ، أو على الاقل توقف تفكيرك فيها لإن الموضوع دا بيأثر فعلا على التركيز وكمان بيأخذ وقت كبير منك
أكيد بتسأل إزاى ممكن تتخلص من حاجة زى كده ؟
* حاول تبعد الموبيل بعيد عنك لإن لو الحاجة دى متعلقة بشخص معين أكيد هتبقى حابب تعرف إتصل بيك ولا كتب بوست على الفيس ، أكيد بتقرأ الكلام و بتقول آه فعلا دا بيحصل ، لما إنت عارف كده ليه بقى بتسيب نفسك ، خد قرار هترتاح على الاقل إقفل الموبيل أو إبعده بعيد عنك وقت المذاكرة .
4- الوقت اللى تحس فيه إنك خلاص زهقت ومش قادر تكمل ومفيش حد يشجعك وبتنسى كتير اللى ذاكرته تعمل ايه ؟
* فى الوقت دا إفتكر حلمك اللى نفسك توصله ، مش بس تفتكره حاول كمان تتخيل نفسك وقت تحقيقك ، تخيل فرحت أهلك بيك ، تخيل فرحة كل الناس اللى بتحبك عيش الإحساس دا بشكل قوى هيفرق معاك وهيزيد من طاقتك ( التطبيق أهم جرب تطبق الكلام دا )
* ابعد عن الناس اللى كلامهم محبط لإن كلامهم لو فكرت فيه كتير هيأثر عليك بالسلب
* اطلب من أهلك يدعو لك .. أهم حاجة تكون بتعمل اللى عليك وبتسعى
* حاول تعمل تمارين رياضية فى يومك حتى لو هترقص مفيش مشكلة
* حافظ على مواعيد الاكل ومهم يكون فيه تنوع فى الوجبة قلل من الأكل الجاهز فى المطاعم
* من وقت للتانى حاول تقعد مع ناس ناجحة وتسمع منهم حتى لو ساعة فى الاسبوع
5- قبل الامتحانات محتاج تكون مجهز نفسك بشكل يساعدك تحل كويس ، وهتوصل لكده لما تحافظ على طريقة تفكيرك .. بمعنى إنك تنتبه من الكلام اللى بتكرره لنفسك كتير ( مش هحل حاجة ، الامتحانات هتكون صعبة ، بنسى كل حاجة فى الامتحان ) كل الكلام دا أعتقد بيضيع مجهودك طول السنة ، إنما لما تقول لنفسك الحمد لله عملت اللى عليا ، ذاكرت وراجعت كتير ، هتكتشف إن إحساسك وثقتك بنفسك بتزيد وكمان بتتحمس للإمتحان أكتر ، نصيحة مهمة بلاش تتكلم كتير مع الناس اللى بيفضلوا يقولوا مش مذاكرين وبيكونوا مذاكرين كويس ، حتى كمان متشغلش بالك بيهم ركز إنت مع نفسك أكتر
ممكن تكون بتعمل الـ 5 خطوات اللى قولتهم ، ولسه حاسس بالقلق والتوتر أو بتقول مفيش فايدة ، خلينى أفكرك بأن اللى انت عايز توصله فيه غيرك كتير وصله قبلك فـمفيش حاجة مستحيلة ، النجاح محتاج مجهود وسعى تأكد إن كل ما تجتهد كل ما هتقرب أكتر من حلمك .
تابع الشرقية توداي على جوجل نيوز 
