مقالات القراء|دكتور شريف حجازى يكتب:ايه يعني لما يعروها

ايه بقا حكاية البنت اللي اتعرت دي ..
– ازاي تتعرى كده قدام الناس .. أكيد كان قصدها ومش بعيد تكون قالت للعسكري كده كمان ..
لا لا دي اكيد جاسوسه اسرائيليه اقولكم ليه بقا .. الملابس الداخليه بتاعتها لونها تريكوووووواز !!!
وده لون نجمه داوود اللي موجوده في علم اسرائيل .. شفتوا بقا طلعت تبع اسرائيل ازاي ..
وبما ان الجيش بتاعنا لا يحارب الا الجيوش المنظمه ووظيفته العظيمه هي حماية الارض والعرض المصري فطبعا لازم يهجم على البنت دي .. كده بقا نستنتج ان دي ظابط اسرائيلي ..

– بلاش التفسير ده . التلفزيون المصري بتاعنا اللي عمره ما كدب ولا نافق قال ايه .. قال دول قله مندسه واصابع خفيه وطرف تالت .. واحنا طبعا لازم نصدق التلفزيون بتاعنا .. يبقا البنت دي مش تبع الثوره يبقا تستااااااااااااهل ..

– سيده فاضله اتصلت على التلفزيون وقالت دي لا تمثل مصر .. ده عشان اتعرت يعني ؟ .. عندك حق دي ضحت بوقتها وعرضها من أجل مصر ومن أجل ان نعيش نحن مستورين ..
– اونكل توفيق بيقول ان الست المصريه لازم تلبس كلسون تحت الجلبيه .. سيادتك فتشت على كلاسين المصريات يعني قبل كده ولا ايه ..؟ طب دي اتعرت غصب عنها .. تقول ايه بقا في اللي بيعري نفسه وشخصه وفكره وعقله كل يوم عن طريق حقن الهطل اللي بتبعتها للشعب المصري عشان القناه بتاعتك تشتغل ..

بلاش السلفيين طبعا اللي معاهم صك الاسلام قالو دي منقبه اه .. بس مش تبعنا .. يبقا خلاص ملناش دعوه تستااااااهل .. صح عندكو حق فكرتوني ان تعاليم الدين بتاعنا قالت اننا منحافظش غير على عرض السلفيين بس .. ونجري نحرق البلد عشان فتاه لم نتأكد من اسلامها حتى ..

لا لا كل التفسيرات دي مش تمام .. احنا لازم نسمع كلام اكتر فصيل منظم واللي هيمسك الحكم قريب .. الاخواااااااااان ..
ماشاء الله البيان بتاعهم المقتضب على حتة موقع اليكتروني قام بالواجب وزياده . يا جماعه عرض ايه وتتعري وكلام فاضي ايه .. الانتخابات اهم .. امال هنجيب حق الشهداء ازاي ونجيب حق البنت ازاي .. الانتخابات لازم تكمل .. سوري ايه علاقه عرض البنت بالانتخابات ولا البنت نايمه قدام اللجان يعني ..

طيب بما ان الجيش بيضربها تبقا مش تبع الجيش واكيد مش تبع الفلول مش معقول يعني الجيش هيضرب الفلول وبما انها منقبه تبقا مش تبع الاخوان ولا السلفيين ولا تبع 6 ابريل ولا اي حركه من الحركات الماثونيه الكافره واكيد دي مش تبع الثوره .. الثوار مش بيقلعوا يا جماعه ..

دي بقا ممكن تكون من الكائنات الفضائيه اللي كانت بتنزل التحرير وقت الثوره ..

وبعدين ايه يعني لما وحده اتعرت عشان مصر لو افترضنا انها تمام يعني .. دي مش المفروض تثير فينا اي مشاعر .. كفايه قوي عليها ان الصوره اتنقلت لكل وكالات الاخبار العالميه لكل الشعوب بكثير من الاستنكار .. وبعدين اللي يقولك بقا احنا كنا في الشتا ايه اللي ملبسها كده . اكيد الجو كان حر وقتها بقا وبعدين كل ما نخف الهدوم كل ما نعرف نجري مش كده ولا ايه ..

والحمد لله في كل احداث حصلت من اول الثوره لحد مجلس الوزرا لازم نلاقي وجبات مره كنتاكي ومره حوواشي .. انتو طلعتو الشعب المصري طفس قوي على فكره ..
او واحد بياخد 200 جنيه عشان يموت .. الراجل مسترخص نفسوا قوي .. او يضحي بنور حياته ( عنيه ) عشان وجبه كنتاكي .. هو احنا رخصنا قوي كده من امتي عشان مش متابع .

نرجع للبنت تاني وقت ما الصوره والفيديوهات نزلت وكل العالم شافها انقسم الشباب المصري لعده انواع ..

نوع متدين مسيس .. مبصش للصوره اصلا وقال دي عرضت عورتها والنظر اليها حراااااام واذا كانت هي عايزانا نرتكب الحرام تبقا تستااااااااااااهل .. والله

نوع سيس شاف الصوره قال البنت دي مش تمام وبصراحه بملابسها الداخليه دي متميزه بنظره كلها شهوه .. اكيد طبعا عندك حق لان انت اصلا مبتشوفش غير العاهرات ..

نوع حزن على الصوره بحسن نيه واستنكر وقال بس هنعمل ايه ما كانت تتلم وتقعد في بيتها .. امال مين اللي هيجيب حقك يا راجل !!

نوع نزل يساعدها اخد علقه محترمه جدااااااااااا ..

نيجي بقا للاهم ..
هي دي لو اي حاجه من الحاجات الهبله اللي فوق دي صح … ينفع يحصلها كده ..
افتكر ايام الغزوات الاسلاميه كان محرم على الجيش الاسلامي ان يمس امرأه مشركه ..

بلاش اسلاميا .. هو ينفع انت لو غلطت غلطه كبيره اعريك في الشارع .. طيب لو طلع عليك 3 حراميه من بتوع الغسيل واخدو كل هدومك وبقيت عريان في الشارع هتحس بايه . هتبقا مبسوط بايه اكتر لو الناس فضلت تتفرج عليك وقالت احسن ايه اللي ممشيه في الشارع الضلمه ولا هتبقا عايز اي حد يغطيك ..

طيب الاول هي البنت دي انسان .. طيب لو هي انسان .. هو الانسان ده ليه كرامه .. ليه حرمه .. ليه حقوق .. هو الانسان ده مهم اصلا .. مفتكرش بدليل ان ربنا خلق وسخر ليه كل ما في الارض والسماء ..
ينفع اهين عرضك وبعدين اوعدك بحياه كريمه .. هتصدقني .. ولو اعتزرتلك بعدها تفتكر كفايه ..
طيب انت لما شفت الصور والفيديو حسيت بايه .. محستش باي غصه في حلقك .. باي جرح لمشاعرك او كرامتك او حيائك حتى .. حسيت انك عايز تفضل مبحلق في الصوره ولا حسيت من جواك انك عايز تغطيها ..

كفايه نقلب كلمتين بالفصحي بقا ..
” أيتها المرأه العفيف الشريفه .. انحنت هآمتنا خجلا و ذلا وارتفع قدرك شرفا وعزا .
تحت عرش الرحمن الذي لا يرضي لعبيده ذلا او اهانه ..”
لا أدري هل أقول أسفي أم حيائي وخجلي .. اقول لك بان احد الصحابه في احد الغزوات قطعت يديه فابدله الله جناحين في الجنه يطير بهما حيث شاء .. فاذا كانت نيتك لله فاعلمي ان عوض الله اعلى واكبر ..

وكالعاده اي حد هيقرا العنوان بس او معترض هيشتم ونستفيد نحن بالحسنات ..

تابع الشرقية توداي على جوجل نيوز