اسمى في الجنه يناير
============
عاصي وكلي ذنوب من ساسى لراسي
والدنيا بره تنقلب وانا مالى
وانا عمرى كنت سياسي !!
تعرف حياتى ماشيه ازاى ؟ إذا كنت أنا مش عارف
باكل
واشرب
وانام
واصحى
وانا ع النت
قدامى كباية الشاى.. وع الميل معايا البت
دخان سيجارتى يتحرق
والعمر منى بيتسرق
ما يتسرق …مانا بردو مش خايف
مانا اصلى مش شايف
والعمر شئ زايف
وف مره جاتنى رساله فيس بوك
وانا كالعاده قلبتها
ماهى اصل دى عيال سيس …. بؤ!!!
كلمة بزياده سمعتها
بس انا فاضي فتحتها
ثورة بكره والشباب كله ثاير
لازم تقول لأ..لازم تكون غاير
ضحكت ضحكه عاليه
ياعم دى دماغ عاليه
بيقولك ثوره…هأ هأ.. دى فيها أمن دوله
هى العيال دى فاضيه ولا الغزاله رايقه
ولا ده داء شهره..ولا تكونشي فرطه!!
اله…ده بكره عيد الشرطه
يعنى اللى هيتمسك غاير غاير
ما علينا انا اصلى نمت
وتانى يوم حلمت
البيت بيتمرجح من صوت هز الحيطان
دى الثوره وهتنجح خليك فوق جبان
بحلم وانا مفتح ..اكيد انا عيان ده جنان
لكنى مش نايم ..دى حقيقه وعزايم
حسيت احساس غريب لاول مره احسه
لكن وس الشيطان ما سلمت من وسه
قالى خليك هنا دى عيال واتوزوا
لكن احساسى جميل وكان اقوى
هو انا امتى افوق…واكون اقوى
أيها الجلاد مهلاً فأنا بشر
لِمَ كل هذا الظلم ولِمَ الشر
فحبي لها في كل جنباتى قد انتشر
لا تعتر ِ زى النيل ولا تـُصِر
فهذى أمٌ أرضعتك حنانها.. وانا ابنها
انا ابن مِصر
بين الحشود بهتف والصوت بيتعالى
وحريمنا قدامنا تقولشي رجاله
ثورة غضب من غير غضب
ثورة غضب من غير شغب
يالا العجب
كان الرصاص يضوى وفي الهوا حاير
ومدراعات تبطش تدهس على الساير
والقنابل والعساكر
والعصايه والمجازر
وانا وحيد اعزل وكل ذنبي…ثاير
طب ليه بقيت ثاير…وليه بتتثاير
لكنى مش همى
هم البلد همى
وبروحى وبدمى ..هفديكى يا غاليه
وادوس على الجاير
ضم الرصاص صدرى
والضحكه على خدى
من الجنه يا بلادى وللجنه انا طاير
ما تعيطيش يامه ولا تزعلى عليا
وقولى لاخواتى…… وقولى لكل ثاير
اسمى في الجنه يناير
اسمى في الجنه يناير
شعر عامى بقلم :ناجي نعيم
تابع الشرقية توداي على جوجل نيوز 
