محمد شوقى يكتب : ما هي وظيفة محافظ الشرقية !!!؟؟؟

قد يكون العنوان فيه نوع من قلة الذوق ولكني كمواطن شرقاوي من مدينة الزقازيق متعجب من دور المحافظ في علاج مشاكل المحافظه بل ودوره في التعامل مع الأزمات.

ولكي لا أطيل سوف أسرد بعض النقاط:-

1-مشكلة الزبالة وطرد شركة الزبالة وتفويض المحليات للتعامل معها إللي للأسف بعدما كانت الشركة ترفع الزبالة من أمام الشقق 3 مرات إسبوعيا ومن أماكن تجميع الزبالة مرتين أو ثلاثة يوميا أصبحت المحليات ترفعها فقط من أماكن التجميع مرهواحده يوميا وأصبحت نقاط التجميع هي أرض الشارع وليس الصناديق مثلما كانت تفعل الشركة ومش كده وبس ولكن كان بعض الزبالين بياخدوا أجره شهرية من الشقق نظير رفع القمامة من أمام الشقق 3 مرات إسبوعيا وبالتحديد 10 جنيه بخلاف طبعا ما يخصم على وصل الكهرباء وفي النهاية رجعنا لنقطة البداية وهو رجوع الشركة في يناير المقبل

2-كورنيش الزقازيق وخصوصا عند الجامعه تم تشويهه وتكسير بلاطه كله إللي متركب مما يقارب العام ومش عاوز أعرف ليه إتركب وليه إتشال وليه لسه مإتركبش تاني لأن ده بيشير لسوء تخطيط قد يكون متعمد(سبوبه للمقاولين) بخلاف الغرز(جمع غرزه)إللي إنتشرت على طول الكورنيش وأماكن تجمع الحشاشين وخصوصا عند الجامعه برضه وقيام سيارات التاكسي بغسل السيارات هناك برضه(منظر يفرح)وسرقة الكهرباء وقيام بعض المواطنين بعمل بعض الأكشاك عالكورنيش وإقتطاع جزء من الكورنيش لحسابهم (يا ترى فيه تراخيص للكلام ده ولا الموضوع هيصه).

3-إنتشار الباعه الجائلين في كل حته في الزقازيق وخصوصا عند المحطه وميدان عرابي وإقتطاعهم لمعظم مساحات الميدان والنفق بتاع المحطه لحسابهم وترك ممرات ضيقه جدا للمشاه بخلاف إلقاء مخلفاتهم في الميدان والشارعوطبعا نفس الوضع في شارع مولد النبي والبوسته وفاروق بنفس السوء(على فكرة الشرطه لما حبت تفضي قدام عمر أفندي وتشيل الصور السيئة ده كلها أنجزت ده في ساعتين)

4-السواقين وما أدراك ما السواقين وخصوصا السرفيس والميكروباص داخل المحافظةطبعا بعد الثورة راح السرفيس الداخلي عامل إضراب والمحافظ رفعلهم الأجره ل 50 قرش وسكتنا وبعد كده حدثت أزمة رفع أجرة ديرب نجم وأبو حماد والإبراهيمية والناس إشتكت والسواقين قالوا معانا ورقة من المحافظ والله أعلم سليمة ولا مضروبة وأضربوا عن العمل كام يوم والنتيجه الناس تحط في بقها جزمه والنهارده كنت رااجع من بلبيس في الميكروباص رقم ر ج ب 3972 خط بلبيس البحر الزقازيق قام السائق بإخطارنا بأن الأجرة أصبحت 2 جنيه بدلا من 1.5 جنيها وعند سؤالي عن السبب قالي ده قرار المحافظ وطلعلي ورقه مصوره بتقول إن أجرة الزقازيق بلبيس أصبحت 2 جنيه والزقازيق العاشر أصبحت 4 جنيه بدلا من 3 جنيهات وطبعا الناس ساكته ومسلمه بالأمر الواقع والمفروض إن الورقة معتمدة من مشروع المواقف ونائب المحافظ …طيب ليه هوه بيعمل كده وبييجي على مواطني محافظته لترييح دماغ سيادته من وش السواقين وفي الآخر لما تحصل أزمة ومشاجرات بين السائقين والركاب قد تصل لوفيات في بعض الأحيان وخطف بنات زي سواق الميكروباص إللي حاول يخطف بنات الجامعة بتوع ديرب نجم أثناء أزمة موقف ديرب نرجع نقول مين السبب

5-أزمة أنابيب البوتاجاز وإللي كانت متجاوزة كل الحدود في محافظة الشرقية وسيطرة البلطجية عليها ورفع أسعار الأنابيب يعني الوقود إللي هوه محور مهم من محاور حياة الناس….طبعا أنا علشان مش هاممني غير نفسي مهمنيش لأني ببساطه عندي غاز طبيعي مريحني ولكن واضح إننا بنضخم الأزمات مش بنحلها بسماعنا في الآونه الأخيره عن موضوع طرد شركة الغاز(ناشونال جاز) من المحافظة لعدم توصيل الغاز لكل التعاقدات وكمان وجود تسريب وخلل ما بالمحابس ده على حسب ما قرأت على موقعكم المحترم..طيب يا ترى إيه إللي متوقع يحصل لو حكمت المحكمه بطرد الشركة .!!!هل حيتقطع عننا الغاز ولا حتسلموها للمحليات تتعامل معاها زي مشكلة الزبالة ولا إيه؟؟؟ولا حترجعونا لأنبوبة البوتاجاز تاني ونضخم أزمة الأنابيب أكتر وأكتر؟!

6-مشكلة مياه الشرب بالشرقية إللي رسمي كلها طين ومجاري وريحتها وحشه والشوائب مرئيه باالعين المجرده وطبعا إحنا كشعب إضطررنا لشراء فلاتر مياه أعتقد تكلفتها ملايين الملايين وطبعا للأسف كلها مستوردة من الخارج (يعني إنسى تشجيع شراء المنتج المصري)وتكبيد مصر هم على همها من جراء إستيراد كل كبيرة وصغيرة من الخارج (على فكرة فلتر الغلبان بيتكلف 100 جنيه مرحلة واحدة والميسور من 1000 إلى 2500 جنيه ده غير تغيير الشمعات كل شوية).

ده رسائل لسيادة المحافظ وأرجو الرد والتوضيح .

تابع الشرقية توداي على جوجل نيوز