محمد الشافعي: يكتب| رسالة للبنات خاصة بالعلاقات الشخصية مع الولاد

بقول ده ليه ؟
لأنك لو اتصرفتى بشكل مثلاً زى إنك مترديش عليه لما يبعت ليكى أو تتعاملى معاه بتقل كنوع من أنواع إنك تفهميه إنه غلط في حقك ،، جايز ميقصدش يزعلك هيبقى في الوقت مستغرب جداً رد فعلك و مش فاهم ليه بتعملى ده

هتقولى ما ممكن يكون بيعمل ده بهدف إنه يضايقينى فى حالة انه يقصد يزعلك او يتجاهلك ؟
الاول إتأكدي منه واسأليه عن الدافع أو السبب اللى بيخليه يعمل كده ؟.. ( المعلومات الصحيحة هتساعدكم بشكل كبير تتصرفوا بشكل صحيح بدون تسرع )

هل بسبب إنه مضايق من حاجة معينه بتعمليها و بيحاول يوصل ده ليكى من خلال اسلوبه المتغير و اللى انتى نفسك هتكونى مضايقة منه

ولا بيعمل ده علشان يختبر حاجة معينة فى دماغة

الفكرة من الكلام ده
اننا قبل ما نقرر نأخذ اي رد فعل.. نعرف ليه اختارنا يكون رد فعلنا بالشكل ده و ممكن طريقتنا بالشكل ده توصلنا لفين ؟

بحاول أشارك معاكم يا بنات واحدة من المشاكل المتكرره فى جلسات الكوتشينج اللى بسببها بنات و زوجات كتير بتقرر تأخذ موقف من خطيبها أو زوجها و جايز و احيانا بيوصل مع بعضهم انهم يأخذوا قرار بـ انتهاء العلاقة ظننا ان كده مبقاش فيه حل ، انما فى الحقيقة الموضوع بيكون ليه حلول كتير و ده بيحصل بعد ما نفهم اختلافتنا الطبيعية اللى ملناش دخل في وجودها

مثال :
حصل موقف ضايقك من تصرف ما فـ حاولتى تنبهى شريك حياتك انه يأخذ باله و ان الامر ده بيضايق و مع ذلك رجع يكرر ده تانى فـ طبيعى ده يقفلك و تبقى مضايقه من كده
فـ هنا بقى نتصرف ازاى ؟

الفكرة ببساطة انك ممكن تكونى شايفه تصرفه مش احسن حاجة فـ حاولتى تلفتى نظره لده انتى بكده عملتى اللى عليك و ده تصرف صح جدا منك كـ بنت

هنا بقى الولد هيوعدك و يأكد ليكى انه هيخلى باله من ده و بنسبة كبيرة بيكون صادق فى اللى بيقوله ، و بعد شوية وقت كده ممكن تلاقيه كرر الموقف ده تانى اللى انتى طلبتى منه يأخذ باله لانه بيضايقك ، لو هو كرره تانى ده مش معناه انه قاصد يضايقك لان الولد ممكن فعلا ميكونش واخد باله او محتاج انك تفكريه تانى

و مش معنى انك قولتى مره يبقى انتى كده عملتى اللى عليكى ، مفيش مانع تفكريه تانى و ثالث اه انا عارف و متأكد ان ده هيكون مزعج بالنسبالك ، لانك هتبقى شايفه انك قولتى مره وهو لو عايز يعمل ده هيعمل !! نظريا ده صح جدا ، ولكن فى الواقع العلاقات الشخصية من اصعب الحاجات اللى ممكن تكون موجودة فى الواقع بتاعنا فـ مهم ان يكون عندنا المرونة الكافية نتعامل بالشكل اللى يساعدنا نحافظ على بعض

شايفين إيه أكبر تحدى بيواجهكم فى الوقت الحالى فى علاقتكم ؟