مقالات القراء | احمد خالد مكى يكتب : مــــــــلـــــــعـــون أبــــو الــــتـــعـــليم

حقيقة .. التعليم العالي في مصر هدفه انك تكون جاهل لمعنى العلم .. 
بيقتل جواك طعم العلم ..
كلمات كتير بنسمعها ومواقف بنشوفها طول سنين الجامعة لكن أهمها 
“أحفظ علشان تنجح مش مهم تفهم المهم تزود درجاتك .. اشتري كتاب وحل الشيت انقل من اللي جمبك وسلمه في ميعاده .. زي ما هو مكتوب في الكتاب اكتب .. أكتبله كتير هينجحك .. لازم تاخد دروس عند فلان علشان تفهم وتنجح في مادته ب 1000 بس .. انا عدت السنة علشان الغياب مع اني فاهم .. الطلاب بيكرهوا دكتور فلان بسبب تناكته .. دكتورة بتزعق باسلوب هزلي .. الامتحان ازاي ندخل ببرشام .. ياعم الف اي حاجه مبيشوفش .. انا محلتش ولا سؤال ونجحت .. انا رايحه الجامعه اقابل الواد مش عارف مين .. شوفت ياواد البنت اللي هناك دي .. معايا سجارة حشيش تعالوا نخمس فيها .. الواد ده دحيح .. انا مش فاهم حاجه المهم اكتب زي مابيقول وخد الشهادة .. هو في حد بيذاكر من الكتاب جيب ملخصات مكتبة فلان بتنفع .. انا نجحت واخدت شهاده عايز كورسات علشان اعرف اشتغل .. ))))

تقريبا دي اكتر الكلمات اللي الواحد بيسمعها و لو جينا نقارنها بكلمة علم هنلاقيها اقل من انها توصف بالجهل … يكفي الجهل هو ان الواحد ياخد تلات دروس في كل ماده في الثانوية علشان يدخل كلية طب مثلا وهو عقليته وفهمه ومهاراته استحاله تنفع و نشوف في الآخر دكتور حمار .. كل العلماء بقوا علماء لانهم بحثوا وذاكروا و اتعلموا بنفسهم علشان العلم مش علشان شهاده …. واكتر عائق ان الواحد يتحرك هو العرف اللي ماشي عليه كل الأهالي لازم شهاااده مع ان المهارة لو تم الاهتمام بيها هتلاقي بدل العالم مليون عالم في سن ال 16 سنة لان عقل العربي و المصري نضيف ومحتاج اللي يوجهه صح .. ده التعليم الجامعي .. تخيلوا التعليم الاساسي و ازاي يبقى التعليم العام الحكومي منبوذ و اتجاه المعظم للخاص اللي معظمها اتبنت من رجال الحكومة و بتوع مجلس الشعب ! 
مصر عايشة فقط للمصالح ويوم لما حد يقول كلمة حق تسمع كلمة يا عم اتهد بقى هتعمل حاجه غير اللي البمأدمين عملوها ؟؟؟ 

بس بردوا نقول كلمة حق ان رجال الاعمال بفلوسها قدرت تهتم بالمراهقين و تطلع جيل من البنات ترقص عريانه وعاميها الفلوس !!! ورجالة من النوع الجديد اللي من النوع اللي يتربط من رقابته ويتجر زي الكلب … وطبعا ده فن .. العري و قلة الأدب فن 

انا نفسي اتعلم .. نفسي اشوف كتاب ملون احتفظ بيه .. نفسي الجامعه تكون ملتقى العلم مش ملتقى الحبيبة .. نفسي اشوف موظفين فاهمين .. نفسي احس بطعم العلم 

هتكلم عن نوع من الكليات بما إن الإمتحانات قربت 
كليات التربية .. الهدف من خلالها تطلع مدرس تقدر تتعامل مع تلاميذ من مرحلة معينة علشان كده بتدرس علم النفس و الاجتماعي و السلوكي و طرق التدريس الى آخره …… 
لما تختبر طالب إطلع على المواد دي .. هل الأولى اختباره عملي في فصل عن طريق شرحه لمنهج ما وتقيمه للتلاميذ وتقيم التلاميذ ليه و أبدأ انا كدكتور احدد نقاط قوة وضعف وعلى اساسها اقرر ايه المواد اللي محتاج يدرسها بشكل اكبر علشان يكون مؤهل .. ولا أكتبله سؤال في ورقة واحط درجات عليها اذكر صفات المعلم و خصائصه !!!! ؟؟؟؟؟ 

تجربة شخصية حاولت فيها استمتع بماده عندي كانت عن التصوير الفوتوغرافي رغم ان الماده قديمة و مطلوب اننا نستخدم كاميرة فلم و الكتاب مجبش سيرة الكاميرات الديجيتل ومكنش في ورش عمل تصوير و لا حتى رحلات ميدانية جماعية لتعليم التصوير الا اني قولت هستمتع بردوا و بدأت انفذ مشروعي وكلفني 200 جنيه وكان كلي آمل اني وانا بقدم المشروع اشوف رد فعل الدكتور .. انا تعبت واكيد هلاقي تقدير وهنتظر اسمع نقد بناء يفدني .. للأسف مسك المشروع ورماه على جنب وقال .. اللي بعده !!!

بضايق لما ادخل اودة الدكاتره الاقي اوده فاخمة ومكتب ومظاهر و الدكتور لازم يكون لابس البادله اللي بتلمع و مالي الاودة دخان سجاير و لازم يكون هو العالم ده الدكتور ! ليه الدكاتره متكونش مختلطة بالطلاب تضحك معاهم تقعد معاهم تشوف احلامهم وتوجههم ! ليه لازم يكون الدكتور رافع مناخيره لفوق .. طبعا في دكاتره تحترم في تواضعها ومحاولتها انها تكون كده والباقي كله كل الطلاب من اول ما بتدخل اولى لحد لما يتخرجوا بيلعنوا في اللي جابوهم .. طيب ليه توصل طلابك كده ؟

عندنا ماده اسمها تصنيف انا عن نفسي مش مقتنع بيها نهائي مع انها مهمة جداا لكن اسلوب تدريسها غريب الماده دي بتشرح اسلوب ترتيب وتصنيف الكتب في المكاتب الكبيرة و انواعها و الانظمة التي اتعملت بشكل علمي يخلي القصة دي بالنسبة ليك سهلة .

طيب مثلا ليه ميبقاش دراستها رحلات للمكتبات ويبقى العملي بتعها اننا نساعد في التصنيف فعلا في مكتبات كبيره وليه ميبقاش في مكتبة كامله مخصصة للطلاب فقط للتدريب الفعلي .. 

ساعتها هنفهم المهارة وهنقدر نمارسها وملهوش لزمة الكتاب وعلى فكره اسلوب انك تحفظ التعريف ده اسلوب ” غبي ” لان المفروض انك تفهم و تستنتج انت التعريف المناسب و يكون في مساحه انك تقدر تضيف ليه نعبد نظرية واحنا ممكن يطلع منا اللي يضيف و يعمل مليون نظرية وتطلع أفضل لو اتعلمنا صح .. مينفعش ان يبقى في استهانة بعقول الشباب وانهم متخلفين .. زي ماليهم قدرة على الحفظ ليهم الضعفين على الابتكار بس انت باسلوبك بتموت الابتكار ده .

اللي يضحك انك لما تعرض كلام زي ده على مسؤول او دكتور يقولك :
الموضوع في محل الدراسة ونعمل عليه .. ويفوت بدل السنة سنين ومتشوفش غيرالأسوأ .. طيب فين ميزانية التعليم فين حظ التعليم من ده كله ليه خلقتوا مجتمع حافظ مش فاهم ؟؟

هذكر نموذج شاب اسمه ابراهيم طه كليته اللي جت بسبب مجموعه هي تجاره لكنه يصنف من العلماء و اخد براءات اختراع واصغر مؤلف في علم الفيزياء و كلية التجارة لا يفقه فيها شئ غير انها قدره اللي وقف في زوره … عنده دلوقتي 24 سنة تقريبا دلوقتي .

للأسف عشنا زي الأسد في حديقة الحيوان ميعرفش قوته الحقيقية و اقتنع ان حياته هي القفص إحنا عايشين في اكبر قفص … وخايفين نكسره ونقدر نكسره 

تعليم الجااامعي فااااااااااشل 
و الطلاب نفسهم لو صحصحوا من غيبوبة اللي هما فيها هيقدروا يعلموا الدكاتره طريقة التعليم الصح … لإن دماغنا إحنا الشباب أقوى وأكبر بكتييييير و الدليل في براءات إختراع و علماء و عباقرة في سن 8 سنين و سن 16 سنة و 22 سنة مش بس في المجال العلمي لأ في كل المجالات التربية و القيادة و التنمية البشرية و الفن . 

16 سنة من عمرنا ليه نتخلى عنها و نسلم دماغنا لمصنع كبت الإبداع .

ياترى هعرف اشوف حلمي ..!!! 
شوف الصوره دي     صورة حقيقية مش فوتوشوب

دي رسالتي لكل القائمين على التعليم 

تابع الشرقية توداي على جوجل نيوز