ذكريات صيف
1- آخر يوم فى إمتحانات آخر السنة، العيال قطعوا النتايج اللى كانوا بيسندوا عليها فى الامتحانات على دماغ بعض والكل بيهتف (لا مذاكرة بعد اليوم).
2- الف مع اصحابى قبل ما اروّح ونشترى (لوليتا) وكل واحد بيقول هيقضى الصيف ازاى، واحد طبعا هيروح عند (سته)، واحد مش فاكر أسمه كان بيسافر (البلد)، والباقى بيقضيها كورة.
3- كل يوم نلعب كورة لما يطلع عنينا، طعم العرق والتراب، ونجرى كلنا على اى حد بيرش الشارع بخرطوم ونشرب، مش مهم ميه (نضيفة) والا (لا)، المهم منفضلش عطشانين.
4- بعد ما (نتهد) نقعد كلنا بعد المغرب نحكى حكايات حصلت لنا، أو حصلت لحد من قرايبنا، ربعها حقيقى والباقى (فشر) طبعا، وكل واحد يطرح نظرياته للمستقبل ونفسه يعيش ازاى لما يكبر.
5- نطلع نغيّــر هدوم الكورة ونطلع نفرد حصيرة بين شقتنا والشقة اللى قدامنا ونقعد كلنا فى الطرقة نلعب (بنك الحظ).
6- بالليل أوى بقى ميعاد قصص (رجل المستحيل) و (ما وراء الطبيعة) و (فلاش)، كنا بنبقى مش عاوزين القصة تخلص، ولما تخلص يا اما نبدّلها مع حد من أصحابنا، يا اما نروح نجيب غيرها من (كشك فوزى).
7- بعد شوية من الاجازة وبعد ما تظهر النتيجة بابا بيجيب لنا كتب السنة الجديدة من (معارفنا) اللى اكبر مننا بسنة (علشان ناخد فكرة) واحنا مش طايقين الكتب والا طايقين (معارفنا).
8- بابا بيخلينا نحفظ السورة المقررة علينا فى السنة الجديدة ويسمّع لنا عشر ايات كل يوم قبل ما ننزل نلعب، يا أما (مفيش نزول)، وعمرنا ما كملنا السورة فى الاجازة.
9- بابا بيرجع من الشغل ومعاه بطيخة كبيرة ، اليوم حر جدا، ومحدش طايق نفسة ، نجيب الصينية الألومينيوم الكبيرة ونقطع البطيخة شرايح كبيرة ونحطها فى التلاجة علشان ناكلها لما تسقع.
10-عمو نزل أجازة من (السعودية) نروح نزوره ونقعد نلعب أنا وأخويا وولاد عمى ونحكى حواديت رعب لحد قرب الفجر وبابا يقوم يقول (يالا يا ولاد علشان الوقت أتاخر) وإحنا مش عاوزين نمشى والا ولاد عمى عاوزينا نمشى مع اننا عارفين اننا هنتقابل تانى يوم.
11- ليلة المصيف نفضل سهرانين نجهز الشنط ونشترى لوازم السندوتشات والفاكهة ونجهز القصص اللى هنتسلى فيها فى الطريق وواحنا طالعين الأتوبيس نتخانق أنا وأخويا على مين اللى يقعد جنب الشباك.
12- الأجازة بتقرب تخلص وريحة الجوافة بتبدأ تقلب ريحة التلاجة (عمرى ما حبيت الجوافة).
13- وييجى اليوم الموعود ،آخر يوم فى الأجازة (يوم جمعة طبعا)، بالليل ننزل نشترى (العيش الفينو) علشان السندوتشات ، وننام بدرى علشان نروح المدرسة تانى يوم وأحنا فى قمة النكد وبنحلم بالأجازة الجاية.
وتبقين يا بلادى فى دمى
تابع الشرقية توداي على جوجل نيوز 
